31
1 GODAY,
«He wode tani Isra7eele
qommo ubbatas Xoos gidana;
isttika ta dere gidana» gees.
2 GODAY, «Mashshafe attida derey
bazzo biittan
taappe kiyateth demmana;
tanikka Isra7eeles
shemppo immanaas yaana» gees.
3 GODAY nuus haahosoppe qonccidi,
«Tani inttena
mernaa siiqon dosadis;
hessa gishshas ta qadheteththan
inttena taakko shiishshadis.
4 Isra7eele derezoo!
Tani inttena zaara keexxana;
intteka keexettana.
Intte karabe zaari denththidi
ufayssan hombocizaytara
intte hombocana.
5 Intte zaaridi Samaariya
zumbullata bolla
woyne tokkana;
goshshanchchati tokkana;
istti ayfiza
ayfezankka ufayettana.
6 Efreeme zumbullata bolla
naagizayti,
‹Haa yiite;
GODAA nu Xoossaako
pude Xiyoone ane kezoos›
gi xeygana wodey yaana» gees.
7 GODAY, «Yaaqoobe deraas
ufayssan yexxite;
kawoteththata halaqas ilili giite;
intte galatakka sissite;
‹GODAWU Isra7eeleppe
casha attida
ne deraa ashsha› giite.
8 Be7ite tani istta
pudeha baggafe ehana;
biitta gaxappeka
tani shiishshana;
istta giddon qooqetinne wobbeti,
abbey baynda maccassatinne
miixattizayti daana;
keehi daridi
bantta dere simmana.
9 Tani istta zaarada ehiza wode
istti yeekkishenne
woossishe yaana.
Tani istta pultto
haaththa achchara
suure ogera kaaleththana.
Gaasoykka tani Isra7eeles aawa;
Efreemeykka taas bayra naa.
10 «Intteno kawoteththatoo
GODAA qaala siyite!
Haahon diza abba gaxatankka,
‹Isra7eele laalliday
izi istta zaari shiishshana;
ba wudezakka
heenththanchcha mala
izi heemmana› giidi awajjite.
11 Gaasoykka GODAY
Yaaqoobe wozzana;
izappe minnizayta kusheppe
iza kessi ekkana.
12 Istti yiidi Xiyoone zuma bolla
ufayssa mazamure yexxana;
istti GODAA kiyateth gidida
kaththan, woyne ushshan,
zayten, deyshaninne
dorsa laaqqatan, wofanotaninne
ussatan ufayettana;
istti haaththi paccontta
atakilte soho mala gidana;
hayssafe guye istti
muuzottettenna.
13 He wode geela7oti
ufayettidi yexxana;
wodallatinne cimati guppana;
ta istta yeehoza
ufayssan laammana;
ta istta muuzoteththafe
minththeththana;
ta isttas ufays immana.
14 Tani qeeseta keeha anjjana;
ta derezakka
kiyateththi kaallana» gees.
15 GODAY,
«Waasoynne camo yeehoy
Eraama katamappe seetettides;
izi nayti wurida gishshas
Eraheela yeekkadus;
minetonttaka ixxadus» gees.
16 GODAY, «Yeekkofanne afunxxofa;
ne daaburay coo hada attenna;
morkketa biittafe istti simmana.
17 Sinththafe nees
hidotay diza gishshas
ne nayti bantta
biitta simmana» gees.
18 «Efreemey camo milas milalishin
addafe ta siyadis;
‹Loohontta wofano mala
tana qaxxayadasa;
tanikka qaxxayettadis;
neni GODAA ta Xoossa;
neni tana zaara;
tanikka simmana.
19 Ta neeppe haakka bidaappe guye
simmada modhettadis;
ta akeekida wode
ta hu7e baqqadis;
ta yelagateththaa
kawushshateth tookkadis;
yeellatada guuxxadis› gides.
20 Efreemey ta dosada
ufayettiza ta naaza gidennee?
Daro wode ta izara
eqetta haasaykkoka
zaarada iza gishshas ta qoppays;
ta maracey kokkorees;
ta izas keeha qadhettays»
gees GODAY.
21 GODAY, «Ogen malata essa;
bizaso bessiza malata tokka;
ne baana wogga ogeza akeeka;
geela7oye Isra7eele simma;
histtada ne katamata gela.
22 Hanne kaddida nayee!
Ne ayde gakkanaas toylattanee?
GODAY sa7a bolla
ooraththa miish medhdhana;
hessika maccay
adde dooddana» gees.
Xoossa Deres Sinththafe Yaana Ishalo De7o
23 Ubbaafe Wolqqama GODAA Isra7eele Xoossay, «Tani isttafe di7ettida miishshaa ta isttas zaariza wode istti Yuhuda biittaninne izi katamatan, ‹Nenoo xilloteththi aqiza geeshsha zumazoo! GODAY nena anjjo!› giza qaala zaari go7ettana.
24 Goshshanchchatinne mehe haaron aqizayti Yuhudaninne Yuhuda katamatan issife daana;
25 Tani labbanida shemppoyo ooraxissana; daaburdaarokka minththana» gees.
26 He wode tani dhiskofe beeggada yuushsha xeelladis; tani mal7o dhisko dhiskadis.
27 GODAY, «Tani Isra7eele biittaninne Yuhuda biittan asinne mehe kunththiza wodey yaana.
28 Istta dhoqallanaas, laallanaas, shira yegganaas, dhayssanaassinne bash istta bolla ehanaas keeha tani minnida mala istta zaara keexxanaassinne tokkanaas keeha minnana» gees.
29 «He wode asay,
‹Aawati woyne miththa teera
caalidayssa miin
istta nayta achchi zil7ides›
geetettiza leemiso
nam7anththo haasayettenna.
30 Gido attiin asay issoy issoy ba nagaran nagaran hayqqana; woyne teera qawu7e mida asa achchi ubbay zil7ana» gees GODAY.
31 GODAY, «Tani Isra7eele deraaranne
Yuhuda deraara ooraththa caaqo
caaqettana wodey yaana.
32 He caaqozi tani istta Gibxeppe
kessanaas istta kushe oykkada
istta aawatara caaqettida
caaqoza mala gidenna;
tani isttas
azina mala gida dishin
istti tanara diza
caaqo qaalaza laallida» gees.
33 «Gido attiin tani GODAY
he wodeppe guye
Isra7eele deraara
ta caaqettana caaqoy hayssa;
tani ta woga
istta wozinan xaafa woththana;
tanikka isttas Xoossa gidana;
isttika ta dere gidana.
34 Hayssafe guye oonikka ba lagge
woykko ba isha,
‹GODAA era› giidi tamaarsenna;
gaasoykka guuththafe doommidi
gita gakkanaas
istti ubbay tana erana;
tanikka istta qoho atto gaana;
istta nagarakka nam7anththo
zaara qoppike» gees GODAY.
35 Gallassan poo7isana mala
arshe woththiday,
omarsan poo7isana mala aginanne
xoolintteta azaziday,
dambalay guummana mala abba qaaththizay
iza sunththay GODAA Ubbaafe
Wolqqama Xoossa geetettizayssi,
36 «Ha eqqidi diza medheta wogay
ta sinththafe kichchiko
he wode Isra7eele zereththati
ta sinththan
mernaas kawoteth gididi
duussay attana» gees GODAY.
37 GODAY, «Bollan diza salota
gakki wadhdhanaas dandayettiko,
woykko garsan diza biitta xapho
gakki pilggi eranaas dandayettiko
he wode tani Isra7eeley ooththida
ooso ubbaa gishshas
ta istta yegga aggana» gees.
38 GODAY, «Hanani7eele Gimbefe doommidi gula penge gakkanaas katamaya taas GODAAS oosettana wodey yaana.
39 Wadha wodorozi heeppe doommi sitti giidi Gaareebe zumbullatara aadhdhidi Go7aha gakkanaas micettana.
40 Ahaynne bidinththi yegettiza shoobba ubbay arshey mokkiza Qediroone shoobbara biidi Para Penge gakkanaas diza tidhdhi gida dembay ubbay GODAAS dummatidaaz gidana; hessafe guye he katamaya shodettukunne laalettuku» gees.