49
Amoone Deres Yootettida Kiita
1 Amoone asaa GODAY,
«Isra7eeley attuma
nayta yelibeennee?
woykko iza laattanayti baawee?
Histtiin Milkkoomey
Gaade ays laattidee?
Iza asati ays katamayn dizoo?
2 Amoone katama Eraaba bolla
ola waaso cenggurssi
seetettana wodey yaana.
Iza budhettada doorettida
doore gidana;
izi gutati ubbay xuugettana;
Isra7eeley bana kessi gooddidayta
ba dereppe kessa gooddana.
3 Hanne Haseboone!
Aye katamay
dhayda gishshas yeekka;
Eraaba macca naytoo waassite;
maaqa may7idi yeekkite;
gaasoykka Milkkoomey
ba qeesetaranne
ba shuumetara di7ettidi baana;
dirsa giddon
yaanne haa woxerettite.
4 Hanne kaddidaaree!
Neni ne shoobbatan
ays ammanettay?
Neni lo7o kath immiza
ne shoobban ays ceeqettay?
neni ne dureteththan ceeqettada,
‹Tana oonee bochchanay?› gaasa.
5 Tani ne yuushon dizaytappe
ne bolla shiro ehana;
intte ubbayka goodettana;
baqata bolla dizayta
shiishshana asi beettenna.
6 «Hessafe guye tani
Amoone asaappe di7ettida
miishshaa zaarana» gees.
Eedoome Gishshas Yootettida Kiita
7 Eedoome gishshas GODAY Ubbaafe wolqqama Xoossay,
«Aadho erateththi
Temaane asaappe dhaydee?
Zorey akeekanchchatappe
haakkidee?
Istta aadho erateththay cingidee?
8 Tani Eesawe qaxxayiza wode
ta iza bolla bashsha
ehiza gishshas
intte Didaanen dizayti
guye simmi baqatite;
ciimma olla giddon qotettite.
9 Woyne maxizayti intteko yiidi
maxishe pushulo
ashshi erettennee?
kaysoti kaysotana gelikko
ba koyidayssa xalla
ekkeettes deettennee?
10 Gido attiin tani Eesawe
paxa kallo ashshana;
izi qotetti attontta mala
izi qotettanaasohota
tani qoncce kessana;
iza nayti, iza dabbotinne
iza shooroti dhayana;
izikka ba hu7es deenna.
11 «Yelida aayanne aaway baynda
ne garsan diza nayta
ne aggaaga;
ta istta dichchana;
am7etikka tanan
ammanettetto» gees.
12 GODAY, «Xawa uyana bessonttaytas xawa ushshi attonttayssa gidikko neni waana qixaateppe attanee? Nees qaxxayeteththi attenna; ne uyanaas bessees.
13 Booxiray laalettada dagamas, qidhessinne qanggeththas malata gidana mala tani tanan caaqqadis; izi katamati ubbay mernaas aykkoy baynda bula gidana» gees.
14 GODAAPPE yida issi kiita siyadis;
«Eedoome bolla
worajjanaas shiiqite;
olettanaas dendite!» gi yootiza
qasttanney kawoteththatakko
kiitettides.
15 GODAY, «Ha7i tani nena
kawoteththata giddon laafa;
asaa giddonkka
kadhettidaade ooththana.
16 Nenoo zaalla gongolo
giddon dizayssoo!
Nenoo dhoqqa zumbulla
hu7en uttidayssoo!
Ne yombiza yombaynne
ne wozina
otoroy nena baleththides;
neni ne keeth golle mala
dhoqqasohon keexxikokka
tani nena
heeppe duge olana» gees.
17 GODAY, «Eedoomey
dagamas malata gidana;
heera aadhdhiza as ubbay
izi bolla gakkida bash be7idi
malalettishe qidhana.
18 Sodoomeynne Gamooray
bantta yuushon diza katamatara
issife dhayda mala
Eedoomey dhayana;
oonikka he biittan de7enna;
issaadeyka izin uttenna» gees.
19 GODAY, «Gaammoy
Yordaanoose woratappe
mehe heemmiza demban
kezi wodhdhiza mala
tanikka Eedoomey qoppontta
dishin keza wodhdhana;
iza biittafe ta iza gooddana;
ta dooridayssa
iza bolla shuumana;
ta malay oonee?
tanara eqettana
dandayzay oonee?
tanara eqettana dandayza
heenththanchchay oonee?» gees.
20 Hessa gishshas tani GODAY
Eedoome bolla polanaas
halchchida halchchonne
Temaanen dizayta bolla
ta qoppida qofaa siyite!
guuththa wudeti gooshetti baana;
hessa gaason wudey heemettizaso
mulera dhayssana.
21 Eedoome kundeththa giirissi
biitta qaaththana;
istta waasoykka
Zo7o abba gakkanaas
kooshumees.
22 Golle mala duge sitti gi
izi bolla wodhdhana;
ba qefetakka
Booxira bolla miccana;
he wode Eedoome olanchchati
miixay oykkida
maccassa mala hirgana.
Damasqo Gishshas Yootettida Kiita
23 GODAY Damasqo gishshas,
«Hamaate asaynne
Arfaade asay
Damasqo katama
dhayo siyidi dagammides;
abba dambala mala shirotides;
istta wozinaykka seerides.
24 Damasqoy daaburadus;
baqatanaas guye simmadus;
kokkoradus;
miixay oykkida
maccassa mala ceeceynne
tuggay izo oykkides.
25 Ta izin ufayettiza erettida katamaya
waana yegetta attadee?
26 He wode izis naateththa
attuma nayti ubbay
ke7idason ke7idason
oge bolla kundana;
olanchchati ubbayka
hayqqi wurana.
27 Tani Damasqo katama yuushon diza
gimbe bolla tama yeddana;
he tamay Beeni-Hadaade
shakko maana» gees.
Qeedaare Gishshassinne Haxoore Gishshas Yootettida Kiita.
28 Baabiloone kawo
Nabukadanaxoorey
oli xoonida Qeedaare
kawoteththa gishshassinne
Haxoore kawoteththa gishshas
GODAY, «Dendidi Qeedaare olite!
Arshey mokkiza baggara diza
deraa dippi histtite.
29 Istta dunkaanetanne
istta wudeta ekkite!
Istta aqosoynne istta gaamellati
ubbay attontta ekettana;
Histtidi isttas, ‹Istta bolla
shiro bolla shiroy yides›
giidi waassana.
30 «Intteno Haxooren dizaytoo!
Baabiloone kawo
Nabukadanaxoorey
intte bolla iita miish ooththana
maqetti uttida gishshas baqatite;
biidi ciimma gongolon qotettite.
31 «Dendite! Hirgay baynda
badhdhi gi uttida
banan ammanetti uttida
kawoteththaa olite!
Ibiththi woykko kolatay
baynda dishin barkka diza
deraa bolla worajjite» gees.
32 GODAY, «Istta gaamellati bonqqettana;
istta wudetakka buuri ekki baana;
bantta hu7e gaamme histti
meedettidayta
tani carkon laallana;
tani Ubbasora istta bolla
bosha ehana.
33 «Haxoorey worakanata
duussaso gidana;
mernaas bula gidana;
oonikka heen de7enna;
ay asikka izin uttenna» gees.
Eelaame Gishshas Yootettida Kiita
34 Yuhuda kawo Sedeqiyaasi kawotida
koyro layth GODAAPPE
Elaame gishshas
taakko yida qaalay,
35 Ubbaafe wolqqama GODAY,
«Hekko izi wolqqateththas
yoch gidida
Elaame wondafeta
ta menththana.
36 Oyddu bagga gulatappe
tani Elaame bolla
oyddu carkota ehana;
istta he oyddu bagga carkotan
ta laallana;
Elaameppe di7etti bidayti
gakkontta kawoteththay deenna.
37 Istta shemppo wodhana koyza
istta morkketa sinththan
tani Elaame yarkiyarkisana;
istta bolla bash ehana;
hessika ta istta bolla
ehana hanqo;
tani istta mulera
dhayssana gakkanaas
mashshan yedeththana.
38 Tani araata Elaamen tokkana;
tani izi kawotanne
shuumeta dhayssana.
39 «Gido attiin wurseththa wodetan
tani Elaame zaara
ishalsana» gees.