8
1 Ubbaafe Wolqqama GODAY, «He woden Yuhuda kawota meqeththi, shuumeta meqeththi, qeeseta meqeththi, nabeta meqeththinne Yerusalaamen diza asata meqeththi ubbay duufoppe maxettidi kezana.
2 Histtidi istti siiqida, kiitettida, kaallida, zore oychchidanne goynnida arshe sinththan, agina sinththaninne salo xoolintteta ubbaa sinththan micettana. Istta meqeththay shiiqenna woykko moogettenna; gido attiin biitta bolla olettida buura mala gidana.
3 Ha iita asaa kusheppe attidayti ubbay ta istta goodda yeddidaso ubbaan de7oppe hayqo doorana» gees.
Nagara Gaason Gakkiza Qixaate
4 GODAY tana, «Asaas, ‹Asi kundiko kundidasohoppe simmidi dendennee?
Woykko asi balidaa gidikko
guyeppe ba balaappe simmennee?
5 Histtiin hayssi derezi
ays guye simmi bizee?
Yerusalaamey ays ubbato
guye simmazee?
Istti gene ooso minththi oykkida;
simmanaaska koyettenna.
6 Tani istta lo7eththa ezgadis;
istti suure haasayettenna;
ta ay ooththadinaa?› gees.
Gido attiin ba iita ooso
paaxizay issoyka deenna;
olas dirgiza para mala
ubbayka baas baas woxxees.
7 Shimela geetettiza kafoti
bantti simmiza wode ereettes;
haraphpheti, dagicetinne
waalla geetettiza kafoti
ba dendi biza wode ereettes;
gido attiin ta derey
GODAA woga eribeenna.
8 Wordanchcha xaafeti bantta bi7iren
ta wogaa wordora xaafida;
histtiin waanidi,
‹Nuni aadho eranchcha;
GODAA wogay
nunara dees› geetii?
9 Aadho eranchchati yeellatana;
istti kawuyananne
woximaden oykettana.
GODAA qaalara
istti eqettichchiin
isttas aaza erateththi dizee?
10 Hessa gishshas tani istta machcheta
hara azinatas,
istta biittatakka
allagatas immana;
guuththayka gitaykka ubbay
bantta go7as yiiqeteettes.
Nabetinne qeesetikka ubbay
as baleththeettes.
11 Istti ta dereza madunththaa
qeeri miishshan qoodidi
maaddontta dhale immeettes;
saroy baynda,
‹Saro, saro› geettes.
12 Tuna ooso ooththidi yeellatidoo?
Chii! Mulekka yeellatibeettenna.
Istti yeellay aazakkoka erettenna.
Hessa gishshas
isttika kundidaytara
issife kundana;
ta istta qaxxayiza wode
istti kawuyana» gees.
13 GODAY, «Istti goyi kessida
kath ubbaa
ta isttafe ekkaychchana;
istta woyne turan
ayfey dhayana;
balase miththika ayfe immenna;
istta bonccotikka qokkana;
tani isttas immidayssi
isttafe ekettichchana» gees.
14 Histtiin asati,
«Nuni hayssan ays uttinoo?
Ane issi bolla shiiqite;
gimbetti uttida katamatan
baqati biidi heen hayqqoos;
GODAA nu Xoossay nuna
hayqqana mala pirdides;
nuni iza bolla
nagara ooththida gishshas
nu uyana mala marzera diza
haath immides.
15 ‹Saroy yaana› giidi
hidota ooththidos;
gido attiin
lo7o miishshi yibeenna.
‹Nuni paxana› giidi amottidos;
gido attiin dagama xalla gidides.
16 Morkketa para peenoy
Daane katamappe siyettees;
istta wodalla parata caashan
biittay ubbay qaaxxees;
biittayonne biittay bolla
diza ubbaa,
katamayonne izin diza ubbaa
mittanaas yida» geettes.
17 GODAY, «Be7ite,
tani marzera diza shooshshata,
muurennizayta hiillateththi
teqqanaas dandayontta
haso shooshshata
intte giddo yeddana;
istti inttena dukkana» gees.
Ermaasi Deraas Ceecida Ceece
18 Ta ceeciza wode
tana minththeththizayssoo!
Ta wozinay keehi meqqides.
19 Ta asay haaho biittan dishe
waassiza waaso siya.
Istti, «GODAY Xiyoonen deennee?
Izi kawoykka heen deennee?»
giidi waasseettes.
Histtiin GODAY izas,
«Istti baas massida misletan,
hada gidida eeqa xoossatan
tana ays hanqeththidoo?» gees.
20 Histtiin asay,
«Hekko kaththa shiishsho
wodey aadhdhides;
boneykka wurides;
nunikka attibeekko»
giidi waasseettes.
21 Ta derey madunxishin
tanikka madunxadis;
yeekkadissinne dagammadis.
22 Gala7aaden tiyiza dhaley deennee?
Woykko heen aakimey deennee?
Histtiin ta deraa madunththi
ays paxibeennee?