2Kawota Maxaafa
Giddo Qofa
Kawota maxaafa nam7anththo kifilezi koyro kifilezi eqqidasoppe doommidi Isra7eele kawo nam7ata gishshas yootees; maxaafazi nam7u waanna waanna kifiletan shaakettanaas dandayees.
1. Kirstoosi yelettanaappe kase uddufun xeetanththa layththas baggafe doommidi Samaariyay kundana wode gakkanaassinne Kirstoosa yeletappe kase 721 layththafe biidi pudeha bagga kawoteththay kundana gakkanaas diza nam7u kawota taarike (1-17).
2. Isra7eele kawoteththa kundeththaafe doommidi Kirstoosi yelettanaappe kase 586 layththan kawo Nabukadanaxoorey Yerusalaame oykkidi laallana gakkanaas diza Yuhuda kawoteththa taarike (18-25). Godoliyaasay Baabiloone kawoteththafe garsara Yuhuda dere haarizaade gididayssanne Yuhuda kawo Iyo7aakiney Baabiloonen qasho keeththafe birshettidayssa pilggi yootishe taarikeza kuuyees. Hayssi ha moorozi ubbayka Isra7eele gakkanaas dandayday Yuhuda kawoy, Isra7eele kawoynne derezi Xoossas ammanettontta aggida gishshassa. Isra7eele asaa taarikey laamettana mala gaaso gidida ayfe yo7oti Yerusalaame kundeththinne Yuhuda asaappe dariza baggata goodeteth. Kawota maxaafan nam7anththo kifilezan Eelaasappe kaallidi keehi erettida nabey Elssa7e.
Ha Maxaafay Oykkida Kumeththa Qofa
Shaakettida Kawoteththata 1:1—17:41
Nabe Eelaasa 1:1—8:15
Yuhuda kawotanne Isra7eele kawota 8:16—17:4
Samaariya kundeth 17:5-41
Yuhuda kawoteth 18:1—25:30
Hizqiyaasappe biidi Iyosiyaasa gakkanaas 18:1—21:26
Iyosiyaasa ayso 22:1—23:30
Yuhudas wurseththa kawota 23:31—24:20
Yerusalaame kundeth 25:1-30
1
Nabe Eelaasanne Kawo Akaziyaasa
1 Akaabey hayqqidaappe guye Mo7aabe derey Isra7eele dere bolla dendides.
2 He wode Akaziyaasi Samaariyan diza ba ilpinne pooqe bollafe maskootera duge kundidi sakettides; hessa gishshas izi, «Ane intte biidi ta sakoza gishshas ta paxanaakko Aqaroone eeqa xoossa Ba7aali-Zeebula taas oychchite» giidi as kiittides.
3 GODAA kiitanchchay Tesibe dere as nabe Eelaasas, «Neni dendada Samaariya kawoy kiittida asatara gayttanaas keza baada he asatas, ‹Intte Aqaroone eeqa xoossaa Ba7aali-Zeebula oychchanaas bizay Isra7eelen Xoossi baynda gishshassee?› gaada istta oychcha.
4 Hessa gishshas GODAY, ‹Ne ichchida hiixaappe dendaka; tumappe ne hayqqana› gees» gides; hessafe guye Eelaasi bides.
5 Kiitetti bida asati kawozaakko guye simmi yiin izi isttas, «Ays simmi yidetii?» gi oychchides.
6 Isttika izas, «Issaadey nunara gayttanaas yiidi GODAY, ‹Intte inttena kiitti yeddidayssako simmi biidi Aqaroone eeqa xoossaa Ba7aali-Zeebula oychchanaas neni as kiittiday Isra7eelen Xoossi baynda gishshassee? Hessa gishshas ne ichchida hiixaappe dendaka; tumappe ne hayqqana› gides» gida.
7 Kawozikka isttas, «Inttenara gayttana yiidi inttes hessaththo giday izi ay mala asee?» giidi oychchides.
8 Isttika izas, «Nuus yootidayssi iskera diza may7o may7ides; xeessan dafo danccides» gida. Kawozi isttas, «Ta iza eradis; hessi Tesibe dere as Eelaasa» gides.
9 Hessafe guye kawozi hamsa halaqaza ichchash tammu wottadaratara Eelaasakko yeddides. Hamsa halaqazi Eelaasi diza zumbulla hu7e kezidi, «Haysso Xoossa asoo! Kawoy nena haa duge wodhdha gees» gides.
10 Eelaasikka zaaridi hamsa halaqazas, «Tani Xoossa as gidikko saloppe tamay wodhdhidi nenanne nenara diza 50 asaa mo!» gides. Hessafe guye tamay saloppe wodhdhidi hamsa halaqazanne izara diza asaa ubbaa dippi histtides.
11 Kawozi qasse hara hamsa halaqanne ichchash tammu wottadarata kiittides; hamsa halaqazikka, «Haysso Xoossa asoo! Kawoy nena eeson haa wodhdha gees» gides.
12 Eelaasikka zaaridi, «Tani Xoossa as gidikko tamay saloppe wodhdhidi nenanne nenara diza 50 asaa mo!» gides; hessafe guye tamay saloppe wodhdhidi izanne izara diza asaa dippi histtides.
13 Hessa gishshas kawozi heedzdzanththo hamsa halaqazanne izara 50 as yeddides; ha heedzdzanththo hamsa halaqazi biidi Eelaasa sinththan gulbatidi, «Abeet Xoossa asoo! Ta shemppoynne hayta ne aylle ichchash tammata shemppoy ne sinththan bonchchetto.
14 Hayssafe kase saloppe wodhdhida tamay nam7u hamsa halaqatanne isttara diza asata ubbaa mides; ha7i gidikko ta shemppiya ne sinththan bonchchettu» gides.
15 GODAA kiitanchchazi Eelaasa, «Neni izara duge wodhdha; izaskka babbofa!» gides. Hessa gishshas Eelaasi izara issife kawozaakko duge wodhdhides.
16 Izi kawozas, «GODAY, ‹Neni Aqaroone eeqa xoossa Ba7aali-Zeebula ne gishshas oychchanaas asata kiita yeddiday Isra7eelen Xoossi baynda gishshassee? Neni hessa ooththida gishshas ha7i ne ichchida hiixaappe mulekka dendaka; tumu ne hayqqana› gides» giidi yootides.
17 Hessa gishshas Eelaasi izas yootida GODAA qaala mala Akaziyaasi hayqqides. Akaziyaasas attuma nay baynda gishshas Iyoosaafixe naa Iraamey Yuhuda dere bolla kawotida nam7anththo layththan iza isha Iyoraamey izasohon kawotides.
18 Akaziyaasi ba woden ooththida oosotinne izi polida oosoti ubbayka Isra7eele kawota taarike maxaafan xaafetti dees gidennee?