Mikiyaasa Tinbite
Giddo Qofa
Mikiyaasi Isayaasay diza wode diza nabe gidishin izas yeletay dugeha bagga Yuhudan kawoteththa garsan diza issi dere garsan diza kataman dees; Amoxey pudeha bagga kawoteththa bolla metoy gakkanayssa yootoyssaththo Mikiyaasikka he hanoti Yuhuda kawoteththa bolla gakkanayssa kaseti yootides. Derezi ooththiza iita hanoti pirda pace gishshas Xoossi ba pirda ehanayssa qofsides; gido attiin Mikiyaasa tinbite qaalay sinththafe hidotay dizayssa bessiza malatatakka gaththi oykkides. Harappeka lo7eththi xeellanaas bessiza kifileti Xoossa godateththa garsan kumeththa alamen saroteththi daanayssa (4:1-40), Dawite zereththafe gita kawoy yiikko derezas saroteththi imettanayssa (5:2-40) Hessaththoka kase Isra7eele nabeti yootida qaalay ubbayka issi xiqisen qashettida mala qoncciseettes; hinna he xiqiseyakka, «Izi nuuppe koyzayssa nu ooththana mala, kiyateththi kumida siiqo nu bessana malanne nuni nu godaara kumeththa ashketeththan daana malassa.» [6:8]
Ha Maxaafay Oykkida Kumeththa Qofa
GODAY ba asaa qaxxayees 1:1—2:11
Sinththara diza hidota 2:12-13
Xoossi dere kaaleththiza iitatanne wordo nabeta qaxxayana 3:1-12
Ooraththa Isra7eelen Xoossa keeth ooraththa 4:1—5:15
Isra7eeley ooththida qoho qoncceth 6:1—7:7
Derezi Xoossako simo 7:8-20
1
1 Yuhuda kawo Iyo7aatame, Akaazenne Hizqiyaasa wode Moreshete as gidida Mikiyaasakko Samaariya gishshassinne Yerusalaame gishshas yida Xoossa qaalay hayssa,
2 Intteno deretoo;
intte wurikka siyite!
Ha biitta bolla dizayti wurikka
haa ezgi siyite;
salo GODAY ba geeshsha keeththaan
uttidi intte iita oosoza
intte bolla markkattees.
Samaariya Bollanne Yerusalaame Bolla Yida Pirda
3 Hekko Xoossi ba dizasoppe yaana;
yiidikka biitta bollan
dhoqqasohon
dhoqqasohon hemettana.
4 Muqaadday tama be7idi
seeriza malanne
haaththi aafora
duge goggiza mala
he wode zumati
iza toho garsan seerana;
shoobbatikka phalqetti
wodhdhana.
5 Hessi wuri hananay Yaaqoobey ooththida mooro gishshassinne Isra7eele nayta nagara gishshassa; Isra7eele asay iita ooththanaas gaaso gididay oonee? Izis waanna katamayo Samaariya gidekkee? Yuhuda asay eeqa goynnidi nagara ooththana mala gaththiday oonee? Yerusalaame gidekkee?
6 Hessa gishshas tani Samaariya keeth laallettidasonne woyne miththi tokettizaso kessana; iza keexettida yochcha shuchcha ta duge shoobban olananne izi xapho shodda dhayssana.
7 Izi eeqati wurikka meqerettana; izi eeqa keeththan diza laymatizaytas imettidaazi wuri taman xuugettana; izi misletakka ubbaa ta dhayssana; iza baas imettidayssa layman shiishshida mala ha7ikka izis dizaazi layman ekkizaaz gidana.
Yeehonne Ceece
8 Hessa geedon tani yeekkays, wuu! Wuy gays; ta caammay baynda mela tohoninne mela kallo bays; worakana mala waassays; gutto mala waassays.
9 Izi madunththay paxonttaaz gidana; izippe aadhdhi Yuhudassara gidana; ta derey geliza penge Yerusalaame gakkides.
10 Geete deren haasayopite; yeeho mulekka yeekkofte; Beeti-Li7ofaaran gudulla bolla genderettite.
11 Intteno Shafiren dizaytoo may7oy baynda kallo Yeellatishe aadhdhite; Xa7inan dizayti heeppe kezettenna; Beeti-Ezeeley ceece bolla dawus; intteska gakki shempanaaso gidanaas dandayukku.
12 Metoppe shempanaas koshshan Maroten dizayti meton waayetteettes; hessika Yerusalaame penge gakkanaas iita metoy Xoossa achchafe yida gishshassa.
13 Intteno Laakishen dizaytoo parata gaarera gaththi oyseththite. Xiyoone macca naytas koyro nagaray inttenakko. Isra7eeles qohoy intte achchafe beettides.
14 Hessa gishshas intte Moreshet-Gates imota immana; Akiziibe katamay Isra7eele kawota baleththiza katama gidana.
15 Inttenoo Mareeshan dizaytoo! Ta inttena xoonizaade intte bolla ehana; Isra7eeles bonchcho gididaazi Adulaame ha yaana.
16 Intte isttan ufayettiza intte nayti inttefe di7etti baana gishshas intte hu7e bulusite.