Marqoosi Xaafida
Nu Godaa Yesus Kirstoosa Mishiraachcho Qaala
Giddo Qofa
Marqoosa Mishiraachcho qaalay, «Hayssi Xoossa Naa Yesus Kirstoosa Mishiraachcho qaalaas koyro» guussan doommees. Hayssa ha Mishiraachcho qaalaza giddon Yesusi oosanchchanne izi godateththara dizaade gidi shiiqides. Godateththika iza timirten, daydanththata bolla diza wolqqaninne izi asa nagara atto gidayssan erettides. Yesusi, «Nagara aylleteththafe asaa kessi ekkanaas ta shemppo asa gishshas aaththa immanaas yida Asa Nay tana» giidi barkka yootides.
Marqoosi Yesusa taarike shiishshiday qoncceninne wolqqay kumida ogera gidishin izi tishshi histti xeelliday Yesusa qaalanne iza timirteza gidontta izi ooththida gita malaata oosota. Izi xammaqiza Yohannisa gishshas, Yesusa xinqata gishshassinne izi ekkida metoza gishshas qaanththara yootidaappe guye Yesusi tamaarsida timirteza gishshassinne izi harganchchata paththidayssa birshi yootees. Yesusa kaallizayti guyeppe Yesusa lo7eththi eri eri bida mala Yesusara eqettizayti qasse Yesusa kaseppe aaththi ixxi ixxi bida. Maxaafaas wurseththa shempoti Yesusi biitta bolla de7ida wurseththa layththan wurseththa saaminttan polettida oosota, harappeka iza kaqeteththaa gishshassinne iza denththaa gishshas yooteettes.
Marqoosa Mishiraachcho qaalaas wurseththan diza nam7u kifileti issi issi maxaafatan xalla deettes.
Ha Maxaafay Oykkida Kumeththa Qofa
Mishiraachcho qaalas koyro doometh 1:1-13
Yesusi ba ooso koyro Galilan doommides 1:14—9:50
Yerusalaamen Yesusa ooso 10:1-52
Yerusalaameninne he heeran wurseththa saaminttan Yesusa gakkida meto 11:1—15:47
Hayqoppe Godaa denth 16:1-8
Hayqoppe dendida Godaa qoncceththinne pude salo buus 16:9-20
1
Xammaqiza Yohannisa Markkateth
(Mato 3:1-12; Luqa 3:1-18; Yoha 1:19-28)
1 Xoossa Naa Yesus Kirstoosa koyro Mishiraachchoy hayssa;
2 nabe Isayaasa baggara,
«Hekko nees oge lo7eththanaas
ta kiittanaade
neeppe sinththara yeddana.
3 ‹Godaas oge giigsite;
izi baana oge suurisidi ooththite›
gishe bazzo biittan
waassiza giiris»
geetetti xaafettides.
4 Hessaththoka Xammaqiza Yohannisi asaa xammaqishe, «Intte nagarappe simmidi xammaqettite, Xoossi intte nagara atto gaana» gi awajjishe bazzora kezi wodhdhides.
5 Yuhuda derey kumeth Yerusalaame asay wuri Yohannisakko bi biidi ba nagara nagara paaxi paaxi Yordaanoose Shaafan Yohannisa kushen xammaqettides.
6 He wode Yohannisi may7izay gaamella iskefe oosettida may7o; qasse ba xeessan dafo gixxees; izi miza qumay boolenne degera eessa.
7 Izi, «Tani hokkada iza caamma qasho birshanaas bessonttaadey, taappe aadhdhizaadey taappe guyera yaana.
8 Tani inttena haaththan xammaqays; izi gidikko inttena Xillo Ayanan xammaqana» gi sabbakides.
Yesusa Xammaqeteththinne Paaceteth
9 He wode Yesusi Galila giddon diza Naazirete geetettiza katamayppe Yordaanoose Shaafa yiidi Yohannisa kushen xammaqettides.
10 Yesusi xammaqettidi haaththaafe kezida mala saloy doyettiin Xillo Ayanay iza bolla haraphphe misatidi wodhdhishin be7ides.
11 Qasseka, «Ta dosiza Nay nena, nenan ta ufayettays» giza qaala giirissi pude saloppe seetettides.
12 Heerakka Xillo Ayanay iza duge bazzo kaaleththi efides.
13 Heen bazzonkka oyddu tammu gallas gakkanaas Xala7era paacettishe gam7ides; do7atara issife de7ides; kiitanchchatikka iza maaddida.
Yesusa Kaallana Mala Oyddu Asata Xeygeteth
14-15 Yohannisi qasho keeth gelidaappe guye Yesusi Xoossa Mishiraachcho qaalaa sabbakishe Galila biidi, «Wodey gakkides; Xoossa Kawoteththi matides; nagarappe simmite; Mishiraachcho qaalan ammanite» giidi sabbakides.
16 Yesusi Galila abbaa achchara aadhdhiin Simooninne iza isha Indiraasi mole oykkizayta gidida gishshas istti mole oykkiza gite abban yeggishin be7ides.
17 Yesusi istta, «Haa yiite! Tana kaallite; intte mole oykki shiishshiza mala ta inttena as oykkizayta ooththana» gides.
18 Istti heerakka mole giteza yeggi aggidi Yesusa kaallida.
19 Guuth gede sinththe aadhdhidi Zabdoosa naa Yaaqoobeynne iza isha Yohannisi wogolon uttidi mole gite giigsishin be7idi heerakka istta xeygides.
20 Isttika ba aawaa Zabdoosanne izas qaxxaretti ooththiza asatara issife wogoloza giddon aggidi Yesusa kaalli bida.
Yesusi Paththida Tuna Ayanay Iza Bolla Dizaade
21 Heeppeka Qifirnahoome bida. Heerakka Yesusi Ayhudata Sambata gallas Ayhudata Woosa Keeth gelidi tamaarso oykkides.
22 Xaafeta mala gidontta godateththara diza asa mala izi tamaarsiin asay wuri iza timirtezan malalettides.
23 He wode Ayhudata Woosa Keeththan tuna ayanay iza bolla diza issaadey,
24 «Naazirete Yesusa ne nuuppe ay koyay? Nuna dhayssana yadii? Ne oonakko ta nena erays; neni Xoossa geeshshaza» giidi waassides.
25 Yesuska tuna ayanaza, «Co7u gaada izappe keza!» gi hanqides.
26 Tuna ayanay addeza genderisidi izi qakettishin izappe waassishe kezides.
27 Derey wuri, «Aso hayssi aaza palaa? Hayssi godateththara diza ooraththa timirte; tuna ayanatakka azazees; isttika izas azazetteettes» gi malalettishe asay ba giddon issoy issaa oyshechcho oykkides.
28 Heerakka iza ooso worey Galila yuushon diza dere ubbaan siyettides.
Yesusi Daro Harganchchata Paththides
29 Ayhudata Woosa Keeththafe kezida mala Yaaqooberanne Yohannisara issife gede Simoonasonne Indiraasaso gelida.
30 Hee gelida mala Simoona bolloteya misha harge sakettada ichchidayssa izas yootida.
31 Hessa gishshas Yesusi izikko shiiqidi izi kushe oykki denththides. Mishay aggiin iza dendada istta mokkadus.
32 Arshey wullidaappe guye gadey dhumishin asay harganchchatanne daydanththi oykkida asaa wursi Yesusaakko ekki yides.
33 He katamayin diza asay wuri keeththa karen shiiqides.
34 Izikka dumma dumma hargen sakettidayta darota paththides; daro daydanththatakka kessides; gido attiin daydanththati Yesusi oonakko eriza gishshas istti haasayana mala Yesusi koyibeenna.
Yesusi Galilan Tamaarsida Mishiraachcho Qaala
35 Bazzoy zo7ontta Yesusi maalado wonttara dendidi asi bayndaso biidi heen woosa oykkides.
36 Simooninne izara dizayti Yesusa koyana kezi bida.
37 Istti iza demmidi, «Asi wuri nena koshshan dees» gida.
38 Yesusikka, «Ta yiday tamaarsanaas gidida gishshas Mishiraachcho qaala yootanaas matan diza gutata ane boos» gides.
39 Hessa gishshas Ayhudata Woosa Keeththan geli geli sabbakishenne daydanth kessishe Galila katama kumeththaan yuuyides.
Yesusi Inchchirachcha Hargizaade Paththides
40 Issi inchchirachcha hargizaadey Yesusaakko shiiqidinne iza sinththan gulbatidi, «Ne shene gidikko ne tana paththana dandayaasa» gi woossides.
41 Yesusikka addezas mishettidi ba kushe yeddi iza bochchidi, «Ne paxana mala ta koyays; paxa!» gides.
42 Heerakka addeza inchchirachcha hargey aggiin addezi paxides.
43-44 Yesusikka addezas, «Oonaska hayssa ne yootontta mala naagetta; gido attiin baada qeeses nena bessa. Derezas markka gidana mala ne paxidayssas Musey azazida yarsho shiishsha» giidi keehi minththi yootides.
45 Gido attiin addezi kezi biidi ba bida ubbason wore darssi dharccides. Hessa gaason Yesusi ay katamankka qonccera gelanaas dandaybeenna. Hessafe dendidayssan katamaappe karera asi bayndason duus oykkides. Asay gidikko dumma dummasoppeka izakko yides.