Matoosi Xaafida
Nu Godaa Yesus Kirstoosa Mishiraachcho Qaala
Giddo Qofa
Matoosa Mishiraachcho qaalay, Yesus Kirstoosi buroppe yaanayssa sinththasidi iza gishshas yootettida dere ashshanadey iza gididayssanne Xoossi kase Gal7a Caaqo Maxaafan ba derezas immida hidota qaala kunththiday iza baggara gididayssa yootiza Mishiraachcho qaalara dees. Hessika he Mishiraachcho qaalay, Yesus Kirstoosi istta giddon yeletti diccida Ayhuda asas xalala gidontta alame asas kumeththassa.
Matoosa Mishiraachcho qaalay, daroppe naageteththan giigettida maxaafa. Maxaafazi koyroppe Yesusas yeleta gishshas yooto doommidi iza xinqata gishshassinne izi paacettida paaceza lo7eththi yootidaappe guye izi Galila deren sabbakidayssa, tamaarsidayssanne asa hargefe paththidayssa qonccisees. Qasseka Yesusi Galila dereppe Yerusalaame bidayssa, izi hayssa ha alameza bolla de7ida de7o gishshassinne ha alameza bolla gam7ida wurseththa layththan wurseththa saaminttan hanida hanota gishshas yootees. Heytikka Yesusi kaqettidayssa, hayqqidayssanne hayqoppe dendidayssa.
Ha Mishiraachcho qaalazi, Yesusi Xoossa woga birshanaas izas godateththi dizaadenne Xoossa Kawoteththa gishshas tamaarsiza gita astamaare histti shiishshees. Iza timirtezappe dariza baggay ichchashu dumma dumma kifilen shaakettees.
1. Xoossa Kawoteththan dizayta hano, istta ooso, istta shene, istti hanana mala isttas bessizaazinne isttas bessiza wurseththa exa shaakki erisiza zuma bolla sabbakida qaala (shempo 5-7)
2. Tammanne nam7u iza ashkarati Mishiraachcho qaala yootanaas kiitetti bishin isttas imettida wogata (shempo 10)
3. Xoossa Kawoteththa gishshas shiiqida dumma dumma leemisota (shempo 13)
4. Yesusa wostti kaallanaakkon isttas gelana mala imettida timirte (shempo 18)
5. Hayssa ha wodeza wurseththa gishshassinne Xoossa Kawoteththay yaanayssa gishshas imettida timirte (shempo 24-25)
Ha Maxaafay Oykkida Kumeththa Qofa
Yesus Kirstoosa yeleta zarkkenne iza yeleta 1:1—2:23
Xammaqiza Yohannisa ooso 3:1-12
Yesusa xammaqeteththinne iza paaceteth 3:13—4:11
Yesusi Galilan ooso doommides 4:12—18:35
Yesusi Galilappe Yerusalaame buus 19:1—20:34
Wurseththa saaminttan Yesusa gakkida metota 21:1—27:66
Yesusi hayqoppe dendi beettides 28:1-20
1
Yesus Kirstoosa Yeleta Zarkke
(Luqa 3:23-38)
1 Dawite naa, Abrahaame naa gidida Yesus Kirstoosa yeleta zarkkey hayssafe kaallizayssa;
2 Abrahaamey Yisaaqa yelides; Yisaaqi Yaaqoobe yelides; Yaaqoobey Yuhudanne iza ishata yelides;
3 Yuhuday Timaarippe Faareesenne Zaara yelides; Faareesey Esroome yelides; Esroomey Aaraame yelides;
4 Aaraamey Aminadaabe yelides; Aminadaabey Ne7asoone yelides; Ne7asooney Solomoone yelides;
5 Solomooneykka Boo7eeze Eraabippe yelides; Boo7eezey Urutippe Iyoobeede yelides; Iyoobeedey Isseye yelides;
6 Isseyey kawo Dawite yelides; Dawiti Ooriyo machcheyfe Solomoone yelides.
7 Solomooney Erobi7aame yelides; Erobi7aamey Abbiya yelides; Abbiyayka Aasaafe yelides;
8 Aasaafey Iyoosaafixe yelides; Iyoosaafixey Iyoraame yelides; Iyoraamey Ooziya yelides;
9 Ooziyay Iyo7aatame yelides; Iyo7aatamey Akaaze yelides; Akaazey Hizqiyaasa yelides;
10 Hizqiyaasi Minaase yelides; Minaasey Amoxe yelides; Amoxey Iyosiyaasa yelides;
11 Iyosiyaasi Baabiloone di7o layth Ikoniyaanenne iza ishata yelides.
12 Baabiloone di7oppe guye Ikoniyaaney Salatiyaale yelides; Salatiyaaley Zerubaabele yelides;
13 Zerubaabeley Abiyoode yelides; Abiyoodey Elyaaqeeme yelides; Elyaaqeemey Azaare yelides;
14 Azaarey Saadooqe yelides; Saadooqey Aakime yelides; Akimey Eliyoode yelides;
15 Eliyoodey Alazaare yelides; Alazaarey Maataane yelides; Maataaney Yaaqoobe yelides;
16 Yaaqoobeykka Kirstoosa geetettidayssa Yesusa yelida Maaramo ekkana giigsida Yooseefe yelides.
17 Hessa gishshas Abrahaameppe yiidi Dawite gakkanaas tammanne oyddu yeleteth; qasse Dawiteppe Baabiloone di7o wode gakkanaas tammanne oyddu yeleteth; Baabiloone di7oppe Kirstoosa yeleta gakkanaas tammanne oyddu yeleta gidees.
Yesus Kirstoosa Yeleta
18 Yesus Kirstoosa yeleta taarikey hayssafe kaalli dizayssa; iza aayo Maarama Yooseefes giigetta dishin izi izira gayttontta Xillo Ayanan qanththatada beettadus.
19 Izo giigsida Yooseefey xillo as gidida gishshas Maaramo asa sinththan qoncce kessontta qotara agganaas ba wozinara qachchides.
20 Hayssa izi qoppishin Xoossa kiitanchchay agumora izas qonccidi, «Dawite naa Yooseefe! Ne giigsida Maarama qanththatiday Xillo Ayanan gidida gishshas izo neso efanaas babbofa.
21 Iza attuma naa yelana; izi as nagarappe ashshanaade gidida gishshas iza sunth ne, ‹Yesusa› ga sunththana» gides.
22-23 Goday nabe Isayaasa doonan, «Hekko! Geela7oy qanththatana; attuma naakka yelana; naaza sunththayka Amanu7eele geetettana; hessa birsheththika, ‹Xoossi nunara dees› geetettidi xaafettidayssi polettana mala hayssi wurikka hanides» gides.
24 Yooseefeykka dhiskofe beeggidi Godaa kiitanchchay iza azazida mala Maaramo baso efides.
25 Gido attiin baada iza koyro naaza yelana gakkanaas izo ekkibeenna. Yelettida guuththa naaza sunththaa, «Yesusa» gides.