4
Yesusi Paacettides
(Mar 1:12-13; Luqa 4:1-13)
1 Hessafe guye Xillo Ayanay Xala7en paacettana mala Yesusa duge bazzo biitta efides.
2 Oyddu tammu gallassinne oyddu tammu qamma xoomidaappe guye Yesusi gafides.
3 Paaccizayssi Yesusaakko shiiqidi, «Ne Xoossa Naa gidikko ane hayta shuchchata uketh gidana mala azaza» gides.
4 Yesusikka, « ‹Asi Xoossa doonappe keziza qaalanppe attiin kaththan xalla deenna› geetetti xaafettides» giidi izas zaarides.
5 Qasseka Xala7ey Yesusa geeshsha katamayo efi Xoossa Keeththa qustte bolla kessidi,
6 «Ne Xoossa Naa gidikko ane hayssafe duge guppa; ays giikko
« ‹Ne tohoy shuchchan dhuphettontta mala
kiitanchchati ba kushera nena
oykki denththana mala ne gishshas
Xoossi ba kiitanchcha kiittana›
geetetti xaafettides» gides.
7 Yesusikka, «Geeshsha Maxaafan, ‹GODAA ne Xoossaa paaccofa› geetetti xaafettides» giidi zaarides.
8 Qasseka Xala7ey Yesusa keehi dhoqqa zuma bolla kessidi salo gufanththon diza kawoteththa bonchchozara ubba ehi bessidi,
9 «Ne kundada taas goynniko hayssa ubbaa ta nees immana» gides.
10 Yesusi, «Haysso Xala7e! Ta sinththafe ne haakka! ‹Neni Godaa ne Xoossaas goynna; izas xalala azazetta› geetetti Geeshsha maxaafan xaafettides» gides.
11 Hessafe Xala7ey iza aggidi bides; kiitanchchatikka yiidi iza maaddida.
Yesusi Sabbako Doometh
(Mar 1:14-15; Luqa 4:14-15)
12 Yesusi, Yohannisi qashettidayssa siyidi gede Galila simmides.
13 Naazirete katama aggidi Zaabiloone Niftaaleme heeran abba matan diza Qifirnahoome kataman duus oykkides.
14-16 «Hessan Zaabilooneninne Niftaaleme biittan,
«Yordaanooseppe he pinththan
abba lanqera efiza
oge matan diza
Ayzaabe gidida Galila dere asay,
dhuman diza derey
wolqqama poo7o be7ides.
Hayqo kuwa giddon diza deres
poo7oy poo7ides»
geetettidi nabe Isayaasa doonan kasetidi haasayettidayssi polettides.
17 Yesusi he wodeppe haa simmiin, «Salo kawoteththi matides; maarotan gelite» giidi sabbako oykkides.
Koyro Yesusa Kaallidayta Xeygeteth
(Mar 1:16-20; Luqa 5:1-11)
18 Yesusi Galila Abba lanqera aadhdhishe nam7u ishantta, heytikka Phexroosa geetettiza Simoonanne iza isha Indiraasa be7ides. Isttika mole oykkizayta gidida gishshas mole oykkiza gite abban yeggishe deettes.
19 Yesusi istta, «Haa yiite! Tana kaallite! Ta inttena as oykkiza as kessana» gides.
20 Istti heerakka mole oykkiza giteza yeggi aggidi Yesusa kaallida.
21 Guuth sinththe bishe hara nam7u ishantta Zabdoosa naa nam7ata Yaaqoobenne Yohannisa be7ides; isttika ba aawa Zabdoosara wogolo giddon mole gite lo7eththeettes. Yesusikka istta xeygiin
22 istti heerakka wogolozanne ba aawaa aggidi iza kaallida.
Yesusi Hargizayta Paththides
(Luqa 6:17-19)
23 Yesusi Ayhudata istta Woosa Keeththan tamaarsishenne kawoteththa Mishiraachcho qaala sabbakishe qasse dere giddon ay hargeyka sakkizayta paththishe kumeththa Galilan yuuyides.
24 Hessa gaason lo7o nashoy kumeththa Sooriya biittan siyettides; dereykka dumma dumma sakon daro waayettizayta, daydanththi isttan gelidayta, biicco hargey dizaytanne silidayta izakko ehiin ubbaaka paththides.
25 Hessafe dendidayssan Galilappe, tammu katamatappe, Yerusalaameppenne Yuhudappe, Yordaanoose shaafa pinththafe yida daro asay iza kaallides.