Nahimiya
Giddo Qofa
Nahimiya maxaafay heedzdzu kezi shaakettanaas dandayees.
1. Yuhuda dereza ayssanaas Paarise kawoy yeddida Nahimiyay kaaleththiin Yerusalaame gimbetti ooraxidayssa yootees; hessafekka Nahimiyay ayana yo7otanne asho yo7ota ooraththides.
2. Xoossa woga maxaafa Izray nababidayssa, derezi ba nagara paaxidayssa ha maxaafazi yootees.
3. Nahimiyay Yuhuda dere ayssishe izi ooththida hara hara oosotakka ha maxaafazi yootees. Iza maxaafazan keehi qonccen beettizay Nahimiyay Xoossan ammaniza mino ammanonne izi Xoossaako shiishshida woosata gishshas yootiza taarike.
Ha Maxaafay Oykkida Kumeththa Qofa
Kawo Arxekisisi Nahimiya Yerusalaame yedo 1:1—2:10
Yerusalaame gimbey nam7anththo simmi gimbeteth 2:11—4:22
Manqotas Nahimiyay qoppida qofa 5:1-19
Morkkey iza bolla dendishinkka gimbeza gimbeteth 6:1-3
Di7eteththafe simmidayta 7:4-73
Izray Xoossa wogaa deraas nababiin asay daase ba7aale bonchchida bonchcho 8:1-18
Derezi ba nagara paaxeth 9:1-37
Asay Xoossa wogas azazettanaas dosi wule paramides 9:38—10:39
Yuhudaninne Yerusalaamen diza asata 11:1-36
Di7eteththafe simmida qeesetanne Lewe zarkketa 12:1-26
Nahimiyay Katama gimbeza anjjiseth 12:27-47
Nahimiyay ehida laame 13:1-31
1
Nahimiya Woosa
1 Hakaaliya naa Nahimiyay haasayda qaalay hayssafe kaalli dizayssa; Arxekisisi Paarise deren kawotida nam7u tammanththa layththan kisoole geetetti xeygettiza aginan ta Nahimiyay waanna katama Suusan days.
2 Ta ishatappe issi Hanaaniya geetettizayssi hara asata kaaleththidi Yuhudappe taakko yides; tani istta Yerusalaame gishshassinne di7ettidi Baabiloone bontta heen attida asaa gishshas oychchadis.
3 Isttika taas, «Di7ettidi Baabiloone biitta bontta attida Ayhudati gita metoninne waaye giddon deettes; Yerusalaame gimbetti laalettidi kundida; qasse gimbeza gordiza pengeti taman xuugettida» gida.
4 Hayssa ubbaa siyidaappe guye uttada yeekkadis; daro gallas xoomaninne muuzoteththan gam7ada Xoossaa hizga woossadis,
5 «Salo GODAWU! Nena dosizaytaranne ne azazo naagizaytara mernaas neni ne caaqo qaala naagiza gitanne yashissiza Xoossa.
6 Xoossawu! Ne aylle gidida Isra7eele asaas kiyana mala gallassinne omars ta woossiza woosa siya; tanakka qoppa; nuni Isra7eele asay ooththida nagara tani nees paaxays; tumappe taninne kase nu aawati nagara ooththidos.
7 Neni ne aylle Muses immida azazozanne wogaza nuni naagontta aggida gishshas nena qohidos.
8-9 «Ne Muses, ‹Intteno Isra7eele asawu! Intte tana ammanon kaallontta aggiko tani inttena kawoteththata giddon laallana; gido attiin intte taakko simmidi ta azazo polizaa gidikko ta inttena biitta gaxan intte laalettidaa gidikkoka ta sunththay xeygettana mala ta dooridaso shiishshada zaara ta ehana› gaada yootida qaala qoppa.
10 «Xoossawu! Hayti hayssafe kase neni ne gita wolqqaninne mino qesen wozzida ne oosanchchatanne ne dereta.
11 Godawu! Ha7ikka ta woossiza woosaa siya; nena dosidi bonchchana koyza oosanchchata woosa ezga; qasse hayssa kawoza sinththan taas teemateth immada hach tani ne oosanchchazi ooththana koyzayssa taas polisa.»
Tani he wode kawoson woyne ushshu gaseththiza asa.