Nahome Tinbite
Giddo Qofa
Nahomey beniisofe Isra7eele asaas wolqqama morkke gidida Asoore waanna katama Nannawe dhayo gishshas yootiza ginxo. Nannawey Kirstoosi yelettanaappe kase laappunththa xeetu layththas wurseththa bolla iza dhayanayssa, Xoossi menxe iita dere bollanne otoranchchata bolla pirdanayssa bessees.
Ha Maxaafay Oykkida Kumeththa Qofa
Daro yashshiza Xoossa hanqo 1:1-6
Asoore bolla aadhdhida pirday Isra7eele deraas hidota gideth 1:7-15
Asoore waanna katama Nannawe dhayo 2:1—3:19
1
1 Elqoshe dere as Nahomey Nannawe dhayo gishshas yootida ajjuuta maxaafay hayssafe kaallizayssa.
Nannawe Bolla Qonccida Xoossa Hanqo
2 GODAY zil7ettizanne
halo kessiza Xoossa;
GODAY halo kessizanne
hanqon kumida Xoossa.
GODAY halo kessizaadenne
pala miishshi izan kumidaade.
GODAY ba baalgaarata bolla
halo kessees;
ba morkketa bolla
ba hanqo ehees.
3 GODAY hanqettanaas eesotenna;
iza wolqqayka gita.
GODAY mooranchcha
qaxxayontta aggenna;
gote carkoynne abba dambalay
izas oge;
shaaray iza toho gudulla.
4 Abba seeridi melissees;
Shaafata ubbaa micinchchees.
Baasaaneynne
Qarmeloosey shullida.
Libaanoose ciishshatikka
qoqofettida.
5 Zumati iza sinththan kokkorida;
zumbullatikka seerida.
Iza sinththan biittay, alameynne
izin diza ubbati qaaxxida.
6 Iza hanqora eqettana
dandayzay oonee?
iza hanqo minoza
tookkana dandayzay oonee?
Iza hanqoy tama mala eexxides;
zaallatikka iza sinththafe za7ida.
7 GODAY lo7o;
meto gallassika qotetti attizaso.
Izan ammanettizayta naagees.
8 Gido attiin izi Nannawe
wolqqama di7o haaththan
dhayssana;
ba morkketa dhumay
dizaso yedeththana.
9 Istti Xoossa bolla ay duulatikkoka
izi istta dhayssana.
Metoy nam7anththo dendenna.
10 Istti agunththan qaxettana;
ba woyne ushshan
istti maththottana;
tamay istta buuxa mala maana.
11 Hanne Nannawe!
GODAA bolla iita duulatizaytinne
iita zore zorettizayti
ne garsafe beettida;
12 GODAY, «Istti ay wolqqamatanne
darota gidikkoka
istti qanxxetti dhayana.
Haysso Yuhuda neni hayssafe kase
ta nena un7eththidaa gidikko
hayssafe guye
ta nena un7eththike.
13 Ha7ikka ta istta qambara
ne morgefe menththa diggana;
ne izan qashettida sansalatakka
duuththa yeggana» gees.
14 Hanne Nannawe GODAY nena,
«Hayssafe sinththan ne sunth
xeygiza yeletay deenna.
Ne eeqa xoossata keeththan diza
masetti giigida misletanne
seerisi giigsida
eeqa xoossata dhayssana;
ne iita gidida gishshas
ne moogettanaaso
ta bookkana» gees.
15 Hekko mishiraachcho yootizayssi,
saroteth awajjizayssi
zumaa bollara
yuussan dees.
Yuhuda ne ba7aaleta bonchcha;
ne adinettidayssa gaththa;
hayssafe guye iitati
ne dere worajjettenna;
istti mulera dhayana.