Taybo Maxaafa
Giddo Qofa
Taybo maxaafay Isra7eele asay Siina zumaappe boosoppe doommidi Xoossi isttas immanaas caaqqida mala arshey mokkiza baggara diza dhassaako matana gakkanaas hanida 40 layththa hano yootees. Ha maxaafaza sunththi maxaafaza giddon xaafettida ayfe yo7o bessees. Ha maxaafay heedzdzu ayfe yo7otan shaakettees; koyrozi Isra7eele asay Siina zumaa yeddi baanaappe kase hessaththoka issi yeletappe guye Yordaanoose shaafaappe arshey mokkiza baggara diza Mo7aaben Musey dereza qoodidayssa bessees (1:1—10:10). Nam7anththozi derey nam7uto qoodettidayssa garsan Isra7eele asay dugeha baggara diza Kanaane dhas gidida Qaadeese Barine gakkides; gido attiin isttas hidotay imettida dereyo gelanaas dandaybeettenna; hessa gishshas istti heen daro layth gam7idaappe guye Yordaanoose shaafappe arshey mokkiza baggara diza dere bidayssa bessees (10:11—21:20). Heedzdzanththozi bagga derezi heen daanaas qachchiin hankko attida derey Yordaanoose shaafappe gede pinnidi Kanaane baanaas giigettidayssa bessees (21:21—36:13). Taybo maxaafay yootizay daro wode metoy istta bolla gakkishin babbizaytanne hidota qanxxizayta, Xoossa bollanne istta kaaleththanaas Xoossi isttas doorida Muse bolla makkalliza dereta gishshassa; derezi azallanne makkalla gidikkoka Xoossi asaa lo7eththi al7ison oykkidayssi taarikezan qonccides; hessaththoka issi issito Muses dandayay dhaykkoka izas mino ammanoy diza gishshas izi Xoossassinne derezas ammaneteththan ooththidayssi qonccides.
Ha Maxaafay Oykkida Kumeththa Qofa
Siina zumaappe dendidi baanaas Isra7eele asaa giigeteth 1:1—9:23
Derezi dendanaappe sinththan qoodettides 1:1—4:49
Dumma dumma wogatanne maarata 5:1—8:26
Paaziga ba7aale nam7anththo bonchcho 9:1-23
Siina zumaappe Mo7aabe dere buus 10:1—21:35
Mo7aabe deren polettida hanota 22:1—32:42
Gibxeppe Mo7aabe dere gakkanaas buus 33:1-49
Yordaanoose shaafaa pinnanaappe kase imettida azazota 33:50—36:13
1
Isra7eele Asaas Koyro Qoodeteth
1 Isra7eele asay Gibxeppe kezida nam7anththo layththan nam7anththa aginay doommida koyro gallas istti Siina bazzon dishin GODAY Gaytoteththa Dunkaane giddon Musera gayttidi,
2 «Attumasaa issaa issaa sunththan sunththan xaafada Isra7eele asaa qommon qommoninne zarkken zarkken qooda.
3 Neninne Aarooney isttas layththay nam7u tammunne izappe bollara diza oletti dandayana attumasata istta maaran maaran qoodite.
4 Dumma dumma zarkketappe istta kaaleththiza isttas aawatiza korapinneti inttenara gidetto.
5 Inttena maaddanayta sunththi hayssafe kaalli dizayta, Oroobeele zarkkefe Shaadure naa Elxuure,
6 Simoona zarkkefe Xurshadaye naa Salum7eele,
7 Yuhuda zarkkefe Aminadaabe naa Ne7asoone,
8 Yisakoore zarkkefe Xu7aare naa Natina7eele,
9 Zaabiloone zarkkefe Heloone naa Elyaabe,
10 Yooseefe naytappe Efreeme qommoti Amihuude naa Elshama Minaase naytappe Pedaxuure naa Gamal7eele,
11 Biniyaame zarkkefe Gidi7oone naa Abidaane
12 Daane zarkkefe Amishadaye naa Ahi7ezeere,
13 Aaseere zarkkefe Okra naa Fagu7eele,
14 Gaade zarkkefe Da7u7eele naa Elyaasaafe,
15 Niftaaleme zarkkefe Enaane naa Ahire» gi yootides.
16 Maabaraa garsafe zarkkefe zarkkefe Isra7eele asaa kaaleththanaas doorettida korapinneti haytantta.
17 Museynne Aarooney hayta bantta sunththan xaafettidayta ekkida.
18 Nam7anththo aginay doommida koyro gallas maabaraza kumeth issi bolla shiishshidi zarkken zarkkeninne dabbon dabbon shiishshidaappe guye dereza qoodida; yelettiin layththay nam7u tammu kumidaytanne hessafekka bollara gidida attumasaa istta sunththan sunththan mazgabi qoodida.
19 Hessaththoka Musey GODAY azazida mala Siina bazzon dereza qoodides.
20 Ola olettanaas dandayzayta layththay nam7u tammaanne hessafekka bollara dizayti bantta zarkkefe zarkkefe qoodettida; addeta qooday hayssafe kaallizayssa;
21 Oroobeele zarkkefe 46,500,
22-23 Simoona zarkkefe 59,300,
24-25 Gaade zarkkefe 45,650
26-27 Yuhuda zarkkefe 74,600,
28-29 Yisakoore zarkkefe 54,400,
30-31 Zaabiloone zarkkefe 57,400,
32-33 Yooseefe naa Efreeme zarkkefe 40,500,
34-35 Yooseefe naa Minaase zarkkefe 32,200,
36-37 Biniyaame zarkkefe 35,400,
38-39 Daane zarkkefe 62,700,
40-41 Aaseere zarkkefe 41,500,
42-43 Niftaaleme zarkkefe 53,400.
44 Musey, Aarooneynne tammanne nam7u Isra7eele zarkketa korapinneti qoodida attuma asay haytantta;
45 olas baana dandayza addeti ubbay isttas layththay nam7u tammanne hessafekka bollara dizayti ba zarkken zarkken qoodettida.
46 Heyta qooday issi bolla 603,550 gidides.
47 Gido attiin hankko zarkketara Lewe zarkketi qoodettibeettenna.
48 Kase GODAY Muses,
49 «Ne Isra7eele attuma asaa qoodashe Lewe zarkketa isttara gaththa qoodoppa.
50 Lewe zarkketi gidikko Gaytoteththa Dunkaanenne iza giddon go7ettiza miishshaa bolla alaafeteth imma; istti Dunkaanezanne iza giddon go7ettiza miishshata ubbaa tookketto; dunkaana giddon ooththetto; iza yuushon dunkaani uttetto.
51 Intte kase dunkaani dizasoppe dendi biza wode Lewe zarkketi xalala Dunkaaneza shoddi laallidi istti shempiza ooraththason isttaka tokketto; isttafe attiin dunkaanaakko shiiqiza ay asikka hayqon qaxxayetto.
52 Hankko attida Isra7eele asay ba butten butteninne ba diza gutan gutan ba bandira bandira tokketto.
53 Gido attiin ay asikka dunkaanaakko shiiqidi tana hanqeththidi Isra7eele deraa dhaysisontta mala Lewe zarkketi he Dunkaaneza yuushon dunkaanidi naagetto» gides.
54 Hessa gishshas Isra7eele asay GODAY Muse azazida mala ubbaaka ooththida.