Phexroosi
Xaafida Koyro Kiita
Giddo Qofa
Hawaare Phexroosi xaafida koyro kiitaza giddon, «Xoossas doorettida dere» geetetti xeygettizaytassinne pudeha baggara qeeri Iisiya deren laaletti diza ammanizaytassa. He kiitaas waanna qofay ammano gaason daro metoynne goodeteththi istta bolla gakkidayta minththeththanaassinne denththeththanaasko. Xaafezi hessaththo ooththiday Yesusa hayqo gishshas, hayqoppe denththa gishshassinne izi nam7anththo haa simmi yaana yuussaa hidota qonccisiza Yesus Kirstoosa Mishiraachcho qaalaa nababizayta qofsanaassa. Yesus Kirstoosi kase deyida duussaa leemiso mala xeellidi isttika meto gencci aaththanaas bessizayssa qofsees. Heytara ubbaa gaththidi metoy istta ammano minoteth paaccizayssanne Yesus Kirstoosi qoncciza gallas istti baas bessiza waaga ekkanayssa istta qofsees.
Xaafezi istti meto dandayana mala istta minththeththofekka bollara hessa nababizayti Kirstoosa kaallizayti de7anaas bessiza duus daana mala qofsees.
Ha Maxaafay Oykkida Kumeththa Qofa
Geloso 1:1-2
Xoossi ashshizaade gididayssa eriso 1:3-12
Xoossas dummati daana mala imettida zore 1:13—2:10
Meto wode ammanizayta alaafeteth 2:11—4:19
Ammanizayta ashketeththinne istta ooso 5:1-11
Kuushsha qofa 5:12-14
1
1 Yesus Kirstoosa Hawaare gidida Phexroosappe, asa biittan beten dizaytas Phanxoosan, Galatiyan, Qophodooqiyan, Iisiyaninne Bitiniya biittan laaletti diza inttes,
2 Aaway Xoossi kase inttena erida mala doorettidaytas, Yesus Kirstoosas azazettanaassinne intte iza suuththan aracettidi geeyana mala Xillo Ayanan dummatida inttes kiyateththinne saroteththi daro.
Gita Hidota
3 Yesus Kirstoosi hayqoppe dendida gishshas nuus de7o gidida hidota immidayssi ba gita maaroteththan nuna baas ooraththa nayta histtida nu Godaa Yesus Kirstoosa Aaway Xoossi galatetto.
4 Izi dhayontta, moorettonttanne ceeggontta laataso inttes salon giigsi woththides.
5 Intteka wurseththa gallassan buro qonccana atoteththaas ammano gaason Xoossa wolqqan naagettideta.
6 Ha7i guuththa wodes dumma dumma paacetti inttena waayisikkoka intte hessan ufayettite.
7 Hessi he paacezi intte bolla gakkizay intte ammanozi tumu gididayssa qonccisanaassa. Dhayana worqqayka taman paacettees; worqqafe aadhdhi bonchcho gidida intte ammanoykka hessaththo paacettanaas bessees. Hessi paacettida intte ammanoy Yesus Kirstoosi qoncciza gallas galatas, bonchchossinne sabas inttena gaththana.
8 Intte Yesus Kirstoosa ayfera be7ontta aggikokka intte iza doseeta; ha7ikka intte iza be7ontta aggikokka iza ammaneeta; coo qaalan qonccisana dandayontta gita bonchcho ufays intte ufayetteeta.
9 Intte naagiza intte shemppoys atoteth intte ammanon demmideta.
10 He atoteththaza gishshas inttes imettana kiyateththaas kase nabeti lo7eththi wozinappe pilggi xeellida.
11 Kase isttan diza Kirstoosa Ayanay Xoossafe tiyettidayssa bolla gakkana waayezanne he waayezappe guye izi demmana bonchchoza gishshas kase baas woththides; istti qasse hessi wurikka ayde waani hananaakko yuushshi qoppida.
12 He kase nabeti inttes ooththida attiin istti baas ooththonttayssi isttas qonccen erettides. Istti inttes ooththiday bolla saloppe kiitettida Xillo Ayana baggara ha7i inttes Mishiraachcho qaala yootida asati inttes yootidayssa qonccisanaassa; hessa he qaalaa kiitanchchatikka beyanaas amottida.
Xoossas Dummati Duus
13 Hessa gishshas intte intte wozina suurisidi oosos giigettite; wogara de7ite. Yesus Kirstoosi qoncciza wode intte iza kiyateththaa demmanaas inttes kumeththa hidotay de7o.
14 Intte azazettiza nayta gididi erontta dishe intte kase izan diza iita qofaa kaallofte.
15 Inttena xeygida Xoossay dumma gidida mala intteka intte duussan ubbaan dummatite.
16 Gaasoykka, «Tani geesh gidida gishshas intteka geesh gidite» geetetti Geeshsha Maxaafan kase xaafettides.
17 Oonakka dumma shaakki maaddontta issaas issaas izaade ooso mala pirdiza Xoossaa, «Izi nu Aawaa» giidi intte xeygikko hayssa alamezan intte imaththenne bete as gididi diza wode ubbaan izas babbite.
18 Intte kase intte aawatappe laattida hada duussaafe wozzettiday dhayza biran woykko worqqan gidonttayssa intte ereeta.
19 Gido attiin intte wozzettiday iitaynne wosoy iza bolla baynda geeshsha dorsa mala gidida Kirstoosa bonchcho suuththankko.
20 Izi erettiday hayssi alamezi medhettanaappe kase gidishin ha7i qasse wurseththa woden inttes qonccides.
21 Inttes ammanoynne intte hidotay Xoossan gidana mala Yesus Kirstoosa baggara iza hayqoppe denththidi izas bonchcho immida Xoossaan intte ammanetteeta.
22 Intte ammanizayta suure wozinappe siiqana mala tumaas azazeteththan intte intte asateth geeshshideta; hessa gishshas intte intte giddon issoy issaara lo7eththi siiqettite.
23 Intte nam7anththo yelettiday mernaas minni diza dhayontta de7o Xoossa qaalan dhayontta zereththafe attiin dhayza zereththafe gidenna.
24 Geeshsha Maxaafay giza mala,
«Asho may7iday wurikka
maata mala;
iza bonchchoyka wurikka
wora ciishsha mala;
maataykka melees;
ciishshayka qokkees.
25 Godaa qaalay gidikko
mernaas eqqi dees.»
Inttes sabbakettida Mishiraachcho qaalaykka hessa.