3
Godaan Ammaneteth
Ta naazoo!
Tani nena tamaarsizayssa
dogoppa;
ta azazotakka
ne wozinan woththa.
Istti ne layth adussana;
ishalo de7onne
saroteth nees gujjana.
Siiqoynne tumateththi
neeppe haakkofetto;
istta ne qoodhen qachcha;
ne wozinankka xaafa.
Histtiko neni Xoossa sinththaninne
asaa sinththan sabettananne
lo7o sunth demmana.+
 
Neni polo wozinan
GODAAN ammanetta;
neni ne akeekan zemppofa.
Neni biza oge ubbaan
iza sinththasa;
izikka ne biza oge suurisana.
Nerkka nena
aadho eranchcha gooppa;
GODAAS yayya;
iitappeka haakka.+
Hessi ne bollaa payya woththana;
ne meqeththatakka xalisana.
 
GODAA ne aqotan bonchcha;
biittay nees immiza ayfe ubbaafe
xeeraa izas imon bonchcha.
10 Ne hessaththo ooththiko
ne gootarati kumi palahana;
neni woyne ushshu agizasoti
cippi gi kumana.
11 Ta naazoo!
GODAA seera kadhoppa;
izi nena hanqiza
wodekka lanccofa.+
12 Aaway ba siiqiza naa
seerizayssaththo
GODAYKKA ba dosiza
naa seerees.++
13 Aadho erateth demmanaas
woxxiza asi,
akeekakka baas miishshe
ooththiza asi anjjettidaade.
14 Gaasoykka izippe demmiza go7ay
birappe demmiza
go7appe aadhdhees;
izippe beettiza go7ay
worqqafe beettiza
go7appe aadhdhees.
15 Aadho erateththi zo7o inqqufe
keehi al7o;
neni demmanaas amottiza ubbay
izira ginattenna.
16 Iza ushachcha kushen adussa layth,
hadirsa kushen aqotanne
bonchcho oykkadus.
17 Izi ogeti ufayssiza ogeta;
iza hemettiza oge ubbayka saro.
18 Iza bana idimmizaytas
de7o miththa;
izo oykkizaytikka anjjettana.
 
19 GODAY ba aadho erateththan
sa7a medhdhides;
ba akeekankka salota
istti dizason minththides.
20 Shaafati iza erateththan goggeettes;
shaarati ira immeettes.
21 Ta naazoo! Suure pirdanne
shaakki ero naaga;
istti ne sinththafe haakkofetto.
22 Istti nees de7o gidana;
ne qoodheskka aleqo gidana.
23 He wode neni ogen
hirgay baynda hemettana;
ne tohoykka dhuphettenna.
24 Neni ichchida wode babbaka;
ichchadakka
mal7o dhisko dhiskana.
25 Akeekontta gakkiza metonne
iitata bolla gakkiza
dhayssas babbaka.
26 Ays giikko GODAY nees
ammanettizaade gidana;
ne tohoy
woximaden oykettontta mala
izi nena naagana.
 
27 Nees maaddana wolqqay dishin
maado bessizaytas
lo7o ooso aggofa.
28 Ha7i nees dishin ne shoorozas,
«Simmada ya;
tani nees wonto immana» gooppa.
29 Nenan ammanettidi ne matan dishin
ne shooroza bolla
iita miish ooththanaas halchchofa.
30 Nena qohontta as
gaasoy baynda coo mootoppa.
 
31 Gene ooththiza asata qullofa;
istta iita ogekka kaallofa.
32 Gaasoykka GODAY
iita ooththizayta ixxees;
gido attiin suuretas izi
ba wozina qofa qonccisees.
 
33 GODAA qanggeththi
iita ooththizayta keeththanna;
gido attiin
iza anjjoy xillotasonna.
34 Otoreteththan qilccizayta bolla
GODAYKKA qilccees;
gido attiin banttana
kawushshizayta bonchchees.+
35 Aadho eranchchati
bonchcho laattana;
eeyati gidikko kawushshateththas
aadhdhi imettana.
+ 3:4 Luqa 2:52 + 3:7 Oro 12:16 + 3:11 Iyo 5:17 + 3:12 Ib 12:5-6 + 3:12 Ajju 3:19 + 3:34 Yaaqo 4:6; 1Phex 5:5