9
Aadho Erateththinne Eeyateth
1 Aadho erateththaya
baas keeth keexxadus;
keeththas laappun
tuussata essadus.
2 Iza modhdho mehe shukkadus;
woyne ushshu aggadus;
maaddaka giigsadus.
3 Histtada asaa xeyganaas
ba macca aylleta kiittadus.
Iza katamayppe dhoqqa soon
eqqada xeygadus;
4 «Inttenoo! Eray paccidayto
haa gelite!» gadus.
Eeyatakka iza,
5 «Haa yiidi ta qumaa miite;
tani aggida
woyne ushshaaka uyite!
6 Intte eeyateththa ogeza aggite;
intte shemppora paxa de7ana;
akeeka ogen hemettite» gadus.
7 Qilcciza as seeriza asi ubbay
baas cashshe kallana;
iita as zorizaadeyka
baas kawuyana.
8 Qilcciza as zoroppa;
ne iza zorikko izi nena ixxana.
Aadho eranchcha as seera;
ne iza seerikko izi nena dosana.
9 Aadho eranchcha as tamaarsa;
histtiko izi kaseyssafekka
aadho eranchcha gidana.
Xillo as tamaarsa;
histtiko izi erateth gujjana.
10 Aadho erateththas koyroy
GODAAS yashshateththa;
Geeshshaza eroykka akeeka.
11 Ta gaason nees barey aduqqana;
nees de7o layththayka gujettana.
12 Neni aadho eranchcha gidikko
go7ettana;
ne qilccizaade gidikko qohettana.
13 Eeya maccassi wocama darawus;
iza bana haarukku;
iza aykkoka erukku.
14 Iza ba karen utta pe7awus;
katama giddon dhoqqaso
keza uttawus.
15 Heera aadhdhi
ba oge bizayta xeygawus.
16 Izakka wozina pacetas,
«Inttenoo! akeekay paccidayto
taakko haa yiite.
17 Kaysi uyiza haaththi mal7ees;
geeman miza qumaykka
suukesees» gawus.
18 Gido attiin hayqqida asay
heen de7izayssa,
izi imaththatikka duufo giddon
dizayssa istti erettenna.