Mazamure Maxaafa
Giddo Qofa
Mazamure Maxaafay Geeshsha Maxaafa giddon Mazamurenne woosa maxaafa gididi erettees. Ha maxaafaa giigsidayti adussa wodeta giddon beettida dumma dumma asata. Issi issi mazamureta kawo Dawiti xaafides; ha mazamuretanne ha woosata shiishshidi ba goynniza woden go7ettishe gam7idayti Isra7eele asata. Guuththa wodeppe guye bantta Geeshsha maxaafata giddon gelththida.
Haytanti ayanappe xaafettida ginxota qommoy cora; isttika galata galatiza ginxonne Xoossa goynnana go7iza ginxota; Xoossi maaddana mala, naagana malanne saron woththana mala woossiza woosata ginxo; nagarappe maarettanaas shiishshiza woosa ginxota; Xoossa anjjo gishshas yootiza galata sabatanne morkketa qaxxayana mala Xoossas yootiza magana ginxota. Ha woosati issi asi barkka woossida woosatanne cora asay issife woossida woosata. Isttafe issoti issoti issi issi asaa wozinan siyettida mishota qonccisizayta. Harati qasse Xoossa asay ubbay koyzayssanne as ubbaas siyettiza hanoteth bessizayta.
Yesusi tamaarsishe Mazamure maxaafappe bochchi bochchi ekkidi tamaarsides. Ooraththa Caaqo maxaafata xaafidaytikka izan xaafettidayssafe ba xaafiza maxaafa giddo gelththida. Woosa keeththaya eqqosofe doommada Mazamure Maxaafaa Xoossas goynniza wode go7ettiza gita minjja miishsha mala oykkadus.
Ha maxaafay oykkida kumeththa qofa
Mazamure maxaafay ichchash kifiletan shaakettees; dariza baggata koyro kifiletanne nam7anththo kifileta xaafiday kawo Dawite. Heedzdzanththo kifileza xaafiday Aasaafe woykko Qoore nayta.
Mazamure 120-134 gakkanaas diza mazamureti ba7aale bonchchos yexettiza mazamureta; hayssafe kaallidi maxaafazi ichchash kifiletan shaakettidayssi qonccides.
Mazamure 1—41
Mazamure 42—72
Mazamure 73—89
Mazamure 90—106
Mazamure 107—150
Koyro Maxaafa
1
(Maza 1—41)
1 Iitata zoren bonttay,
woykko nagaranchchata
ogen eqqonttay,
qilccizayta shiiqon
uttonttay anjjettidaade.
2 Hessa mala asi
GODAA wogan ufayettees;
iza wogaa gallassinne
qamma qoppees.
3 Hessaadey goggiza haaththa
achchan tokettidi,
hayththika qokkontta
woden woden ayfe ayfiza
miththa mala;
izi ooththiza ubbay izas hanees.
4 Gido attiin iitati
hessa mala gidettenna;
carkoy pitti efiza suulla mala.
5 Hessa gishshas iitata bolla
GODAY pirdana;
nagaranchchatikka
xillota shiiqon eqqettenna.
6 Ays giikko GODAY
xillota oge erees;
gido attiin iitata ogey
istta dhayon gaththees.