139
Dawiti Zammareta Kaabbos Yexxida Mazamure
1 Abeet GODAWU!
Neni tana pilgga eradasa.
2 Tani awude uttizaakkonne
awude eqqizakko neni eraasa;
neni ta qofa ubbaa
haakoppe akeekaasa.
3 Tani bizaasonne
shempizaso xomosaasa;
ta ogeta ubbaa neni eraasa.
4 Abeet GODAWU!
Tani ta doonappe issi qaalakka
haasayanaappe kasetada neni
ta qofa ubbaa eraasa.
5 Neni ta yuusho ubbaan daasa;
ne kushezan tana naagaasa.
6 Ne erateththay
tana keehippe malalisees;
tani akeekanaas
dandayzayssafekka dhoqqees.
7 Tani ne Ayanappe
awa baanaas dandayazinaa?
Woykko ne sinththafe
awa baqatanaas dandayazinaa?
8 Pude salo ke7ikko
neni heen daasa!
Duge si7oole wodhdhikokka
neni heen daasa.
9 Arshey mokkizaso bagga
paalla biikko,
woykko arshey wullizaso bagga
haakka biikko,
10 Tana heen ne kushey kaaleththees;
ne ushachcha kusheykka
tana minththi oykkees.
11 Tani, «Dhumazoo!
Tana genththa;
poo7ozoo! Ta yuushon
dhuma» giikko,
12 dhumay nena xeelo diggenna;
omarsi nees
gallassa mala poo7ees;
dhumaynne poo7oy nees issi mala.
13 Neni ta asateththa
ubbaa medhdhadasa;
ta aayey ulonkka
tana tila medhdhadasa.
14 Neni tana keehi yegalththinne
malalisizaaz histta
medhdhida gishshas
ta nena galatays;
ne oosoti malalisizayta!
Ta shemppoya
hessa ubbaa erawus.
15 Tani geemason medhettida wode
ta meqeththati
neeppe geemmibeettenna;
tani ta aayey ulon ciimma giddon
hiillan oosettiza wode,
16 ta aayi ulon buro suuth gida
ta dishin ne ayfeti be7ida;
ta layththatappe issoynne
doomettontta dishin
taas neni barida gallassati ubbay
ne mazgaban xaafettida.
17 Abeet Xoossawu!
Ne taas qoppiza qofay
ay mala lo7oo!
Izikka ay keena coraa!
18 Tani iza qoodikko aceppeka daro;
ta ichcha beeggiza wode
ha7ikka nenara de7ays.
19 Abeet Xoossawu!
Neni iitata siifidaakko aazee dizay!
Suuth gussana saamettiza asati
taappe haakkite!
20 Istti ne bolla iita miish haasayeettes;
ne morkketi
ne sunththaa mooreettes.
21 Abeet GODAWU!
Nena ixxizayta tani ixxikinaa?
Ne bolla dendizayta
tani harassettikinaa?
22 Ta istta mulera ixxays;
istta tani
ta morkketa mala qoodays.
23 Abeet Xoossawu!
Ta wozina pilggada era;
tana paaccada ta ceece qofaakka
shaakka era.
24 Ane tanan iitay de7ikko xeella;
histtada mernaa ogera
tana kaaleththa.