41
Dawiti Zammareta Kaabbos Yexxida Mazamure
Hiyeesas qoppiza asi anjjettidayssa;
meto gallas GODAY iza ashshees.
GODAY iza naagidi paxa woththees;
izikka biitta bolla anjjettana;
GODAY iza morkketas
iza aaththidi immenna.
GODAY izi hargettidi
hiixan dishin maaddees;
sakettinkka iza paththees.
 
Tani gidikko, «Abeet GODAWU!
tani nena qohida gishshas
tana maara;
hargefe tana paththa» gadis.
Ta morkketi ta bolla
iita miish haasaydi,
«Izi awude hayqqandeeshaa?
Qasse iza sunththayka
awude dhayandeeshaa?» geettes.
Tana beyanawu yiza oonikka
ba wozinan
iita miish suuththishe
qoodheppe qommon haasayees;
kare kezidikka zigirs punnees.
 
Tana ixxiza ubbati
zuppetidi ta bollan
saasuketteettes;
iita miishshi ta bolla
gakkana mala amotteettes.
«Iza iita hargey oykkides;
izi he ichchidasoppe
mulekka dendenna» geettes.
Haray attiin tani ammanettiza
ta siiqo laggey,
tanara issi maaddafe miday
ta bolla toho denththides.+
10 Gido attiin abeet GODAWU!
Neni tana maara;
tani halo kessana mala
tana hargefe paththa.
11 Ta morkkey
tana xoononttayssan
ne tana dosizayssa
ta erays.
12 Neni tana
ta suureteththa gishshas maaddaasa;
ne sinththan tana
mernaas woththaasa.
 
13 GODAA Isra7eele Xoossay
mernaappe mernaa
gakkanawu galatetto.+
Amiin! Amiin!
+ 41:9 Mato 26:23; Mar 14:18; Luqa 22:21; Yoha 13:18 + 41:13 Maza 106:48