55
Dawiti Hassa7an Shiishshida Ginxo; Dawiti Zammareta Kaabbos Diiththan Yexxida Mazamure
1 Abeet Xoossawu! Ta woosa siya;
ta shoobbishin qelli gooppa.
2 Ezga; ta woosa siya;
ta qofan ta un7ettadis;
maracey taas kokkorides.
3 Ta morkketi mandiin hirgadis;
iita asati qohiin dagammadis;
istti ta bolla meto ehida;
hanqon dendidi tana morkkida.
4 Ta wozinay hirgees;
hayqqanaakkonne giza dagamay
ta bolla wodhdhides.
5 Yashshinne dagamay tana oykkides;
ta asateththay kokkorides.
6 Tani, «Taas haraphphe mala
qefey dizaakko
piradhdha baada shempana.
7 Tani beta baadakka
bazzon de7ana shin.
8 Tani goteppenne uushoppe attizaso
eesotada gakkana shin» gadis.
9 Abeet Godawu!
Tani katamay giddon
ooshshinne gene beyadis;
iitata zore ne dhayssa;
istta qofaakka
bulakereththa yegga.
10 Iitati gallassinne qamma
katama gimbeza bollara
yuuyeettes;
iitateththinne geney
izi giddon dees.
11 Bashshi izi giddon dees;
geneynne cimoy
izi dubbushatappe shaakettenna.
12 Ta morkkey tana cayidaakko
ta iza dandaya aaththanakko,
ta bolla ceeqettizay
tana ixxizaade
gididaakko tani izappe qotettana.
13 Gido attiin hayssa ubbaa
ta bolla ooththizay nena,
ta laggeza, ta dabbozanne
ta siiqoza.
14 Nuni issoy issaara
ufayssan haasayettidos;
issifekka Xoossa soon
simerettidos.
15 Iitateththi istta wozina
giddon diza gishshas
ta morkketa bolla qoppontta
hayqoy gakko;
shemppora paxa dishe
moogettetto!
16 Tani gidikko ta Xoossa xeygays;
GODAY tana ashshees.
17 Maalado, gallassinne omars
tani waassayssinne
ta meto izas yootays;
izi ta qaala siyees.
18 Daroti tana eqettikokka,
izi tana ola tooraappe ashshees.
19 Beniisofe kawoteththa araatan
utti diza Xoossay
ta woosa siyidi
ba oge laammonttaytanne
Xoossas yayyonttayta
kawushshana.
20 Ta laggezi ba siiqota bolla
ba kushe denththides;
isttara caaqettida
caaqo qaalaakka laallides.
21 Iza doonappe keziza qaalay
oyssa mala;
gido attiin iza wozinay
caddiza toora mala;
iza qaalati zaytepekka
aadhdhi shugo;
gido attiin qanxxiza
mashsha mala.
22 Ne meto GODAA bolla woththa;
izi nena minththi naagana;
izi xilloti
kundana mala ooththenna.
23 Abeet Xoossawu!
Neni gidikko iitata
duge ciimma ollan yeggana.
Suuth gussizaytinne
baleththizayti
ba daana layththas
baggaka deettenna;
gido attiin tani
nenan ammanettays.