57
Dawiti Sa7oole sinththafe baqatidi gongolo giddon dishe zammareta kaabbos, «Dhayssofa» geetettiza diiththa giigson shiishshida woosa mazamure
Abeet Xoossawu!
Ne taas qadhetta;
tana maara;
ta shemppoya nenan zemppadus;
bashshay aadhdhana gakkanaas
tani ne qefeta garsan qotettana.
 
Izi ba halchcho mala taas poliza
Ubbaafe Dhoqqa
Xoossako waassays.
Xoossi saloppe maado kiittidi
tana ashshana;
tana yedhdhizayta kawushshana;
Xoossi ba mernaa siiqonne
ba tumateththaa taas kiittana.
 
Tani ta morkketa giddon,
as puuzidi miza gaammo
misatizayta giddon days.
Istta achchay tooranne
wondafe yiishshaa mala;
istta inxarsayka
qara mashsha mala.
 
Abeet Xoossawu! Neni salotappe
bollara dhoqqu dhoqqu ga;
ne bonchchoy sa7a ubbaa kumo.
 
Istti ta tohos woximade woththida;
ta asateththaa kuunissida;
istti ta ogen olla bookkida;
gido attiin he ollan
banttas kundida.
 
Ta wozinay minni dees;
abeet Xoossawu!
Ta wozinay minnidi dees;
tani nees yexxananne
nena sabbana.
Ta shemppoyee birkka!
Diiththatinne maasinqoti
beeggite!
Tanikka wonttara dendana.
 
Abeet Godawu, tani nena
asa ubbaa sinththan galatana;
qasse deraa giddon
ta nena yeththan sabbana.
10 Ne mernaa siiqoy
pude salo gakkides;
ne tumateththayka
salo shaara gakkides.
 
11 Abeet Xoossawu!
Neni salotappe bollara
dhoqqu dhoqqu ga;
ne bonchchoy
sa7a ubbaa kumo.+
+ 57:11 1Same 22:1; 24:3