70
Zammareta Kaabbos Dawiti Yexxida Hassa7iso Mazamure
(Maza 40:13-17)
1 Abeet Xoossawu!
Tana ashshanawu
taakko haa simma;
abeet GODAWU!
Tana maaddanawu eesota.
2 Tana wodhanawu koyzayti
yeellatettonne shirotetto;
Tani qohettanayssa amottizayti,
kawuyidi guye simmetto.
3 Ta bolla, «Izas hashshu! Hashshu!»
gidayti yeellatidi guye simmetto.
4 Gido attiin nena koyza ubbati
nenan ufayetettonne
hashshu getto;
qasse ne atoteththaa
dosiza ubbati,
«Xoossi dhoqqu dhoqqu
go!» getto.
5 Tani hiyeesanne metotanchcha;
abeet Xoossawu!
Eeson taakko gakka.
Tana maaddizaynne
ashshizay nena;
abeet GODAWU! gam7ofa.