75
Aasaafey zammareta kaabbos, «Dhayssofa» geetettiza diiththa giigson shiishshida mazamure
Abeet Xoossawu!
Nena galatoos;
ne nuus mata gidida gishshas
ne sunththas galata shiishshoos;
asaykka malalisiza
ne ooso ubbaa gishshas
haasayees.
 
Xoossi, «Ta bara woththida woden
suure pirda pirdanay tana.
Sa7aynne iza bolla diza
medheta ubbay qaaxxiza wode
sa7a tuussata minththa
essiday tana.
Otoranchchata, ‹Otorettofte› gays;
iitatakka, ‹Intte makkallofte.
Ne kace otoron
dhoqqu dhoqqu histtofa;
ne qoodhe qaaththa
haasayoppa› gays» gees.
 
Bonchchoy arshey mokkizasoppe
woykko wullizasoppe
woykko bazzofe yeenna.
Gido attiin suure pirdizay Xoossa;
izi issaa bolla pirdees;
issaa xillisees.
GODAA kushen wancay dees;
izan hoommotiza hanqo woyne
ushshi kumi uttides;
he ushshaza gede kare gussides;
sa7an diza makkallanchchati
hessa uyida;
istti orccoka
ashshontta congorsida.
 
Tani gidikko hayssa
mernaas awajjana;
Yaaqoobe Xoossaka
mazamuren sabbana.
10 Tani iitata kace ubbaa menththana;
xillota kace gidikko
dhoqqu dhoqqu histtana.