78
Aasaafey Hassa7an Shiishshida Ginxo
1 Ta derezoo ta nena
tamaarsizayssa siya;
ta doonappe ke7iza qaala ezga.
2 Tani haasayza haasaya
leemison doommays;
beniisofe qotan diza
xuura yo7o qonccisays.
3 Nu siyidayssinne
nu eridayssi,
nu aawatikka nuus yootidayssa.
4 He yo7ota nuni
istta naytappe qottoko;
GODAAS bessiza galata,
iza wolqqanne
malalisiza iza ooso
yiza yeletataskka
nuni yootana.
5 Izi Yaaqoobe zaretas azazo,
Isra7eele asaas woga immides;
kase nu aawati bantta nayta
he wogata
tamaarsana mala azazides.
6 Hessika kaalliza yeletay
istta eranaassa;
qasseka buro yelettana
nayti eranaassanne
isttika bantta naytas yootanaassa.
7 He naytikka Xoossan ammanettana;
izi ooththida oosokka dogettenna;
iza azazotakka istti naagana.
8 Istti kase bantta aawata mala
wozina muumenne
makkallanchcha gidettenna;
istti Xoossa sinththan
suure gidettenna;
Xoossaska ammanettibeettenna.
9 Efreeme nayti olas
wondafenne yiish giigsi kezida;
gido attiin ola gallas guye simmida.
10 Istti Xoossa caaqo qaala
naagibeettenna;
iza wogaa mala dontta ixxida.
11 Istti izi ooththida ooso balida;
izi istti bessida
malalisiza hanotakka dogida.
12 Izi istta aawati be7ishin
Gibxe biittan
Xaanoose demban
malaata ooththides.
13 Abba shaakkidi giddora
istta pinththides;
izi haaththa yaanne
haa shaakkidi
goda mala essides.
14 Izi istta gallas shaaran,
omars tama poo7on
kaaleththides.
15 Izi bazzon zaalla phalqidi
abba mala daro haath
istta ushshides.
16 Zaallafe haath pulttisidi
shaafa mala duge gogissides.
17 Gido attiin istti iza bolla
nagara ooso gede gujjida;
Ubbaafe Dhoqqa Xoossa bolla
bazzon makkallida.
18 Istti keehi amottida
kath oychchida;
erishe ba wozinan
Xoossa paaccida.
19 Istti Xoossa bolla,
«Bazzon Xoossi
nuus maana kath
immana dandayzee?
20 Zaallaa shociin pulttoy ke7idi
shaafa haaththi goggides;
histtiin izi nuus miza kath
immanawu dandayzee?
Woykko ba asaas
asho immanawu
dandayzee?» gi haasayda.
21 GODAY hessa siyida wode
istta bolla daro hanqettides;
Yaaqoobe zareta bolla
tamay eexxides;
Isra7eele bolla iza hanqoy
dari dari bides.
22 Ays giikko istti
Xoossan ammanibeettenna;
izi ashshizayssaka
ammanettibeettenna.
23 Izi gidikko bollafe shaara azazides;
salo pengetakka doydes.
24 Istti maana mala isttas
manna bukisides;
saloppe kath isttas immides.
25 Kiitanchchata kath asay mides;
Xoossi istti kalli miin
tirpi attiza kath immides.
26 Arshey mokkiza baggara saloppe
carkoy carkana mala ooththides;
ba wolqqan dugeha bagga
carko denththeththides.
27 Izi asaas asho gudulla biitta mala,
abba doonan diza ace mala daro
piradhdhiza kafota yeddides.
28 Istti dunkaani uttidaso
dunkaanaa yuushon wodhdhida.
29 Istti amottidayssa isttas immides;
isttika kalli mida.
30 Gido attiin istti
ba moosaa aaththontta
buro muussa bolla de7ishin,
31 Xoossa hanqoy
istta bolla wodhdhides;
istta giddofe
mino asata wodhides;
Isra7eeleppe
payya naateththata mulqqides.
32 Hayssi ubbay haniinkka
istti nagara ooththizayssa
aggibeettenna;
malalisiza iza oosotakka
be7idi ammanibeettenna.
33 Hessa gishshas izi istta layththata
peeno mala aaththides;
istti diza wodeta
hirgan wursides.
34 Xoossi isttafe guuththata wodhiin
attidayti ba nagara paaxida;
wozinappe koyishe
Xoossako simmida.
35 Istti Xoossi isttas
Zaalla gididayssanne
Ubbaafe Dhoqqa Xoossi
istta wozzidayssa hassa7ida.
36 Gido attiin istti bantta
inxarsan izas wordotidi
bantta doonan cimmida.
37 Istta wozinay
Xoossan minni eqqibeenna;
izi isttara caaqettida
caaqon ammanettibeettenna.
38 Gido attiin izi istta
maarizaade gidida gishshas
istta iitateththaa atto gides;
isttaka dhayssibeenna;
daro wode ba hanqoza
istta bollafe teqqides;
ba hanqoza bosha ubbaa
istta bolla yeddibeenna.
39 Issino carki aadhdhidaappe guye
simmontta carko mala
asho may7ida as
gididayssa akeekides.
40 Istti bazzon aappunto
iza bolla makkallidoo!
Mela bazzon aappunto
iza lancissidoo!
41 Istti zaari zaaridi Xoossa paaccida;
Isra7eele Geeshshaa
madunththida.
42 Izi istta morkketappe
wozzida gallassatanne
iza wolqqaa dogida.
43 Izi Gibxe biittan malaata,
Xaanoose demban malalisizaaz
ooththidayssa qoppibeettenna.
44 Istta shaafa haaththa
suuththan laammides;
hessa gishshas Gibxe asati
he shaafatappe
uyanaas dandaybeettenna.
45 Istta olanaas udunxxetanne
istta biitta dhayssanaas
shodhdheta kiittides.
46 Isttas mokkida kaththa gumbaros;
istti ooththi daaburda kaththaa
booles immides.
47 Istta woyne tura shachchan,
istta balase miththatakka
kenchchon dhayssides.
48 Istta miizata shachchan wodhides;
istta meheta wolqqanththan
xuuggi wursides.
49 Ba mino hanqo, bosha, bashshinne
dhayssiza kiitanchchatan
istta bolla yeddides.
50 Ba hanqozas oge giigsides;
istta iita harges
aaththi immides;
gido attiin hayqoppe
ashshibeenna.
51 Gibxen yelettida bayra nayta
ubbaa wodhides;
Kaame dunkaanen
koyro yelettida
nayta wursides.
52 Gido attiin izi ba asaa
dorsa mala kessi heemmides;
wude mala bazzon kaaleththides.
53 Izi istta saron kaaleththides;
isttika hirgibeettenna;
istta morkketa gidikko
abbay mittides.
54 Histtidi ba geeshsha biitta,
ba ushachcha kushen
xooni oykkida
zuma efides.
55 Izi istta sinththafe
kawoteththaa gooddidi
istta biitta Isra7eele zaretas
gishereththi immidi
istta laatissides;
Isra7eele asaa
istta morkketa keeththan
woththides.
56 Istti gidikko Ubbaafe
Dhoqqa Xoossa bolla makkallida;
iza paaccidi iza wogatakka
naagontta ixxida.
57 Istti beni bantta aawata mala
makkallanchchatanne
kaddizayta gidida;
ammanththontta bokka tooman
eqqida toora mala gidida.
58 Istti goynniza dhoqqasohotan
iza yiillochchida;
bantta eeqa xoossatan
iza qanaatissida.
59 Histtiin Xoossi hessa siyidi
keehi hanqettides;
Isra7eele mulera
yeggi aggaagides.
60 Asaa giddon izi tokkida dunkaana
Seelon ba dizasoza yeggi aggides.
61 Xoossa wolqqassinne
bonchchos malaata gidida
Taabotaa morkketa kushen
aaththi immides.
62 Izi ba deraa bolla hanqettides;
istta giththa mashshas
aaththi immides.
63 Istta panththata tamay mides;
histtiin istta geela7oti
azina gelontta attida.
64 Istta qeeseti mashshan wurida;
istta machchetikka
yeekkanaas dandaybeettenna.
65 Hessafe guye Goday
dhiskofe beeggiza mala
beeggides;
woykko woyne ushshu uyi
maththottida qaray maththofe
beeggiza mala dendides.
66 Izi ba morkketa shocidi
guye zaarides;
istti mernaas yeellatana mala
ooththides.
67 Yooseefe dunkaane kadhides;
Efreeme qommota dooribeenna.
68 Gido attiin izi Yuhuda zarenne
ba siiqiza Xiyoone
zumaa doorides.
69 Hessan izi Xoossa Keeththaa
salo kessi dhoqqan keexxides;
sa7a mala mernaas essides.
70 Ba aylle Dawite dooridi
dorsa wude heemmizasohoppe
ekkides.
71 Iza dorsata heemmizasohoppe
kessidi ba dere Yaaqoobenne
ba xinxxo Isra7eele
heenththanchcha ooththides.
72 Histtiin Dawitikka istta
suure wozinan heemmides;
qasseka hiillan
istta kaaleththides.