88
Izra7eele as Emaaney soren shiishshida ginxo Qoore nayti zammareta kaabbos diiththa giigson yexxida mazamure
 
Abeet GODAWU!
tana ashshiza Xoossawu!
Tani gallassinne omars
ne sinththan yeekkays.
Ta waasoy ne sinththi gakko;
ne hayth ta woosakko zaara.
 
Ays giikko ta de7oy
meton kumides;
tani hayqqana matadis.
Tani duufon geliza
asatara qoodettadis;
wolqqay baynda as gidadis.
Tani ahata giddon
olettida asa mala,
hayqqidi duufon moogettida
aha mala,
tani ubbaaka
neni dogida asa malanne
ne maadoppe duuxxida
asa mala gidadis.
 
Neni tana ciimma ollan,
duge dhuma sohon yeggadasa.
Ne hanqoy tana deexxees;
ne hanqoza dambalay
tana mulera mittides.
 
Neni ta laggeta taappe haassadasa;
istti tana shuunettana mala
ooththadasa;
tana giddoththida;
kessa ekkanawukka dandaykke.
Abeet GODAWU!
Kayo gaason ta ayfeti doljumida;
Ubbaa gallas
tani neekko waassays;
ta kushetakka neekko miccays.
 
10 Neni hayqqidaytas
malalisiza miish ooththay?
Istti dendidi nena galatanee?
11 Ne mernaa siiqoy duufon
ne ammaneteththayka
bashshason yootettizee?
12 Ne malalisiza oosoy
dhuman erettizee?
Woykko ne xilloteththay
dogettida asata biittan beettanee?
 
13 Abeet GODAWU!
Neni tana maaddana mala
ta neekko waassays;
maalado maalado ta woosay
ne sinth gakko.
14 Abeet GODAWU!
Neni tana ays ixxay?
Ne sinththaa taappe
ays genththay?
 
15 Yelagateththasofe doommada,
tani tuggatadissinne
hayqqana matadis;
neni tana daganththiin
hidota qanxxadis.
16 Suulliza ne hanqoy
ta bolla gakkides;
babisiza ne hanqoy
tana dhayssides.
17 Istti kumeththa gallas
di7o haaththa mala
tana giddoththida;
issi bolla gididi
tana dooddi oykkida.
18 Neni ta laggetanne
ta siiqota taappe haassadasa;
dhumay xalla taas dabbo gidides.