11
Dawite Kawoteth
(2Same 5:1-10)
1 Hessafe guye Isra7eele asay ubbay issife Dawitekko Kebroone biidi, «Nuni issi ashonne issi meqeththa;
2 Kase Sa7oole kawoteththa wodekka Isra7eele asaa olas kaaleththiday nena; GODAA ne Xoossay nena, ‹Ta deraa Isra7eele neni heemmana; istta bollaka neni kawotana› gides» gida.
3 Hessa gishshas Isra7eele cimati ubbay Kawo Dawitekko Kebroone katama yida; izi isttara Kebroonen GODAA sinththan caaqettides; GODAY Sameela baggara haasayda qaalaa mala Dawiti Isra7eele bolla kawotana mala tiyda.
Dawiti Yerusalaame Oykkides
4 Dawitinne Isra7eele asay ubbay Yerusalaame katama bida; he wode Yaabuse asati heen diza gishshas he katamaya Yaabuse geetettawus.
5 Yaabuse asati Dawite, «Neni ha katama mulekka gelakka» gida; gidikkoka Dawiti Xiyoonen diza istta miixaa oykkides; histtiin iza Dawite Katama geetettadus.
6 Dawiti, «Koyrotti biidi Yaabuse asata shocizaadey ola gadawa gidana» gides; histtiin Xuriya naa Iyo7aabey koyrotti bi olida gishshas ola gadawa gidides.
7 Dawiti he miixayo baas duussaso histtida gishshas miixaya Dawite katama geetettadus.
8 Dawiti he katamay yuushon kechchata keccidi katamayo zaari keexxides; attida katamaa qasse Iyo7aabey zaaridi keexxides.
9 Ubbaafe Wolqqama GODAY izara diza gishshas Dawiti minni minni bides.
Mino Gidida Dawite Olanchchata
(2Same 23:8-39)
10 Mino gidida Dawite olanchchati hayssafe kaallidi xaafettida; isttika hankko Isra7eele asatara gididi GODAY izas immida hidota qaala mala iza kawoteththay aakkana mala keehi maaddidanne minththeththida.
11 Mino gidida Dawite olanchchatappe koyroyssi Hakimoone zarkkefe gidida Yashobi7aame; izi ola gadawa heedzdzatas halaqa; izi issito olan 300 as wodhides.
12 He heedzdzu mino olanchchatappe nam7anththozi Ahihohe zarkkefe Doode naa El7ezeere.
13 Filisxeeme asati olettanaas Efsi-Deemime geetettizaso shiiqida wode Alazaarey Dawitera issife dees; banggay kumida goshsha gade giddon Isra7eele olanchchati Filisxeemeta sinththafe baqatida.
14 Gido attiin izinne iza kaallizayti heen soho oykkidi Filisxeeme asatara eqettida; GODAY isttas wolqqama xoono immides.
15 Filisxeeme olanchchati Erafayme shoobban dunkaani diza wode 30 halaqatappe heedzdzati Dawiti dizaso Adulaame gongolo matan diza zaallaako wodhdhida.
16 He wode Dawiti miixaa giddon dees; Filisxeeme olanchchata buttey Beeteliheemen dees.
17 Dawiti haath uyanaas amottidi, «Beeteliheeme katama penge lanqen diza pultto haaththaafe tana oonee ushshanay!» gides.
18 Heedzdzu mino Dawite olanchchati Filisxeeme asati dunkaani uttidasohora kanththi biidi Beeteliheeme katamaa pengen diza pulttozappe haath duuqqidi Dawites ehida; gido attiin Dawiti uyontta ixxidi he haaththaa GODAA sinththan gussides.
19 Histtidi, «Hayssa mala oosoppe tana Xoossi naago! Ta hayssa uykko ba shemppo bayzidi ehida asata suuth ushsha mala gidennee?» gides; hessa gishshas Dawiti he haaththaa uyibeenna; he heedzdzu mino olanchchati hessa ooththida.
20 Iyo7aabe isha Abisayey heedzdzatas halaqa; izi ba tooran 300 asata oli wodhides; hessa gaason izikka heedzdzata mala erettides.
21 Izi heedzdzatara qoodettontta aggikokka isttafe aadhdhida bonchcho demmides; isttaskka halaqa gidides.
22 Qabxi7eeleppe yida Yoodahe naa Bannayay erettida olanchchanne wolqqama miish ooththida asa; izi nam7u erettida Mo7aabe biitta asata wodhides; qasse shachchi darida issi gallas gongolo giddo gelidi gaammo wodhides.
23 Bannayay izas geesay ichchashu wadha gidiza Gibxe biitta as wodhides; he Gibxe addeza kushen shemmaane wondiraashe keena tooray dees; Bannayay gidikko guufe oykki biidi iza kushen diza tooraa dafi ekkidi iza tooran iza zaari wodhides.
24 Yoodahe naa Bannayay haytantta ooththides; izikka heedzdzata mala erettida as gidides.
25 Izi heedzdzatara qoodettontta aggikokka 30 olanchchatappe aadhdhi bonchchettides; Dawiti iza bana naagizayta bolla halaqa histti shuumides.
26 Asaa giddon diza mino olanchchati hayssafe kaalli dizayta,
Iyo7aabe isha Asaheele,
Beeteliheeme as
Doode naa Elyaane,
27 Haroode as Shaamote,
Piloone as Heleexe,
28 Tequhe as Iqesha naa Ira,
Anatoote as Abi7eezere,
29 Huushe as Sibikaye,
Ahihohe as Eelaye,
30 Naxoofe as Mahiraye,
Naxoofe as Ba7aana naa Heleede,
31 Biniyaame zarkkefe Gibi7a as
Eribaye naa Ittaye,
Piraatoone as Bannaya,
32 Ga7aashe shoobba as Huraye,
Arabe as Abi7eele,
33 Bahiruume as Azimoote,
Shaalboone as Eliyaahibe,
34 Gizoone as Hasheeme,
Harare dere as
Shaage naa Yoonataane,
35 Harare dere as
Sakkare naa Ahi7aame,
Uure naa Elfaale,
36 Makeere dere as Hefeere,
Piloone dere as Akaya,
37 Qarmeloose as Hexire,
Ezbaye naa Na7iraye,
38 Naataane isha Iyu7eele,
Aggaare naa Mibihaare,
39 Amoone as Zallaqa,
Xuriya naa Iyo7aabe
ola massara tookkiza
Bi7oroote as Nahiraye,
40 Yatire as Ira,
Yatire as Gaareebe,
41 Hiite as Ooriyo,
Ahilaye naa Zabaade,
42 Oroobeele zarkkefe
Shiiza naa Adiine;
izi Oroobeele zarkketassinne
banara issife diza 30
asatas halaqa.
43 Ma7ika naa Hanaane,
Mitaane as Iyoosaafixe,
44 Ashtaarote as Uuziya,
Aaro7eere dere as Hoottamo
nayta Shaamenne Yi7i7eele,
45 Shimire naa Yidi7eelenne
iza isha Tizeete dere as Yooha,
46 Mahaawe as El7eele,
Elnaame nayta
Yiribayanne Yooshaya,
Mo7aabe dere as Yitima,
47 El7eele, Iyoobeedenne
Xoobe dere as Ya7isi7eele.