Phawuloosi
Oroome Asaas
Xaafida Kiita
Giddo Qofa
Hawaare Phawuloosa kiitay Oroome asaas xaafettiday Phawuloosi Oroomen diza Woosa Keeththayo gakki beyanaas qoppida gishshas istti iza giigetti naagana mala erisanaassa. Phawuloosas diza qofay Oroomen diza ammaniza asaara guuththa wode ooththidaappe guye istti iza maaddiko izi Ispeene biitta baanaassa; izi baas gelida mala isttaskka ammanoy geliin ammanizayti ba duussan ammano bessana mala ammano timirte hano isttas ubbaa birshi xaafides; Phawuloosa kiitay kumeth gidi beettiday hayssa ha kiitazanna.
Phawuloosi Oroomen diza ammaniza asaas ba saroka yeddidaappenne isttas izi woossana qaala gelidaappe guye ba kiitaas waanna ayfe yo7o (1:17) «Xoossafe beettiza xilloteth ammanonne ammanos gidida mala Mishiraachcho qaalan qonccides» giza qaala gididayssa bessees.
Hessafe guye Phawuloosi hayssa ha qofaza gujji aassi xaafees; Ayhudatakka gidiin woykko hankko dere asaa gidiin asi wurikka nagaras haarettida gishshas Xoossara maqaynnanaas bessees; asay Xoossara maqaynnana dandayzay Yesus Kirstoosan ammanonna. Hessi asay Xoossara doommida ooraththa issifeteththa ayfey ooraththa de7o gididayssa Phawuloosi lo7eththi erisees; ammanizaadey Xoossara saron de7ees; Xoossa Ayana baggara hessaadey nagarappenne hayqo wolqqafe wozzettees; shempo 5-8 gakkanaas Phawuloosi Xoossa wogaa gishshassinne ammanizayta de7on ooththiza Xoossa Xillo Ayanas qofay aazakko qonccisees. Qasseka gujjidi Phawuloosi, «Asa zereththa gishshas Xoossas diza qofa giddon Ayhudaynne Ayzaabey issife oykettanaas dandayzee?» giza oyshos zaaro immanaas baaxetees.
Qasseka Phawuloosi qonccisida mala Ayhudati Yesusa ammanontta attiday Xoossa qofaa mala; hessika haniday Yesus Kirstoosa baggara Xoossi qonccisida iza atoteththa kiyan kumeth asa zereththi wurikka gakki ekkana gaththanaassa; gido attiin Ayhuda asay Yesusan ammanana wodey yaanayssa Phawuloosi ammanees. Wurseththan Phawuloosi ammanon waani de7anaakkonne harappeka ammanizayti ba garsan baas diza gaytoteththan siiqo oge kaallanaas bessizayssa istta erisees. Gujjidikka isttas Xoossa ooso gishshas ammanizayti ba dere gishshas, ba garsan issoy issaa naaganaas bessiza alaafeteththa gishshassinne qofappe dendiza oyshata ubbaa hu7en hu7en erisees.
Ha Maxaafay Oykkida Kumeththa Qofa
Ha maxaafazi oykkida ayfe qofata 1:1-17
Asa naas atoteththi koshshees 1:18—3:20
Xoossi asa naa ashshiza oge 3:21—4:25
Kirstoosa baggara beettiza ooraththa de7o 5:1—8:39
Isra7eele asay Xoossa qofa garsan 9:1—11:36
Ammaniza asa lo7o ooso 12:1—15:13
Wurseththa saroka 15:14—16:27
1
1 Yesus Kirstoosa ayllenne Hawaare gidanaas xeygettida Mishiraachcho qaalaa yootanaas Phawuloosappe kiitettida kiita.
2 He mishiraachcho qaalaa gishshas kase nabeta baggara Geeshsha Maxaafatan ufayssi imettides.
3 Mishiraachcho qaalaykka ba naaza gishshas izi asho baggara Dawite zereththafe gididayssa yootiza gishshassa.
4 Hessaththoka nu Godaa Yesus Kirstoosi ba geeshshateththa Ayanan hayqoppe dendidayssi izi Xoossa naa gididayssi gita wolqqan qonccides.
5 Kirstoosa sunththaa gishshas ammanontta derey ammanana malanne azazettana mala iza baggara nuni hawaarateththas gaththiza kiyateth ekkidos.
6 Intteka Yesus Kirstoosayta gidana mala xeygettidaytara deeta.
7 Xoossan dosettidaytanne geeshshata gidanaas xeygettida Oroome biittan diza inttes ubbaas nu Aawaa Xoossaafenne nu Godaa Yesus Kirstoosappe kiyateththinne saroteththi inttes gido.
Phawuloosi Oroome Beyana Laamoteth
8 Intte ammanoy kumeththa alamen siyettida gishshassinne intte gishshas ta Godaa Xoossa Yesus Kirstoosa baggara galatays.
9 Ta intte gishshas ubba wode ay mala qoppizaakkonne Xoossa naa mishiraachcho sabbakon ta kumeththa wozinappe izas ooththiza Xoossay taas markka.
10 Tani ta woosan ubba wode inttena qoppays; ha7i qasse wurseththan Xoossa shene gidikko ta intteko baana mala Xoossi taas oge doyana mala woossays.
11 Intte minnana mala maaddiza Ayana imota ta intte gishshassinne inttena ayfera beyanaas laamotays.
12 Hessika intteninne tani issoy issaara ammanon minettanaassa.
13 Ta ishatoo! Harason ammanonttayta matan taas hanida mala intte matankka taas ooso ayfey beettana mala daro wode qoppadis shin hanno gakkanaas ta digettada dizayssa intte erana mala koyays.
14 Tamaardaytas gidiin tamaaronttaytaska, eratassinne eeyatas ubbaas ta bolla tamaarsana acoy dees.
15 Inttes Oroomen dizaytaska tani mishiraachcho qaala yootanaas ta amottizay hessassa.
16 Ammanizayti wuri attana mala Xoossa wolqqa gidida gishshas tani mishiraachcho qaalan yeellatikke; hessika koyro Ayhudatas kaallidi Ayzaabetassa.
17 «Xilloy Xoossa ammanon dees» geetettidi kase xaafettida mala Xoossa xilloteththi mishiraachcho qaalan qoncciina; he xilloteththay koyroppe wurseth gakkanaas ammanon hanana.
Asa Nayta Iitateth
18 Tumaa ba iitateththaninne makkallan tucci oykkizayta iitateththaa bollanne istta makkallateththaa ubbaa bolla Xoossa hanqoy saloppe qonccana.
19 Istti eranaas bessizaaz Xoossi ubbaa isttas qonccisida gishshas istti Xoos eranaas qoncce gidides.
20 Alamey medhettoosofe haa simmiin asa ayfen beetti erontta Xoossa hanoteththi hessika izas diza mernaa wolqqaynne Xoossateththay izi medhdhida medheteththaan qonccen beettees; hessa gishshas asay shiishshana gaasoykka deenna.
21 Istti Xoos erikkoka iza Xoossateththaa mala iza bonchchibeettenanne galatibeettenna; gido attiin istta qofay mela go7ay bayndaaz gididessinne yuushshi qoppontta mala istta wozinay dhumides.
22 Istti bana, «Era» gizayta gidikkoka eeyata gidida.
23 Mernaa Xoossa bonchcho hayqqiza asaninne kafotan; mehetaninne biitta bolla gooshettiza medheteththatan misatissidi laammida.
24 Hessa gishshas Xoossi istta ba giddon issoy issaara barkka ba asateththaan tuna ooso ooththana mala geeshshateththi baynda laymateththas aaththi immides.
25 Istti Xoossa tumateth wordon laammida; medhdhida Xoossaa aggidi medheteththas goynnidanne isttas ooththida; medhdhida Xoossi izi mernaas galatettidayssa. Amiin.
26 Hessa gaason Xoossi istta yeellachchiza amoteththas aaththi immides; istta maccassati kase losettida gaytoteththa wogaa losey baynda wogan laammida.
27 Hessaththoka attuma asay baas bessiza maccassatara zin7anayssa aggidi addey addera zin7anaas amon xuugettidi maccassatara zin7iza mala addey addera zin7idi pala miish ooththida; heytantti barkka ba ooththida iita oosozas bessiza qixaate ba bolla ehida.
28 Qasseka istti ba qofara Xoos eroy nuna maaddenna gida gishshas istti ooththanaas bessonttayssa ooththana mala Xoossi istta go7ontta qofas aaththi immides.
29 Ubba baggara makkallanne iitateth, yiiqenne iita ooson xalala kumida; qanaateteththan, shemppo wodhon, ooshshan, baleththoninne genen kumidayta qasseka zigirzayta gidida.
30 Asa sunth moorizayta, Xoos ixxizayta, as cayizayta, otoranchchatanne ceeqettizayta gidida, ubba wode iita ooththanaas oge koyzayta, bana yelidaytas azazettonttayta,
31 yuushshi qopponttayta, gida qaala zaari laallizayta, asas mishettonttayta; menxe iitata.
32 «Hessa ooththizayti wurikka hayqqanaas bessees» giza Xoossa wogaa istti erishe heytantta baas ooso xalala gidontta hessaththo ooththizaytakka minththeththeettes.