Yohannisa Ajjuuta
Giddo Qofa
Yohannisa ajjuutay xaafettiday ammanizayti Yesus Kirstoosi isttas Godaa gididayssa eridi ammanida gishshas goodeteththinne waayey istta bolla gakkida wodenna. Xaafezi maxaafaza nababizayti ba hidota qanxxontta mala istta minththeththanaassinne bana gakkida goodeteththaninne meto garsan istti ba ammanon minni eqqana mala minththeththanaassa.
Ha maxaafan dariza baggay daro dumma dumma oyketti diza ajjuutata issi bolla gaththi oykkides; ajjuutatikka he wode diza ammaniza asay eranaas dandayzaaz gidishin hankko asaas qasse gelontta xuura gididi shiiqida leemiso malan shiiqida yo7okko. Shiri shiri yexxiza mala maxaafazas waanna qofati dumma dumma ajjuutata baggara dumma dumma medhan zaaretti zaaretti shiiqida. Ha maxaafaza birsheththi dumma dumma gidikkoka izas ayfe qofay qasse qoncce. Hessika Xoossi Godaa Yesusa baggara nam7anththoy baynda ogera Xala7era iza morkketa wursi xoonana; he xoonozikka wuridaappe guye baas ammanettida ba laggetas izi ooraththa salonne ooraththa biitta anjjo laatissana gizayssa.
Ha Maxaafay Oykkida Kumeththa Qofa
Geloso 1:1-8
Koyro beettida ajjuuta 1:9-20
Laappun Woosa Keeththatas yedettida kiitata 2:1—3:22
Maxaafazanne laappun maatameta 4:1—8:1
Laappun xurumbata 8:2—11:19
Dawezanne nam7u do7ata 12:1—13:18
Dumma dumma ajjuutata 14:1—15:8
Xoossa hanqo xuu7a laappunata 16:1-21
Baabiloone kundeth, do7aza, wordo nabetanne daabulosa Xooneteth 17:1—20:10
Wurseththa pirda 20:11-15
Ooraththa salo, ooraththa Biittanne ooraththa Yerusalaame 21:1—22:5
Kuushsha qofa 22:6-21
1
1 Hayssi ajjuutazi mata wode biitta bolla hananayssa baas ooththizayta bessana mala Xoossi Yesus Kirstoosas immidayssa. Yesus Kirstoosikka ba kiitanchcha kiittidi ba oosanchchaza Yohannisas hayssa ajjuutaza qonccisides.
2 Yohannisikka Xoossa qaalaa gishshassinne Yesus Kirstoosi tamaarsida tumaa gishshas qasseka izi ba ayfen be7idayssaka ubbaa markkattides.
3 Hayssi wurikka hananay mata woden gidida gishshas hayssa tinbite qaalaa nababiza asi anjjettidaade. Hessaththoka tinbite qaalaa siyizaytinne ha tinbite qaalaa xaafettidayssa poli ooththizayti istti anjjettidayta.
Iisiyan Diza Laappun Woosa Keeththatas Kiitettida Saroka
4-5 Iisiyan diza laappun Woosa Keeththatas kasekka dizayssafe, ha7ikka dizayssafenne burokka yaana Xoossaafe iza alga sinththan diza laappun ayanatappe hessaththoka hayqoppe denththan bayra gididayssafe, ha biitta kawotas kawonne ammanettida markka gididayssafe, nuna siiqizayssafenne ba suuththan nuna nu nagaraappe geeshshida Yesus Kirstoosappe kiyateththinne saroteththi inttes gido.
6 Nuni Yesus Kirstoosa aawaa Xoossaas ooththana mala nuna izi kawotanne qeeseta kessida Yesus Kirstoosas bonchchoynne wolqqay mernaappe mernaa gakkanaas izas gido! Amiin.
7 Hekko izi saloppe shaarara gita bonchchora yaana; kase iza caddi wodhidaytikka issoyka attontta wuri iza beyana; biitta bolla diza dereykka wuri iza gishshas yeekkana. Hayssi ha yo7ozi tumukko! Amiin.
8 Kasekka, ha7ikka dizayssi buroppeka Yaanayssi ubbaa dandayza Godaa Xoossi, «Alfaynne Oomegay, Koyroynne Wurseththi tana» gees.
Ajjuutan Kirstoosa Qonceth
9 Tani Yesusa waayeza iza kawoteththaa qasseka iza dandayan inttenara issife gidida ta intte ishay Yohannisi Xoossa qaalaninne Yesusas markkattida gishshas qashettada Fiiximo geetettiza abba giddon diza dere daarin days.
10 Tani Godaa gallas Xillo Ayanan dhisko mala coo liphiphi gishin dinke giirissa malay gita giirissi taappe guyera,
11 «Neni be7izayssa waraqatan xaafada laappun Woosa Keeththatas heytikka Efesoones, Samerneeses, Phergamoones, Tiyaxiroones, Sardeeses, Filadelfiyassinne Lodoqiyas yedda» gishin siyadis.
12 Hessa taas ooni yootidaakko erana gaada ta guye simma xeelliza wode xomppe istta bolla woththiza worqqafe oosettida laappun ballata beyadis.
13 He istta bolla xomppe woththiza laappun ballata giddon asa naa misatizaade demmadis. Izikka hirki toho qirphe gakkiza adussa may7o may7ides; tira bollaka worqqa may7o may7ides.
14 Iza hu7eynne iza hu7e binanay qasse booththa shach misatiza booththa suufe geetettiza kaththa mala; iza ayfetikka tama laco misateettes.
15 Iza tohoti tama bonqon qoxetti kezida xarqimala misateettes; iza qaalaykka wolqqama piissa haaththa giirissa mala giirees.
16 Izi ba ushachcha kushen laappun xoolintteta oykki uttides; iza doonappe nam7u baggara qara mashshay kezees; iza ayfesoy arshe mala xolqettees.
17 Tani hessa beyada hayqqida as misatada iza toho garsan kundadis; izi qasse ta bolla ba ushachcha kushe woththidi, «Ne babbofa! Koyroynne wurseththi tana.
18 Tani paxa days. Kase hayqqadiskoshin hekko tani hayssafe mernaas paxa daana; hayqo bollanne Si7oole bolla tani Godaa.
19 Hessa gishshas neni be7idayssa ha7i dizayssanne guyeppe hananayssa xaafa.
20 Neni ta ushachcha kushen be7ida laappun xoolinttetanne xomppe istta bolla woththiza worqqafe oosettida laappun ballata xuuray hekko hayssa; laappun xoolintteti laappun Woosa Keeththa kiitanchchata; xomppe istta bolla woththiza laappun worqqa ballati laappun Woosa Keeththata» gides.