7
Xeetanne Oyddu Tammanne Oyddu Shii Asaa Attameteth
1 Hessafe guye oyddu kiitanchchata biitta bolla oyddu baggara eqqidayta beyadis; isttika biitta bolla gidiin woykko abba bolla woykko miththa bolla ay carkoyka carkontta mala oyddu baggara yiza bosha carko wursi oykkida.
2 De7o Xoossaa maatame oykkida hara kiitanchchay arshey mokkiza baggara haa yishin ta beyadis; biittanne abba qohanaas isttas godateththi imettida oyddu kiitanchchati ba qaalaa dhoqqu histtidi,
3 «Nuni nu Godaa oosanchchata liiphe bolla maatame woththana gakkanaas biitta bolla gidiin woykko abba giddon dizayta gidiin woykko Miththata gidiinkka heytantta qohopite» gi waassides.
4 Tanikka maatamey istta bolla wodhdhidayta qoodaa siyadis; Isra7eele asaa kochcha ubbaafe maatamey istta bolla shocettidayta qooday xeetanne oyddu tammanne oyddu shii asa.
5 Yuhuda qommofe
tammanne nam7u shii,
Erobeele qommofe
tammanne nam7u shii,
Gaade qommofe
tammanne nam7u shii,
6 Aaseere qommofe
tammanne nam7u shii,
Niftaaleme qommofe
tammanne nam7u shii,
Minaase qommofe
tammanne nam7u shii,
7 Simoona qommofe
tammanne nam7u shii,
Lewe qommofe
tammanne nam7u shii,
Yisakoore qommofe
tammanne nam7u shii,
8 Zaabiloone qommofe
tammanne nam7u shii,
Yooseefe qommofe
tammanne nam7u shii,
Biniyaame qommofe
tammanne nam7u shii.
Booththa May7o May7ida Daro Dere
9 Hessafe guye ta xeellishin qooday baynda daro derey dizayssa beyadis; heytanttika dereppe, dumma dumma qommofe, dumma dumma zarkkefenne dumma dumma qaala haasayzaytappe shiiqettidayta. Heyti wuri booththa may7o may7idi zamba hayth ba kushen oykkidi algaa sinththaninne dorsaza sinththan eqqida.
10 Qaala dhoqqu histtidi,
«Atoteththi algaa bolla uttida
nu Godaappenne dorsazappeko!» gida.
11 Iza kiitanchchati wurikka iza algaas, cimatanne oyddu do7ata yuuyi aadhdhi eqqida algaza sinththan gufannidi Xoossas goynnida.
12 «Amiin! Sabay, gitateththi,
erateththi, galatay, bonchchoy,
wolqqaynne minoteththi
nu Godaas Xoossaas
mernaappe mernaas gido.
Amiin!» gida.
13 Cimata giddofe issaadey taakko simmidi tana, «Hayti booththa may7o may7idayti oonanttee? Istti awappe yidaytee?» gides.
14 Tanikka, «Godawu! Ne eraasa» gadis. Izikka taas, «Hayti wolqqama waayeza kanththidi yidayta; istti ba may7oka dorsaa suuththan meecci geeshshida.
15 Hessa gishshas Xoossa algaa sinththan de7idi qammanne gallas iza keeththan izas ooththeettes; algaa bolla uttidayssi ba bonchchora beettidi isttas kuwaso gidana.
16 Hayssafe guye istti gafettenna; saamottettenna; arshe seelaykka istta bochchennanne hombeyka istta hombenna.
17 Algazas giddo addan uttida dorsay istta heemmizaade gidana; isttaka gede de7o haaththa pulttoy dizaso kaaleththana; Xoossi istta ayfeppe afunththaa quccana» gides.