1Sameela Maxaafa
Giddo Qofa
Sameela maxaafa koyrozi Isra7eele asay daannata ayso wogappe gede kawoy ayssiza wogaan pinnida hanota qonccisees. Hessa mala laamey Isra7eelen hananaas dandayday daro bagga heedzdzu asata gaasonna. Heytikka koyrozi wurseththan dendida gita daannatappe issoy Sameela; nam7anththozi Isra7eeles koyro kawo gidida Sa7oole; heedzdzanththozi izi maata oykkanaappe kase iza taarikey Sameela taarikeranne Sa7oole taarikera issife oyketti diza Dawite.
Hayssa ha maxaafaas waanna kiitay Gal7a Caaqo Maxaafan diza hara taarike maxaafata mala Xoossas ammaneteththay anjjoninne lo7o duussan gaththees; azazeteth ixoykka kundeththassinne bashshas gaththizayssa bessees; hessika Xoossay qeese Eeles, «Tana bonchchizayta ta bonchchana; tana kadhizayta tani kawushshana» giidi izi yootida qaalay qoncci beettides. (2:30)
Hayssi ha maxaafay kawoy waani kawotanaakko diza dumma dumma qofata qonccisees; hessafe sinththe Isra7eelen tumu kawo geetetti erettiday Xoossa; gido attiin guyeppe derey oychchida oysho gaason Xoossi isttas kawo doorides. Hessa gidikkoka ayfe yo7oy kawozappenne Isra7eele deraappe bollara pirdiza Xoossa garsan istti dizayssa (2:7-10). Hessika Xoossa woga giddon dureta gidiin woykko manqota gidiin istta maatay issi gina naagettanaas bessizayssa erisees.
Ha Maxaafay Oykkida Kumeththa Qofa
Sameeli Isra7eele kaaleththizaade gideth 1:1—7:17
Sa7oole kawoteth 8:1—10:27
Sa7ooli deraa ayssida koyro layththata 11:1—15:25
Dawitenne Sa7oole 16:1—30:31
Sa7oolenne iza nayta hayqo 31:1-13
1
Hilqaananne Iza Keeththa Asata
1 Efreeme deren Eramaate-Zufime geetettiza shaara menththon diza Hilqaana geetettizaadey dees; izikka Efreeme dere asa; izi Yirohaame naa, Eelihu naa, Toohu naa, Zuufe naa.
2 Izas Haannanne Finaana geetettiza nam7u machcheti deettes; Finaanas nayti deettes; Haannas gidikko aykko naykka deenna.
3 Hilqaanay Ubbaa Dandayza GODAA goynnanaassinne izas yarsho shiishshanaas layththan layththan ba diza katamappe pude Seelo kezees; heen Eele naa nam7ati Afineynne Finihaasi GODAA qeeseta.
4 Hilqaanay Seelo biidi yarsho yarshiza wodey gakkida wode ubbaan ba machcho Finaanas, izi attuma naytassinne macca naytas ubbaas ashozappe istta gakkiza gisha isttas immees.
5 Gido attiin izi Haanna siiqiza gishshas ashozappe izis nam7u kushe immees; gidikkoka GODAY izo maynissi woththides.
6 GODAY izo maynissi woththida gishshas izi dawuththaya izo hanqeththawussinne yiillochchawus.
7 Hessika layththan layththan pacey baynda hanees; Haannay GODAA keeth yiza wode ubbaan iza yeekkanaashenne kaththa muussi izo xoonanaashe gakkanaas dawuththaya izo yiillochchawus.
8 Hessa geedon izi azina Hilqaanay izo, «Haannee! Ays yeekkay? Ays kath miikkii? Ne wozinay ays ceecizee? Tani nees tammu attuma naytappe aadhdhikinaa?» gishe takkides.
Haannay Godaakko Shiishshida Woosa
9 Issi gallas istti Seelon dishe miidinne uyidaappe guye Haannay denda eqqadus. He wode qeese Eeley Xoossa Keeththa pengen qosilaththa achchan oyde bolla uteththan dees.
10 Haannay izi wozinay meqqida gishshas hiqima yeekkashe GODAA woossadus.
11 Izakka, «Ubbaafe Wolqqama GODAWU tana ne aylley kawushshateththaa ne haa xeellada tana ne qoppikonne tana ne aylleyo balontta ne taas attuma naa immiko izi ba de7o layth ubbaan nees gidana mala tani iza GODAAS immana; magallaykka iza hu7e binana bochchenna» gawus.
12 Haannay GODAA aggontta woossashe takkiin Eeley izi doona xeellides.
13 Haannay aykkoka qaala sissontta wozinan woossiza gishshas izis metershay xalla qaaxxees. Hessa gishshas Eeley izo maththottida asa mala qoodides.
14 Izikka izo, «Hanne ne ayde gakkanaas hayssaththo maththottanee? Neni hessa woyne ushshaa neeppe digga!» gides.
15 Haannayka izas, «Ta godawu ta maththottabeekke; tani keehippe wozinay meqqida maccassa; hessa gishshas tani ta wozina GODAA sinththan miccayssife attiin woyne ushshu gidiin woykko hara maththosiza ushshu ta uyabeekke.
16 Tani hayssa keena adussa woosa woossiday deexo metoynne ceecey tana gakkidayssafe dendidayssan gidida gishshas tana ne oosanchchayo issi go7ay baynda shufuro maccassa mala qoodoppa» gadus.
17 Eeleykka izo, «Saron ba, Isra7eele Xoossi ne woossoyssa nees immo» gides.
18 Izakka izas, «Ne aylleya ne sinththan teema demmu!» gadus. Iza dendada ba oge badus; kaththika madus; hessafe guye izi bolla ceecey beettibeenna.
Sameela Yeleteth
19 Wonteththa gallas Hilqaanaynne izaso asay maalado wonttara dendidi GODAA goynnidaappe guye banttaso gede Eraama bida; Hilqaanay ba machcho Haannara aqides; GODAYKKA izo qoppides.
20 Histtiin Haannay qanththatadus; izis wodey wuriin attuma naa yeladus; naaza sunththaaka, «GODAAPPE woossada demmadis gashe Sameela» ga sunththadus.
Haannay Sameela Godaas Immadus
21 Hilqaanay GODAAS layththan layththan shiishshiza yarshoza yarshanaassinne ba adinettida adinaa gaththanaas baso asaa ubbaa ekkidi Seelo kezides.
22 Gido attiin Haannay isttara babeekku; iza ba azinaas, «Yidhazi dhanth duuththidaappe guye tani efada GODAA sinth shiishshana; izikka ba de7o layth ubbaan heen de7ana» ga yootadus.
23 Izi azina Hilqaanaykka izis, «Nees lo7o misati beettidayssa ooththa; ne dhanththi duuththanaashe gakkanaas hayssan takka; Xoossi nees immida hidota qaalaa xalla polo» gides; hessa gishshas Haannay yidhaza dhanth duuththanaashe gakkanaas bason uttadus.
24 Naazi dhanth duuththidaappe guye izara heedzdzu layththa wofano, tammu kilo dhiillenne issi lukkamo kumeth woyne ushshu ekkada gede Seelon diza Xoossa keeth efadus; naazikka buro yidha.
25 Kormaza shukkidaappe guye yidhaza ekkidi Eelekko shiishshida.
26 Haannayka Eele, «Ta godawu, shemppo gam7a; hayssan ne sinththan eqqada GODAA woossida maccassaya tanakko!
27 He wode hayssa ha naaza immana mala woossadis; GODAYKKA ta woossidayssa taas immides.
28 Hessa gishshas tanikka ha7i zaarada GODAAS iza immays; izi ba de7o layth ubbaan GODAAS imettidayssa gidana» gadus; hessafe guye heen GODAAS goynnida.