Phawuloosi
Ximtoosas
Xaafida Koyro Kiita
Giddo Qofa
Ximtoosa geetettiza issi naateththa nay izaskka yeleta derey qeeri Iisiya gidishin, iza aayeya Ayhuda as; aaway qasse Girike as. Izi Mishiraachcho qaalaa ooson Phawuloosara issife ooththiza mata lagge. (Hawa 16:1-3) Phawuloosi Ximtoosas koyro xaafida kiitazi heedzdzu ayfe yo7ota oykkides.
He kiitazan ayfe qofay sinththatidi Woosa Keeththa garsan dendida wordo timirtefe asay naagettana malassa. Ha wordo timirtezi baggay Ayhudatappe baggay qasse Ayzaabeta qofaa oykkidaaz gidishin, «Hayssi ayfen beettiza alamezi nagaran moorettida gishshas asas paxeteththi beettanay hara dumma dumma xuura erateththaninne issi issi qumata montta agon, ekkonttanne gelontta agonkko» giza qofaa. Hessafekka bollara iza kiitazi Woosa Keeththa ayso gishshassinne Xoos goyno gishshas tamaarsiza wogay hessaththoka Woosa Keeththa cimatinne istta maaddizaytas de7anaas bessizay aazakko yootees. Wurseththan Ximtoosi Yesus Kirstoosas lo7o oosanchcha waani gidanaas bessizaakko izas dumma dumma ammanizayta bolla diza alaafeteththaa gishshas Phawuloosi izas immida zore beyoos.
Ha Maxaafay Oykkida Kumeththa Qofa
Geloso 1:1-2
Woosa keeththa gishshassinne Woosa Keeththa garsan ooththizayta gishshas 1:3—3:16
Ximtoosas iza ooso gishshas imettida timirte 4:1—6:21
1
1 Nuna ashshida Xoossaan, nuus hidota gidida Yesus Kirstoosa azazon Hawaare gidida Phawuloosappe
2 Ammanon taas tumu naa gidida Ximtoosas Xoossaa nu Aawappe nu Godaa Yesus Kirstoosappe kiyateththi, maaroteththinne saroy nees gido.
Wordo Astamaaretappe Naagettana Mala Imettida Azazo
3 Tani Maqidooniya bashe nena hadara gida mala hayssafe sinththan issi issi asati wordo timirte tamaarsontta mala ne azazanaas Efesoonen daashsha.
4 Qasseka asay yootiin wurontta beni wode haysi7en ba wode wursontta mala azaza; heyta mala yo7oy palama denththeththees attiin ammanon oosettiza Xoossa oosos aykkoka go7enna.
5 Ha azazozas waanna ayfe yo7oy gidikko geeshsha wozinappe lo7o qofara hessaththoka tumu ammanoppe beettiza siiqo.
6 Issi issi asay haytappe pooqqi eqqidi go7ay baynda yo7otakko simmides.
7 Wogaa tamaarsizayta gidana mala koyeettes; gidikkoka istti ba yootizayssa woykko keehi mootettiza yo7oza lo7eththi erettenna.
8 Gido attiin asi maaran go7ettizaakko wogay lo7o gididayssa nu eroos.
9 Qasseka wogay imettiday xillo asas gidontta wogaa yedhdhi aadhdhizaytas, azazettonttaytas, Xoossas babbonttaytas, nagaranchchatas, geeshshateththi bayndaytas, Xoos leqqizaytas, ba aayonne ba aawaa wodhizaytassinne shemppo wodhizaytas gididayssa nu eroos.
10 Hessaththoka laymatizaytas, addera aqiza addetas, as bayzizaytassinne shammizaytas, wordanchchatas, asas wordora caaqqizaytas, lo7o timirtera eqettiza ubbatassa.
11 He lo7o timirtey anjjettida Xoossi taas hadara immida bonchcho mishiraachcho qaalara gaaggizayssa.
Phawuloosas Imettida Xoossa Imota
12 Tana ba oosos shuumidinne ammanettizaade histti ekkidinne taas minoteth immida nu Godaa Yesus Kirstoosa ta galatays.
13 Hayssafe kase ta ay mala as cayizaadenne goodeththizaade, qasse makkalla as gidikkoka hessa ta eronttanne ammanontta dashe ooththida gishshas Xoossi tana maarides.
14 Yesus Kirstoosappe gidida ammanoranne siiqora nu Godaa kiyateththi taas keehi darides.
15 Yesus Kirstoosi nagaranchchata ashshanaas duge hayssa ha alame yides giza qaalay tumanne asi wurikka ekkanaas bessizayssa. Nagaranchchatappeka aadhdhiza nagaranchchay tana.
16 Gido attiin ta maarettidaykka Yesus Kirstoosi zaway baynda ba dandayaa, ubbaafe aadhdhida nagaranchcha gidida ta bolla bessiday izan ammananaytassinne mernaa de7o demmanaytas leemiso gidana malassa.
17 Hessa gishshas mernaas hayqqi erontta, ayfen beetti erontta barkka xalla Xoos gidida kawos mernaappe mernaa gakkanaas izas bonchchoynne galatay gido. Amiin.
18 Ta naa Ximtoosaa! Ne gishshas kasetidi yootettida mala hayssa azazoza ta nees immadis; hessika ne he qaalaa kaallashe lo7o baaxe baaxetanaassa.
19 Ammanoynne lo7o qofay nees de7o; issi issi asati ba lo7o qofaa yedhdhi aadhdhidi abba bolla metoy iza bolla gakkiin waayettiza markabe mala ba ammano dhayssida.
20 Istta giddon Xoossa cash aggidi taamarana mala tani Xala7es aaththa immidayti Hemenewoosinne Iskindiroosi deettes.