Phawuloosi
Titoosas
Xaafida Kiita
Giddo Qofa
Titoosi Ayzaabeteththafe simmi ammanon gelidi Phawuloosa, Mishiraachcho qaalaa ooson matan maaddiza izas adda erettida lagge. Phawuloosi hayssa ha kiitaza xaafiday baappe layththan yoogizanne izara matiza banara issife ooththiza Titoosas gidishin Titoosi he wode Woosa Keeththa xeellishe Qarxeese geetettizason dees; ha kiitay lo7eththi minththizay heedzdzu ayfe yo7ota bolla.
Koyroy Woosa keeththa cimati harappeka Qarxeese asaas iita ooso gishshas isttas ay mala lo7o oosoy bessizaakko Titoosi istta tamaarsana mala Titoosa qofsees. Nam7anththozi Woosa Keeththa giddon diza dumma dumma butten hessika cimmida maccassatanne attuma asaa; hessaththoka naateththa naytanne asas ooththi aqizayta izi tamaarsana bessizayssa tamaarsana mala Titoosa zorees. Wurseththan qasse ammanon duussa gishshas harappeka asay saroninne siiqoteththan de7ana malassa; hessaththoka Woosa Keeththa giddofe issoy issaa ixo, ooshshinne ba garsan shaaketeth aggana mala Titoosas zore immidi ooththana oge bessides.
Ha Maxaafay Oykkida Kumeththa Qofa
Geloso 1:1-4
Woosa keeththa kaaleththizayta 1:5-16
Woosa keeththan diza dumma dumma asatas imettida ooso 2:1-15
Zorenne naagettana mala qofso 3:1-11
Kuushsha qofa 3:12-15
1
Woosa Keeth Kaaleththizaytanne Wordo Astamaareta
1 Xoossas doorettidayta ammanoninne Tumu Ayanan kaaleththiza tumaa erateththan dichchana mala Xoossa ayllenne Yesus Kirstoosa Hawaare gidida Phawuloosappe,
2 iza ammanoynne erateththay kaseppe oykkidi wordotontta Goday daro wodeppe kase ba immida mernaa de7o hidota mala.
3 Izi kase gida wodey gakkida mala nuna ashshida Xoossaa azazon taas sabbakanaas imettida hara baggara Xoossi ba qaalaa qonccisides.
4 Nuus koththe gidida ammano issifeteththaan, ammanon taas tumu naa gidida Titoosas, «Xoossaa Aawappenne nuna ashshida Yesus Kirstoosappe kiyateththinne saroteththi nees gido» gides.
Qarxeesen Titoosa Ooso
5 Ta nena Qarxeesen aggiday buroppe giigana bessiza daro miishshi diza gishshas ne giigsanaassinne ta nena azazida mala katamay dizason Woosa Keeththa cimata ne dooranaassa.
6 Cimateththan doorettanayti istta bolla wosoy bayndayta, issi machchi azinata, nayti ammanizaytanne waayisonttayta woykko azazettiza nayta aawata gidetto.
7 Woosa keeththa cimay Xoossas ooththana hadara ekkidaade gidida mala iza bolla wosoy bayndaade gidanaas bessees; hessika ceeqettizaade, guuththa miishshan yiillotizaadenne maththottizaade, ushshanchchanne izas bessontta ogera go7a gididaaz gooddi ekki bizaade gidanaas bessenna.
8 Hessafe bollara izi imath mokkizaade, lo7o ooso dosizaade, barkka bana haarizaade, suure as, xillonne baas naagettizaade gidanaas bessees.
9 Hara asata lo7o timirten minththeththizaadenne he lo7o timirteza ixxizayta hanqanaas ba tamaarda mala qaalaan minnizaade gidanaas bessees.
10 Waayisizaytinne doonan xalla baleththizayti daroti deettes; harappeka heyti qaxxarettida Ayhuda asatappe ammanida asata baggata.
11 Heytantta co7u histteth bessees; gaasoykka istti bessontta ogera baas go7a demmanaas bessontta timirte tamaarson keeththa asaa wursi mooron deettes.
12 Istta nabetappe issaadey istta gishshas haasayshe, «Qarxeese asay ubba wode wordanchchata, iita do7ata, ganjamatanne azallata» gides.
13 He markkateththay tuma; hessa gishshas ne istta lo7eththa hanqetta; gaasoykka isttas tumu ammanoy daana malanne,
14 Ayhudata haysi7e woykko tumu yo7oppe haakkida asata azazo istti siyontta malassa.
15 Geeshshatas miishshi wurikka geeshsha shin tunatassinne ammanonttaytas gidikko wurikka tuna; harappeka istta qofay wurikka tunides.
16 Istti bana nuni Xoos eroos geettes shin ba hanoteththaan gidikko kaddeettes; istti harassizayta, azazettonttaytanne lo7o oosos bessonttayta.