Zakaraasa Tinbite
Giddo Qofa
Nabe Zakaraasa maxaafay nam7u kezi shaakettides. 1. Shem 1-8 Kirstoosi yelettanaappe kase ichchash xeetanne nam7u tammu layththafe biidi ichchash xeetanne tammanne osppun layth gakkana diza layththata garsan dumma dumma wodetan nabe Zakaraasi yootida buroppe hanana qaalata oykkida kifiletakko. Heytikka he tinbite qaalati ajjuuta malan shiiqidayta gidishin Yerusalaame ooraxo gishshas GODAA keeththay simmi keexettanayssa gishshas, GODAY dereza buro geeshshanayssa gishshassinne sinththafe yaana Masiheza gishshas yootidayta. 2. Shem 9-14 gakkanaas diza kifilezi guyeppe takkidi hananayssa yootida qaalata. Heyti he buroppe hanana qaalati yootizay buroppe yaana Kirstoosa gishshassinne wurseththa pirda gishshassa.
Ha Maxaafay Oykkida Kumeththa Qofay
Koyro ajjuutay paratanne toga asata 1:1-7
Nam7anththo ajjuutay medosata kaceta 1:18-21
Heedzdzanththo ajjuutay wadha wodoro 2:1-13
Oydanththo ajjuutay nabe Zakaraasi qeeseta halaqa gishshas be7ida ajjuuta 3:1-10
Ichchashanththo ajjuutay xomppenne wogara miththata 4:1-14
Usuppunththa ajjuutay Piradhdhiza xaaththa maxaafa 5:1-4
Laappunththa ajjuutay Daachcho giddon diza maccassayo 5:5-11
Osppunththa ajjuutay para-gaareta 6:1-8
Iyaaso tiydi kawosana mala imettida azazo 6:9-15
Xoossi bessontta xooma ekkonttayssa 7:1-7
Azazettontta ixoy goodeteththas gaaso gideth 7:8-14
Xoossi Yerusalaame gishshas immida hidota 8:1-23
Xoossi ba dereza ashshidi istta morkketa qaxxayanayssa 9:1—11:3
Isra7eele asa kaaleththiza nam7ata 11:4-17
Yerusalaame xoono 12:1-9
Derezi olan cadettidayssas qadhettidi godaakko simo 12:10—13:9
Wurseththa olanne godaa xoono 14:1-21
1
Asay Xoossako Simmana Mala Goday Xeygees
1 Daariyoosi kawotida nam7anththo layththan osppunththa aginan GODAA qaalay Iddo naa Baraakaye naa Nabe Zakaraasakko yides;
2 «GODAY kase intte aawata bolla keehi hanqettides.
3 Ha7i gidikko asaas, ‹Taakko haa simmite; tanikka intteko simmana› gees Ubbaafe Wolqqama GODAY.
4 Kase nabeti intte aawatas, ‹Intte intte iita ogeppenne intte oosoppe simmite› giidi minththi yootida; gido attiin istti qasse siyibeettennanne ta azazokka naagibeettenna; hessa mala intte intte aawata mala hanopite.
5 Kase intte aawati ha7i awan dizoo? Nabetikka mernaas de7andettoo?
6 Gido attiin tani ta nabeta baggara yootida qaalatinne wogati intte aawata bolla gakkibeettennee? ‹Isttika maaroteththan gelththishe Ubbaafe Wolqqama GODAY ba koyida mala nu ooso malanne nu oge mala nuus bessizaaz nu bolla ooththides› » gida.
Zakaraasi Ajjuutan Beyida Parata
7 Daariyoosi kawotida nam7anththo layththan shebaaxe geetettiza tammanne issinththo aginan nam7u tammanne oydanththo gallassan GODAA qaalay Iddo naa Baraakaye naa Nabe Zakaraasakko yides.
8 Omarsa wode ajjuutan zo7o para toggida issaade be7adis; he izikka shoobba giddon barsineete miththata garsan eqqides; qasse iza guyera daama, zo7onne booththa parati deettes.
9 Tanikka, «Ta godo haytanti aazee?» gaada oychchadis; tanara haasayza kiitanchchazi qasse, «Haytanti istti aazakko tani nena bessana» gides.
10 He Barsineete miththa garsan eqqidayssi, «Hayti biitta ubbaa bolla simeretti xomosana mala GODAY kiittidayta» gides.
11 Isttika barsineete miththaa garsan eqqida GODAA kiitanchchaas, «Nu biitta ubbaa bolla simeretti xomosidos; biitta ubbay woppu giidi dees» gida.
12 Hessafe guye GODAA kiitanchchay, «Ubbaafe Wolqqama GODAWU! Laappun tammu layththatan ne istta bolla hanqettida Yerusalaamenne Yuhuda katamata ne ayide gakkanaas maarkkii?» gides.
13 GODAYKKA tanara haasayza kiitanchchaas ufayssiza qaalaninne minththeththiza qaalan malthe zaarides.
14 Qasseka tanara haasayza kiitanchchazi, «Hayssa qaalaa yoota; Ubbaafe Wolqqama GODAY, ‹Tani Xiyoonessinne Yerusalaames keeha qadhettays.
15 Gido attiin saroteth demmidi woppan diza kawoteththata keeha hanqettadis; hessas gaasoykka tani ta dereza bolla guuththara hanqettiin kawoteththati ta qofappe bollara ta deraa qohida› gides.
16 «Hessa gishshas Ubbaafe Wolqqama GODAY, ‹Tani ta maaroteth Yerusalaames immana; heenkka ta keeththay simmi ooraxidi keexettana; Yerusalaame katamayakka wodoron wadhettana› gees.
17 «Kaaleththidikka kiitanchchazi, ‹Ubbaafe Wolqqama GODAY ta katamati keehi duretana; GODAY Yerusalaame kase mala maaddananne ba katama histti doorana› » gi awajjite.
Zakaraasi Ajjuutan Beyida Oyddu Kaceta
18 Hessafe guye ajjuutan oyddu kaceta be7adis.
19 Tanara haasayza kiitanchchaza, «Hayti aazee?» ga oychchadis; izikka, «Hayti Yuhuda asa, Isra7eele asanne Yerusalaame asaa laallida kaceta» gides.
20 Hessafe kaaleththidi GODAY naariqa oykkida oyddu wogaceta tana bessides.
21 Tanikka, «Haytanti ay ooththana yidoo?» ga oychchadis. Izikka, «Hayti oonikka dhoqqu gi xeellontta mala Yuhuda biitta laallida kaceta; ha wogaceti yiday istta daganththanaassinne deraa laallanaas Yuhuda bolla bantta kace denththida kawoteththata kace menththi olanaassa» gides.