3
Yerusalaames Sinththafe Yaana Qaada
1 Makkallanchchayssinne tunidaaris,
as un7eththizayta katamays
aayye ana!
2 Iza oonaska azazettuku;
ooni zoriinkka ekkuku;
GODAANKKA ammanettuku;
ba Xoossakokka shiiqukku.
3 Izo kaaleththizayti
xaaggiza gaammo mala.
Izo ayssizaytikka
wontos ashshontta
miza kana suyte mala.
4 Izin diza nabeti otoranchchatanne
as baleththizayta.
Qeeseti Xoossa Keeththa
tuniseettes;
woga bollaka makkalleettes.
5 Izin diza GODAY izi xillo.
Mulekka baletti erenna;
maalado maalado suure pirdees;
ubbaa gallassika daaburi erenna;
gido attiin makkallanchchatas
yeellay deenna.
6 GODAY, «Tani dereta dhayssadis;
istta miixay mulera dhaydes;
oonikka izara aadhdhontta mala
istta oge kayzisadis;
istta katamati mulera dhayda;
issi asikka deenna;
isttan de7anaykka deenna.
7 Ta he katamayo,
Tumappe neni taas yayyana;
ta seerishin ne ekkana gadis shin;
hessa gishshas
izi duussasoy dhayenna;
izi bolla qixaatey gakkenna.
Gido attiin ta derey iita ooson,
kaseppe gede
minni minni bides» gees.
8 GODAY,
«Hessa gishshas ta pirdana
gallassay gakkanaas diishshite;
tani dere asanne
kawota shiishshanaas qachchadis.
Tani ta mino hanqoza istta bolla
gussanaas qachchadis.
Ta hanqo taman
kumeththa biittay eexxana.
9 He wode asay ubbay
GODAA sunth xeygana malanne
sigan izas haggazana mala
ta istta doona geeshshana.
10 Tophphiya shaafatappe
he pinththan laaletti dishe
taas goynniza ta derey
taas yarsho ehana.
11 Intte ta bolla polida qoho
ubbaafe dendidayssan;
he gallas yeellatekketa;
ba otoreteththan ufayettizayta,
hanno ha katamayppe ta diggana.
Hessafe guye ta geeshsha zuman,
intte ta bolla otoretteketa.
12 GODAA sunththan ammanettiza;
ashketanne banttana
kawushshizayta;
ta intte giddon ashshana.
13 Isra7eeleppe casha attidayti
nagara oosettenna.
Wordo haasayettenna;
Istta doonankka
gene haasayay deenna.
Hessa gishshas istti miidi
saron de7ana;
istta babisana miishshika deenna.
14 Hanne Xiyoone nayee ane yexxa!
Isra7eele asawu ane ililite!
Hanne Yerusalaame nayee!
Kumeththa wozinappe ufayetta!
Ufayettashe hashshu ga!
15 GODAY ne bolla
yiza qixaateza diggides;
ne morkketakka neeppe zaarides.
GODAY Isra7eele kawoy
nenara dees;
hayssafe guye
ay iitasikka babbaka.
16 He wode asay Yerusalaames,
‹Xiyoone ne babbofa;
ne qesey daaburoppo.
17 GODAA ne Xoossay nenara dees;
izi ashshiza mino olanchcha.
Izi nenan daro ufayettees;
izi ba siiqon nena woppisana;
ne yeththan izi bonchchettidi
ufayettana› gaana.
18 «Bonchcho ba7aale gallassati
attida gishshas
neni muuzottidayssanne,
nees tooho gidida yeellaa
ta neeppe diggana.
19 He wode nena un7eththidayta
ta qaxxayana.
Wobbeta ta ashshana;
laalettidaytakka
ta shiishshana.
Istti kawuyida dere ubbaan
ta istta bonchchosinne
sabas gaththana.
20 He wode ta inttena shiishshana;
intte dere ta inttena zaarana.
Intte intte ayfera beyishin,
inttefe di7ettida miishshaa
ta inttes zaariza wode
biitta bolla diza
dere ubbaa sinththan
ta inttes sabanne
bonchcho immana» gees.