7
Nhumanydja yolŋu walala dhuwala nhanŋuwaynha yanana gal'ŋu
7:1–11 (You are the Lord’s own people)
1 “Yo, ŋayi yurru Godthunydja gämana nhumalanha ŋunhimalayina wäŋalili ŋunhi ŋayi dhawu'‐nherrara nhumalanha nhanŋuway ŋunhi yolŋu'‐yulŋunha, bala wäŋanydja ŋunhiyi yurru nhumalaŋguway yana, yurru ŋäthilinydja nhuma yurru gukuma ŋunhiyi wiripu‐guḻku'nhanydja yolŋunha walalanha, ŋunhi walala ŋuli yukurra nhina ŋunhili wäŋaŋura. Ŋunhiyi wiripu‐guḻku' yolŋu walala biyapulnha wal'ŋu yätjmirrina yanana, ga ḏälmirrina, djuḻkmaramana yukurra buluna gal'ŋu nhumalanhanydja, yurru nhumanydja yurru gukuma warray walalanha, yana dhawaṯmaramana walalanha ŋuliŋuruyi yurru, liŋgu Garrayyu nhumalaŋgalanydja Godthu yurru wekama walalanha nhumalaŋgalana goŋlili, bala nhuma yurru baḏuwaḏuyunna yana walalanha.
2 Yo, nhuma yurru baḏuwaḏuyundja walalanha warrpam'thunna yana wal'ŋu; yakana yurru yana walala ŋunhiyi yolŋu walala nhina nhumalaŋgala galki, ŋunhi walala yaka nhina yukurra Godkala romŋura. Yaka waŋgany‐manapanmiya walalaŋgalanydja, ga yaka walalaŋgu biyaka mel‐wuyurranydja, yana nhuma yurru walalanha warrpam'thun baḏuwaḏuyundja, märr yurru walala yaka muka nhumalanha gäma yätjlilinydja.
3-4 Nhumalaŋgala gäthu'mirriŋuyu walalay yurru yaka märrama dhäykanha ŋuliŋuruyi malaŋuru, ga yaka wekaŋa nhuŋuway miyalknha gäthu'mirriŋunha walalaŋgalaŋuwu ḏarramuwurruŋgu, märr yurru walala yaka bilmarama nhumalaŋgu yumurrku'nha gatjpaḻ'marama wiripuŋulili dhukarrlili. Ŋuli nhumalaŋgala yurru djamarrkuḻi'yu meṉguma ŋarranhanydja, ga märr‐nherraṉmirri wiripuŋuwalanydja waŋarrwala, bala ŋarranydja yurru ŋunhi ŋaramurryirrina yanana, ga waḏutja yana ŋarra yurru baḏuwaḏuyundja warrpam'thun dhawar'marama walalanha.” Bitjarra ŋayi Garray waŋananydja.
5 “Yaka yana walala märr‐ŋal'yurra wiripuŋuwunydja waŋarrwu, yana nhuma yurru ḏaw'‐ḏawyurrana marrtjiya ŋunhiyi walalaŋgu waŋarrnhanydja malaŋunha, ga ŋunhiyi buku‐ŋal'yunarawu nhuma yurru ḏaw'‐ḏawyurra biyakana muṉguykuŋana warrpam'thurrana. Guḻk‐guḻkthurrana biyakana ŋunhiyi dharpanhanydja malaŋunha ŋunhi walala ŋuli nherra'‐nhirraṉ buku‐ŋal'yunarawu, ga dhuŋgur'yurrana dhika nhänydja malanha maḏayin'tja girri'ŋunhi walala yukurra waŋarr‐ḻakarama.
6 Warrpam'thurrana yana baḏuwaḏuyurranydja, liŋgu nhumanydja dhuwala nhanŋuwaynha yana dhulŋuŋuna Godkuna yolŋu walala. Ŋayi nhumalanha ganaŋ'maraŋalanydja nherrara ŋuliŋuruyi nhäŋuru malaŋuru, märr yurru nhumanydja nhanŋuwaynha wal'ŋu yanana, ŋunhi ŋayi Garray Waŋarr nhumalaŋgu.
7-8 Guḻku' dhuwali yulŋunydja miṯtjinydja yolŋunydja walala yukurra nhina ḻiw'marama wäŋakurrunydja, yurru nhumalanhawuy yana waŋganynha ŋayi Godthu djarr'yurrunanydja, bala nhanŋuwayliliyaŋalana ŋayi, märr yurru nhumanydja nhanŋuwaynha wal'ŋu yanana dhulŋuŋuna. Nhumanydja dhuwalinydja miṯtji ḻurrkun' warray yana, yaka warray guḻku', yana ŋayi Godthu nhumalanha djarr'yurrunanydja ŋuriŋina liŋgu ŋunhi ŋayi märr‐ŋamathina yukurrana nhumalaŋgu wirrki. Ŋayi guyaŋina ŋunhiyi dhäruk ŋunhi ŋayi dhawu'mirriyaŋala be ŋäthili baman' nhumalaŋgu märi'munha, ga dhiyakuyina märrwu ŋayi nhumalanha dhawaṯmaraŋalanydja ŋunhi ŋuliŋuruyi, ŋunhi nhuma yukurrana nhinana garrpiṉara; ŋayi nhumalanha dhawaṯmaraŋalanydja beŋuruyi goŋŋuru buŋgawawalanydja Yetjippuyŋuwalanydja ŋuriŋiyi nhanukalay ŋayi ganydjarryu.
9 Guyaŋiya ŋanya Waŋarrnha nhumalaŋguway Godnha, ŋunhi ŋayipi waŋgany yuwalktja wal'ŋu waŋarr; ŋayipi waŋganydhu ŋuli yukurra djäma ŋunhiyinydja ŋunhi ŋayi dhawu'‐nherrara. Bitjanna liŋguna yurru‐wala ŋayi yukurra märryu‐ḏapmarama yana ŋunhinhanydja yolŋu'‐yulŋunha ŋunhi walala yukurra ŋanya märryu‐ḏapmarama, ga ŋayathama nhanŋu rom yukurra; gupaḏalnha‐wala yana ŋayi yurru ŋunhinydja yolŋu dhäruk‐märranharamirrinydja nhina yukurra goŋmirrina dhikana wal'ŋu, ga bitjandhi liŋgu nhanŋu yurru yumurrku' ga gutharra'mirriŋu walala nhanŋu nhinanydja yukurra ŋunhili nhanukala Godkalanydja märr‐ŋamathinyaŋura.
10 Yurru wirrki yana ŋayi yurru Godthu dhä‐ḏir'yundja ŋunhinhanydja yolŋunha walalanha ŋunhi walala yukurra nyinyaŋdhun nhanŋu ŋuyulkthirri; walalanhana ŋayi yurru buma baḏuwaḏuyundja waḏutjanydja yana.
11 Dhiyakuyinayi märrwu nhuma yurru yukurra ŋayathama baṯ bitjanna ŋunhi romdja nhanukuŋu, ŋunhi ŋarra ḻakaraŋala nhumalaŋgu. Nhiniyanydja walala nhanukalay yana romdhunydja.”
Godthu yurru goŋmirriyamanydja ŋunhinhana yana dhäruk‐märranhamirrinhana walalanha
7:12–26 (God will bless those who obey Him)
12 “Yo, ŋunhi nhuma yurru ŋämanydja, bala dhäruktja märrama dhuwalayi malanha ŋunhi romdja nhanŋu Godku, bala ŋayinydja yurru nhumalanha Garrayyunydja goŋmirriyamana yana wal'ŋu, bitjan yana liŋgu bitjarra ŋayi dhawu'‐nherrara ŋäthili gal'ŋu; nhuma yurru yukurra nhinanydja ŋamathamana wal'ŋu nhanukalaynha märr‐ŋamathinyaraŋura.
13 Ŋayi yurru märr‐ŋamathirri nhumalaŋgu bitjan märryu‐ḏapmarama gal'ŋu, bala goŋmirriyamana nhumalanha, bala yana ŋayi yurru miṯtjinydja dhaŋaŋgumana marrtji, guḻku'kumana biyapulnha yurru. Ŋathanydja malanha yurru ŋuthanna marrtji, bena birrŋ'thunna yurru dhiyala munatha'ŋuranydja, ga biyapulnha yurru wäyindja guḻku'thirri marrtji nhumalaŋgu ḻukanharawunydja.
14-15 Yakana yurru nhumalaŋgu dhäykawurru ga ḏarramuwurru bitjan yothumiriwyirrinydja, ga bitjandhi liŋgu ŋayi yurru Garrayyu djaw'yundhi rerrinydja nhumalaŋgalaŋuŋuru, gukumana yurru ŋayi, yakana nhuma yurru yukurra rirrikthun birrka'mirriyu nhäyu malaŋuyu rerriyu. Ŋunhi yurru nhumalaŋgu miriŋu walala rirrikthunmirrinydja ŋunhi nhumalaŋgu walala yukurra ŋoy‐ŋorra, yurru nhumanydja ḏäwalamirri warray yurru nhina yukurra.
16 Ŋayipinydja yurru Garrayyunydja goŋ‐wekama nhumalaŋgala ŋunhiyi yätjmirrinhanydja yolŋu'‐yulŋunha, bala nhuma yurru baḏuwaḏuyunna walalanha, warrpam'thunna yulŋunydja. Yaka walalaŋgu mel‐wuyurranydja, ga yaka walalaŋgalaŋuwu waŋarrwunydja märr‐ŋal'yurra, liŋgu ŋuliwitjandhinydjayi romgurru nhumalanha yurru gaṯmaramana, ga ŋuriŋi walalaŋgala dhuwurryu yätjthu nhumalanha yurru buwayakkumana baḏuwaḏuyunna.
17 “Yaka nhäŋa walalanha barrarimirriyunydja ga waŋiya biyakanydja, ‘Way walalanydja ŋunha miṯtji guḻku' warray, ḏälmirri warray gal'ŋu ŋilimurruŋgalanydja. Nhaltjanna yurru ŋilimurru walalanha gukumanydja dhika.’
18 Yaka biyakayinydja waŋiya, ga yaka barrariya walalaŋgu, yana guyaŋiya ŋanyapinyay Godnha, nhaltjarra ŋunhi ŋayi baḏuwaḏuyurruna ŋunhiyi Yetjippuyŋunha buŋgawanha, ga bukmaknha nhanŋu miṯtjinha.
19-20 Liŋgu muka nhuma nhäŋala ŋanya Godnha yulŋunydja, ŋunhi ŋayi ŋarambiya' ŋaḏupthurruna, bala djämana ŋayi bathalana biyapulnha wal'ŋu rom. Nhuma marŋgi muka ŋunhi ŋayi dhawaṯmaraŋala nhumalanha ŋuliŋuruyi miriŋuwala goŋŋuru. Ŋayipi yurru Garrayyunydja barrari‐wukuma biyapul nhumalaŋgu ŋunhi miriŋunhanydja walalanha, märr yurru yakana ŋula waŋgany nhina yukurra djuḻuḻ'yundja; nhumanydja yurru yana walalanha warrpam'thunna baḏuwaḏuyundja.
21 Yaka walalambala biyaka barrariyanydja, liŋgu ŋayinydja Garraynydja nhumalaŋgala warray ŋunha gali'ŋura, ga ŋayi warray ŋunha biyapulnydja wal'ŋu ganydjarr‐ḏumurru.
22 Yo, yaka yana ŋayi yurru walalanha dhawaṯmarama waḏutjanydja, bitjan bili ŋayi yurru mitjpili' ga mitjpili' bala marrtji walalanha gukumanydja waṉḏinyamaramanydja, märr yurru nhumanydja marrtji gaŋdhunmarama ŋunhiyi wäŋanhanydja ŋamakurru'yu malaŋuyu bala yana.
23 Yo, ŋayi yurru Garrayyunydja barrari‐wukuma ŋunhinydja walalanha miriŋunhanydja nhumalaŋgu, yätjmirrinhanydja ŋunhinydja, gundupumana walala yurru yana nhumalaŋgala yulŋunydja, yana liŋgu ga warrpam'thun nhuma yurru baḏuwaḏuyun.
24 Yaka yurru ŋayi yukurra waŋgany ŋula ŋurruŋu wal'ŋu djingaryun ŋunhiliyinydja, ga yaka yurru ŋula waŋgany winya'yundja, yana nhuma yurru walalanha warrpam'thunna baḏuwaḏuyundja, ga yäkunydja walalanhawuy walala yurru yukurra meṉgunharamirrina.
25 Nhuma yurru gurthayuna yana dhuŋgur'yundja warrpam'thunna walalaŋgu waŋarrnhanydja walalanha, warrpam'thurrana yana wal'ŋu baḏuwaḏuyurrana winya'yunmaraŋana. Yaka djälthiya ŋuriki nhäku malaŋuwu be ŋamakurru'mirriwunydja, garwarrwarr'wunydja ga be nhäkunydja bulayiwu walalaŋgalaŋuwu waŋarrwunydja; nhumalanha ŋuli bäynha gaṯmaraŋu ŋuriŋiyinydja. Yo, waŋarryu nhumalaŋgala Godthunydja Garrayyunydja wirrki yana ŋayi yukurra nyamir'yun nyinyaŋdhundja ŋurikiyi maḏayin'kunydja malaŋuwu nhäkunydja, ŋunhi walala ŋuli yukurra ŋunhiyi yolŋu walala märr‐ŋal'yun ŋurikiyi.
26 Yaka nhumanydja yurru ŋayathama yukurra ŋunhiyi malanha maḏayin' malanha nhumalaŋgalay wäŋaŋuranydja. Ŋuli nhe yurru ŋayathamanydja ŋunhiyi be dhuyunydja girri' nhokalay nhe wäŋaŋura, bala ŋayinydja yurru Godthunydja nhuna yätj‐ḻakaramana, rrambaŋikumana ŋunhiyina malanha maḏayin'nha. Biyaka ŋuyulkthiyana ŋurikiyi ŋapana‐wekaŋa, liŋgu ŋayipinydja yukurra ŋunhi Garraynydja ŋuyulkthirri ŋurikiyi wirrki yana, warrpam'thunna yana ŋayi yurru baḏuwaḏuyundja ŋunhiyi malanha maḏayin'tja malanha.”