43
Djotjipku wäwa'mirriŋu walala marrtjina balayi roŋiyina Yetjiplili, Bindjamannhana gäŋala
43:1–34 (Joseph’s brothers went back to Egypt with Benjamin)
1 Walunydja marrtjina djuḻk‐djuḻkmaraŋalana, ga mukthurruna yana wäŋanydja yukurrana djingaryurruna warrpam' räwak.
2 Djaykupthu ga nhanukala yumurrku'yu yolŋu'‐yulŋuyu malayu ŋuriŋiyi ḻukanana marrtjina ŋathanydja dhawar'‐way dhawar'yurruna, bala ŋayi waŋana nhanŋuway gäthu'mirriŋunha walalanha ŋunhi, biyapul djuy'yurruna bitjarra, “Ma' nhuma marrtjiya biyapul ŋan' balayi ŋunhamalayi, ga ŋatha biyapul märraŋa ŋilimurruŋguway.”
3 Yurru ŋayi Djudanydja waŋana bitjarra, “Ŋayi ŋuriŋiyi ḏarramuyunydja yurru yakana ŋathanydja ŋilimurruŋgu wekama, ŋunhi ŋanapurru yurru goŋ‐wayŋumirrinydja marrtji; yaka ŋanapurru yurru gäma gutha'mirriŋunha ŋanapurruŋguway.
4 Ŋuli nhe yurru djuy'yun Bindjamannha warray ŋanapurruŋgala, ga ŋunhinydja ŋanapurru yurru marrtji warray ga märrama ŋatha ŋunhala.
5 Ŋuli nhe yurru yakanydja djuy'yun ŋanapurruŋgala ŋanya, ŋunhiyinydja ŋanapurru yurru yakana marrtji. Liŋgu ŋunhayi ḏarramunydja waŋana ŋanapurruŋgala, ŋunhi yakana ŋanapurru yurru marrtji goŋ‐wayŋunydja nhanŋu.”
6 Ga Djaykuptja waŋana walalaŋgala bitjarra, “Nhäku nhuma balaŋu ḻakaranhamirrinydja ŋunhi nhumalaŋgu dhuwala gutha'mirriŋu?”
7 “Ŋayi ŋunha yukurrana waŋana ŋunhayi ḏarramu dhä‐wirrka'yurruna yukurrana mukthurrunana ŋanapurrunha, ga waŋana ŋayi yukurrana bitjarra, ‘Be nhumalaŋgu bäpa'mirriŋunydja walŋa muka? . . . manymak muka ŋayi yulŋunydja? Wanhana ŋula nhumalaŋgu wiripunydja gutha'mirriŋu?’ Bitjarrana ŋayi marrtjina dhä‐wirrka'yurrunanydja ŋanapurrunha, bala ŋanapurru ḻakaraŋalana nhanŋu.”
8 Ga ŋayi Djudanydja waŋana bäpa'mirriŋuwala bitjarrana, “Wekaŋana ŋanya Bindjamannha ŋarrakalana dharraylili, bala ŋanapurru yurru marrtjina. Ŋunhi ŋanapurru ŋuli yakanydja marrtji, ŋilimurru yurru bukmaknha murrmurryun djaṉŋarrthinyarayu.
9-10 Ŋarra yurru nhanŋu djäka marrtji, yana liŋgu ga roŋiyirri ŋanapurru yurru walŋa yana. Ŋuli ŋayi winya'yurrunydja ga rakunydhinanydja, nhenydja ŋuli ŋarranhana baymatthurru.”
11 Bala walalaŋgu bäpa'mirriŋunydja waŋana, “Gatjuy marrtjiyana‐wala walala. Gäŋanydja walala nhanŋu ŋuriki buŋgawawunydja ḻatju'mirri yana mundhurr, guku ga ŋatha malanha ga ŋula nhä ŋamakurru'mirri nhanŋu.
12 Ga roŋiyinmaraŋayi ŋunhiyi malanha rrupiyanydja ŋunhi liliyi.
13 Gatjuy, gäŋana dhuwala nhumalaŋguway gutha'mirriŋunhanydja. Waḏutja yana walala marrtjiyanydja, ga ŋunhili, ga lilinydja yana waḏutja.
14 Mak Godtja yurru ŋarraku mel‐wuyun, märr ŋayi yurru roŋiyinmaramayi dhuwalanha Bindjamannha ga Djimiyannha liliyi ŋarraku.”
15 Bala ŋuriŋiyi wäwa'mirriŋuyunydja walalay djoṉguŋalana ŋunhiyi mundhurrnydja malanha, ga garr'yurruna Bindjamannhanydja, bala yana wäŋgaŋalana Yetjiplilina.
Wäŋgaŋalana walala marrtjina bala‐a‐a, yana liŋgu bur‐way ḏo'yurrunana ŋunhala Yetjipnha. Dhunupa walala withiyara ŋanyana Djotjipnhana, bala yana buku‐nyilŋ'thurrunana nhanŋu.
16 Djotjipthu nhäŋalana ŋanya Bindjamannhana walalaŋgala goŋlilina, bala ŋayi waŋanana nhanŋuway djämamirrinhana walalanha bitjarrana, “Dhuwalanhanydja walalanha märraŋana, ga garr'yurrana walalanha ŋarrakala wäŋalili. Ŋatha ŋathili gurrunharra ŋäthilimirriyaŋa, walala yurru ḻuka ŋayaŋayny'tja ŋarrakala.”
17 Yuwalkthi ŋuriŋiyi djämamirriyu walalay garr'yurrunana walalanha bala Djotjipkalana wäŋalili,
18 yurru wirrki ŋunhi wäwa'mirriŋunydja walala beyaṉiyinanydja, buku‐wuranana rrupiyayu ŋuriŋiyi malanyŋuyu ŋunhi walala maḻŋ'maraŋala yukurrana bathiŋura walalaŋgalay ŋäthili. Bala walala guyaŋina bitjarrana yanapi walalanha ŋayi ŋunhi garr'yurruna ŋilitjanarawuna dhä‐ḏir'yunarawuna; bitjarra walala guyaŋinanydja yukurrana, “Mak ŋayi yurru ŋilimurrunha dhuwala dhark‐dharkkumana ŋiniya ḻoḻulilina, ḏapṯapmaramana nhanŋu djämamirrinhana walalanha.”
19-22 Bala walala ḻakaraŋalana yukurrana djämamirriwanydja walalambala ŋurukuy rrupiyawuynydja, “Ŋay' dhuwalana rrupiyanydja ŋunhi ŋanapurru maḻŋ'maraŋala yukurrana ŋanapurruŋgalay bathiŋura malanyŋuŋura, ga dhuwala ŋanapurru ŋayathama yukurra wiripunydja rrupiya ŋathawu.”
23 Ga walala ŋunhi djämamirriyunydja walalay waŋana walalanha bitjarra, “Yaka nhuma barrariya, bili ŋayi mak nhumalaŋgalaŋuwala bäpa'mirriŋuwala Godthu waŋarryu ŋayipi ŋili'‐ŋilitjara roŋiyinmaraŋala liliyi nhumalaŋgala bathilili. Liŋgu warray ŋarranydja märraŋala rrupiya nhumalaŋguŋu.”
Ga ŋuliŋurunydja walala garr'yun ŋanyanydja dhawaṯmaramana Djimiyannhanydja ŋulaŋuru ḻoḻuŋurunydja, dhawaṯmaramana ga ŋunhimalayi waŋgany‐manapanna walalaŋgala.
24 Ga bitjandhi bili djämamirriyunydja walalay rurrwuyun yukurra djalkirinydja, ga biyapul walala yukurra ŋathanydja ga gapunydja wekama walalaŋgalaŋuwu yarraman'kunydja walalaŋgu.
25-26 Ga ŋunhi ŋayi Djotjiptja roŋiyirri beŋuru djämaŋurunydja, wäŋaŋuranydja buna, bala walala rarr'yunna marrtji nhanbala ŋunhi mundhurrnydja malanha, ga biyapul walala buku‐nyilŋ'thun yukurra nhanŋu Djotjipku.
27 Ga ŋayi walalanha dhä‐wirrka'yun bitjan, “Nhä nhumalaŋgu bäpa'mirriŋunydja? . . . walŋaŋga? Ga mukthun ŋayi nhina yukurra be walŋa yana?”
28 Ga walalanydja buku‐ruŋiyinmarama ŋunhi bitjan, “Ŋe, ŋanapurruŋgu mäḻuny'tja ŋunha walŋa muka, ga ḏäwala muka yukurra nhina.” Ga biyapul walala buku‐nyilŋ'thun, buku‐ŋal'yun nhanŋu Djotjipku.
29 Ga ŋunhi ŋayi nhäma Bindjamannhanydja nhanŋuway gutha'mirriŋunha, Djotjipthu bala waŋa bitjanna, “Dhuwalana ŋayi nhumalaŋgu yutjuwaḻany'tja gutha'mirriŋu? . . . ŋunhi nhuma ŋarraku ŋäthili ḻakarama?” Bala ŋayinydja waŋa Bindjamannhana bitjan, “Godthu yurru gäma nhuna ḻatju'kuma, ŋarraku gäthu.”
30 Bala ŋayi dhunupa bilyundja, bala gonha'yun walalanha, bala marrtji ganaŋ'thunna, liŋgu ŋayi ŋoy‐dhaŋaŋdhirri nhanukalaŋuwu gutha'mirriŋuwu Bindjamangu. Ŋayi bini ŋunhalana ŋäthinya ŋuli ya' bäymana gumurrŋurana walalaŋgala, yurruna ŋayi ŋunhi waḏutjanydja yana marrtji warraŋullilina dhawaṯthun, bala ŋunhala ŋayi yukurra gänana ŋäthi.
31 Ḏaḏawyun ŋäthinyaraŋuru mukthun, ga bukunydja rurrwuyunmirri, bala liliyi ŋayi gulŋiyirri, ga djämamirrinhana walalanha nhanŋuway waŋa ŋathawuna gurrunhanarawu.
32 Yo, ŋayipinydja Djotjiptja nhina gänaŋuwala bala'palalili, ga walalanydja ŋunhi nhanŋu wäwa'mirriŋunydja walala wiripuŋulili bala'palalili, liŋgu walala ŋuli Yetjippuyŋuyunydja yolŋu'‐yulŋuyu ḻakaranha yukurranha Yipurupuyŋunhanydja nhäŋiniŋ'‐ḻakaranhana, yakana walala ŋuli ḻukanha walalaŋgala galki.
33 Bala yarrkakana walala nhinananydja marrtji bitjan ya' ŋunhilimi, yurru wirrkina walala ŋunhi ṉirryunna nhämanydja, liŋgu ŋayi marrtji ŋuriŋiyi djämamirriyunydja walalanha yäku ḻaka'‐ḻakaramanydja ga nherra'‐nhirraṉdja ŋunhimalayi liŋgu dharapullili, ŋulaŋuru bili maḻamarrwala ŋurruŋuwala ŋurikala wäwa'mirriŋuwala, ga yana liŋgu ga yutjuwaḻa'wala wapthun. Walala ŋunhi wäwa'mirriŋunydja walala mel‐nhänharamirrina walalawuynha walala, bala waŋanhamirri, “Nhäku warray dhuwala walala marrtji bitjandja ŋilimurrunha nherraṉ? Yolthu dhuwala walalaŋgu ḻakaraŋalanydja?”
34 Bala yana walala ŋathana wekaŋala marrtjina lili walalanha, waŋga'‐waŋganyguna rarr'yurruna marrtjina ŋathanydja, yurru nhanŋunydja Bindjamangunydja walala wekaŋala biyapul warray dhaŋaŋ warray ŋatha. Bala walala ḻukanana yukurrana‐a‐a, yana liŋgu ga ḏulpu'‐ḏulputhina.