50
50:1–3
Djotjiptja ŋayinydja wirrkina dhika ŋoy‐yätjthina, bala nyä'yurrunana dhika wiṯthurrunana, ga ŋunhi Yetjippuyŋu yolŋu'‐yulŋu nyä'yunminana, warwuyunminana wiṯthunminana dhika nhanŋu.
4-5 Ga dhäŋuru ŋuliŋurunydja ŋayi Djotjip waŋana ŋurikala giŋgala bitjarra, “Ŋarraku mäḻu'mirriŋunydja waŋanha yawungu, ŋunhi ŋanya rumbalnydja yurru ŋarra balayi gäma, ga ŋunhimalayi liŋgu dholkuma Gaynanlili. Ŋayŋu'yurrana ŋarranha ŋi'! Ŋunhimalayina ŋarra yurru marrtji yana ga dholkuma ŋarrakuway bäpa'mirriŋunha, ga liliyi ŋarra boŋguŋu roŋiyi.”
6 Ŋayi Giŋdja yoraŋala nhanŋu, ga waŋana bitjarra, “Gatjuy marrtjiyana‐wala, ga yana liŋgu ga dholkuŋa ŋunhili bäpa'mirriŋunha nhuŋuway, ga liliyi roŋiyiya.”
7 Ga yuwalkthi Djotjiptja marrtjinana ga wiripu‐guḻku' buŋgawamirri yolŋu'‐yulŋu ŋurru'‐ŋurruŋu Yetjippuyŋunydja malthurrunayi nhanŋu.
8 Ga nhanbala gäthu'mirriŋu walala ga wiripu‐guḻku' mala ŋunhi bukmak malthurruna nhanŋu Djotjipku,
9 bena dhika yolŋu'‐yulŋu dhaŋaŋnha, dhaŋaŋnha dhika yolŋu'‐yulŋu marrtjinanydja.
10-13 Gaŋgathinanydja walala bala marrtjinana, marrtjinana yukurrana walala, yana liŋgu‐u‐u wäŋa ŋayathaŋala Gaynanbuy, ga ŋunhalayinydja walala dholkuŋalana ŋanya Djaykupnha, ŋunhala wäŋaŋura yäkuŋura Makpilana; ŋunhamalana walala ŋanya dholkuŋalanydja dhambay‐manapara Yipurayimgala ga Yitjakkala.
14 Ga ŋuliŋurunydja dhurrwaraŋuru ŋunhi walala goŋ‐yawar'yurrunanydja dholkunharaŋuru, bala walala roŋi'‐ruŋiyina bukmak yana liliyi Yetjipliliyi.
15 Ga dhäŋuru ŋuliŋuruyi walalaŋgalaŋuwala bäpa'mirriŋuwala moluliliyanharaŋurunydja, walalanydja ŋunhi wäwa'mirriŋunydja walala birrka'yurruna yukurrana buku‐weyaṉina, bitjarra ŋuli ya', yana bini ŋayi yukurranha Djotjip baḏak walalaŋgu ŋula ŋaramurryinya, yana bini ŋayi buku‐ruŋiyinmaranha ŋurikiyi ŋunhi walala ŋanya bitjarra ŋäthili‐wala.
16 Bala yana walala dhäruknha djuy'yunmina nhanŋu Djotjipku, ga waŋana bitjarra, “Dhä‐ŋäthili muka yana, ga yurruna bäpa'mirriŋu ŋilimurruŋgu bäyŋuthirri yawungu,
17 ŋayi waŋana bitjarra ŋanapurrunha, ŋanapurru yukurra waŋa nhokala dhuwala, märr nhe yurru bäy‐ḻakaraŋa ŋanapurruŋgu ŋurikiyinydja ŋunhi ŋanapurru nhuna yätjkuŋala ŋäthili. Yaka nhe ŋanapurruŋgu mukthurra yukirriya ŋaramurrthiya ga guyaŋiya yukirriya ŋurikiyi.”
Ga ŋayi Djotjipthu märraŋala ŋunhiyi dhäruktja walalanha, bala ŋayi nyä'yurrunana wiṯthurrunana dhika.
18 Bala walala ŋunhi wäwa'mirriŋunydja walala bunana nhanŋu Djotjipku, bala yana buku‐nyilŋ'thurrunana nhanŋu, bala wekanharamina walalawuynha walala bitjarra, “Dhuwalana ŋanapurru, ŋanapurrunydja nhuŋuna djämamirri walala.”
19 Ga Djotjiptja waŋana walalaŋgu bitjarra, “Yaka barrariya walala; yaka ŋarra dhuwala yurru ŋarranhawuy ŋarra nherraṉmirri ŋunha Godkala dharapullili.
20 Yuwalk nhumanydja ŋunhi yätjthina, bala nhuma ŋarranha goŋ‐wekaŋalana ga djuy'yurruna rälina, yurru Godthunydja ŋayipinydja ŋunhiyi gurrumiḻŋ'maraŋala, bilmaraŋala ŋunhiyi ga ḻatju'kuŋalana, ga balakurrunydja guḻku'na yolŋu'‐yulŋu walŋathinanydja; yakana walala murrmurryurruna marrtjina ŋula djaṉŋarrthinyarayu, bili Godthu ŋayipi ŋarranha ŋunhi gäŋala dhipala Yetjiplili.
21 Yaka walala barrariya. Ŋarra yurru nhumalaŋgu goŋ‐nherraṉmirri ga nhumalaŋgalaŋuwu yumurrku'wu.” Bitjarra ŋayi Djotjipthu marrtjina waŋananydja dhärukthu yana ŋamakurru'yu, ŋoy‐yal'yunmaraŋala walalanha, bala yakana walala beyaṉiyinanydja biyapulnydja nhanŋu Djotjipku.
Djotjip rakunydhinana ŋunhala Yetjip
50:22–26 (The death of Joseph)
22-23 Mukthurruna yana Djotjip ga bukmak ŋunhi Djaykupkuŋu guwar‐yalkthunara miṯtji yukurrana nhinana ŋunhiliyi Yetjip, yana liŋgu ga Djotjip marrtjina worruŋuyina.
24 Bala ŋayi waŋanana nhanukalaŋuwala wäwa'mirriŋuwala walalaŋgala bitjarrana, “Walunydja dhuwala ŋarraku dhawar'yunarawuna, ŋarra yurru rakunydhirrina, ga nhumalaŋgunydja yurru djäka ŋayipina Godnha. Ŋayipi yurru nhumalanha dhawaṯmarama dhipuŋurunydja wäŋaŋuru, balayi roŋiyinmarama ŋunhamala ŋunhi wäŋalili ŋunhi ŋayi goŋ‐nherrara Yipurayimnha ga Yitjaknha ga Djaykupnha.
25 Lilinydja waŋiya, dhäruk‐nherraṉmiya ŋarrakalanydja. Ŋunhi boŋguŋu Godthu nhumalanha gäŋu balayi roŋiyinmaraŋu ŋunhimalayi wäŋalili, nhuma boŋguŋu gäŋuyi ŋarranhanydja rumbal ŋunhamalayi wäŋalili.”
26 Bala ŋayi Djotjip rakunydhinana ŋunhala Yetjipnha wäŋaŋura, dhuŋgarranydja nhanŋu 110, yurruna walala ŋanya ḏiḏiny‐bunuŋalanydja rumbalnydja yukurrana, bala märrkitjkuŋalana bathililina ŋunhala yana bäyma Yetjip.