49
Godkalanydja Djämamirriyu yurru walŋakuma birrka'mirrinha warray yolŋu'‐yulŋunha
49:1–7 (God’s Servant is a light for all people)
1 Yo, ŋäka walala, nhumanydja ŋunhi nhuma nhina yukurra be‐wala barrku wäŋaŋura. Garrayyu Waŋarryunydja ŋarranha djarr'yurruna ŋäthiliŋga yana, yurruna ŋarra dhawal‐wuyaŋina; ŋayi djäma wekaŋalanydja ŋarraku, märr ŋarranydja yurru nhanŋu djämamirri.
2 Ŋunhi ŋarra yurru waŋa, ŋarraku dhäruktja raywal'nha ŋanyana, bitjan mandjawak raywal' ŋunhi. Ŋarranydja dhuwala bitjan bonarra' ŋunhi ŋayi yukurra ŋayathama goŋdhu nhanukalay ŋayi, raywal'nha mirithirrina djinbulknha, girri'‐ŋamathirri yukurra nhanŋu, märr ŋayina yurru ḏupthundja.
3 Ŋayi waŋananydja ŋarrakala bitjarra, “Nhenydja dhuwala ŋarraku djämamirrina yolŋu; nhokalanydja yurru yolŋu'‐yulŋuyu nhämana ŋarrakunydja ḻatju' dhika wal'ŋu.”
4 Yurru ŋarranydja waŋana bala buku‐ruŋinyamaraŋala bitjarra, “Garray, ŋarra yukurrana djäma wirrki wal'ŋu yana mirithina, yurru dhäparknha dhuwala ŋula nhämiriwnha, yaka warray dhika ŋarrakala djämayunydja maḻŋ'thurruna ŋula nhä. Yurru ŋarranydja märr‐yuwalkthina ŋayaŋu‐nherraṉmina Garraynha yana, ga yuwalk ŋayi yurru ŋayipi wekama buku‐ruŋinyamaranharawuy ŋarrakalaŋuwuy djämawuynydja.”
5 Yo, ŋäthili wal'ŋu Garrayyu ŋarranha nherrara dhiyakuyinydjayi djämawu, yurruna ŋarra dhawal‐wuyaŋina, ŋarranydja dhuwala nhanŋu djämamirri, bala ŋarra yurru gämana roŋinyamaramana nhanŋuwaynydja yolŋu'‐yulŋunha nhanukalana. Yitjuralnydja dhuwala baḻaka'yurruna birrka'mirrililina wäŋalili, yurru ŋarranydja yurru marrtji ḻiw'marama, gäma marrtji walalanha lili. Yo, Garrayyu ŋayipi ŋarranha dhiyakuyinydja yurru ganydjarr‐wekama djämawu, ga ŋayi yukurra märr‐ŋal'yun ŋarrakalanydja.
6 Ŋayi waŋananydja ŋarrakala bitjarra, “Yo, yuwalk yana nhe yurru Yitjuralnhanydja gäma lili ŋarrakalanydja, ga bitjandhi liŋgu ŋarra nhuna yurru djuy'yundhi ŋuruku mulku'‐mulkuruwunydja yolŋu'‐yulŋuwu, bukmakku ŋunhi bäpurru'wu ga bäpurru'wu miṯtjiwu, ŋunhi walala yukurra nhina be‐wala birr' wäŋaŋura barrku; nhenydja dhuwala balanyarana bitjan djarraṯawun'nha walalaŋgu, märr walalanydja yurru walŋathirri muka.”
7 Yo, Yitjuralwu Waŋarr God Walŋakunharamirrinydja waŋa yukurra bitjanna ŋurikiyi djämamirriwunydja yolŋuwu, ŋurikinydja nhanŋunydja ŋunhi yolŋu'‐yulŋu ŋuli ŋuyulkthinya ga nyinyaŋdhuna nhanŋu, ŋurikinydja ŋunhi ŋayinydja balanyarana biyaku ŋuli djämamirri ŋayi ŋuruku ŋurru'‐ŋurruŋuwu wal'ŋu buŋgawamirriwu, ga bitjarra ŋayi Garray waŋananydja nhanukala, “Ŋuriŋi buŋgawamirriyunydja walalay yurru nhämana nhuna, bala djingaryunna yurru märr‐ŋal'yunna manapan nhokala, ga ŋunhiyi ŋurru'‐ŋurruŋunydja yolŋu walala yurru bitjandhi liŋgu buku‐ŋal'yundhi nhuŋu, liŋgu walala yurru ŋunhiyi dharaŋanna nhäma nhuna, ŋunhi nhenydja djarr'yunara nhanukuŋuwaynha djämamirri Garraywuna; Godthu ŋayipi nhuna djuy'yurrunanydja, bitjarra yana liŋgu ŋunhi ŋayi dhawu'mirriyaŋala ŋäthili.” Ga bitjarra ŋayi Garray waŋananydja.
Godtja ŋuli yukurra goŋ‐nherraṉmirri warray ŋurikinydja walalaŋgu ŋunhi walŋakunhara nhanukuŋu
49:8–26 (God cares for the people he has saved)
8 Yo, bitjarra ŋayi Garray waŋananydja nhanukalaŋuwu ŋayi yolŋu'‐yulŋuwunydja gam'. “Ŋarra ŋäkula nhumalanha bukumirriyanharawuynydja, liŋguna dhuwalana gay' walunydja ŋunhi ŋarra nherrara nhumalaŋgu walŋakunharawu; märr‐yuwalk yana ŋarranydja yurru nhumalaŋgu mel‐wuyun ga guŋga'yun, ga walŋakuma yurru nhumalanha. Ŋarra yurru nhumalanha gunganhamirriyama bitjan, ga ŋuliwitjandhi nhokalaŋukurrunydja ŋarra yurru dhawu'‐nherraṉna bukmaknhana yolŋu'‐yulŋunha. Dhuwalanydja yurru wäŋa bitjan nhuŋuwaynha wal'ŋu yirralka, ga nhuma yurru nhina yukurra dhiyalayi yulŋunydja, ŋunhi marrtji ŋorra dhuwala yolŋumiriw.
9 Nhenydja yurru waŋa ŋurikinydja yolŋuwu ŋunhi garrpiṉarawuywunydja bitjanna, ‘Dhawaṯthurra dhipuŋuruyi,’ bitjan yurru, ga ŋurikinydja walalaŋgu ŋunhi walala yukurra nhina buku‐munha'ŋura nhe yurru bitjandhi liŋgu waŋa ‘Dhawaṯthurrana walala dhipuŋuruyi buku‐munha'ŋurunydja djarraṯawun'lilina,’ bitjan.
10 Bala walala yurru märr‐bakthunna ŋuriŋiyi ŋathayu ŋamakurru'yunydja, yakana biyapul walala yurru marrya'yirri wo ŋanhdharkthirri; yakana walala yurru galŋa‐nhära ŋuriŋi waluyunydja, ga watayu yukurra yurru buma walalanha yakana, liŋgu ŋayina yurru ŋunhinydja gäma yukurra walalanha dhika ḻatju'kumana wal'ŋu, ŋunhiyina ŋunhi ŋayi mel‐wuyurruna walalaŋgu, gämanydja ŋayi yurru walalanha ŋunhiwalana gapulili ŋunhi riya'‐riyalalilina.
11 Ŋarra yurru djäma dhukarrnydja yäkthun buku'‐wukukurru wäŋakurrunydja, märr yurru ŋarrakunydja yolŋu walala wäŋa‐roŋiyirrina yukurra;
12 walala yurru roŋiyirrina yukurra beŋuruna‐wala birr' barrkuŋuruna wäŋaŋuru, beŋuru ḻuŋgurrmaŋuru ga djalathaŋŋuru, ga bärra'ŋuru.”
13 Nhuma djiwarr'wuy walala, miyamala biyaka djulŋithiyana wal'ŋu,
ga nhuma dhuwala munatha' galŋa‐djulŋithiyana yana.
Buku‐wurrpalana biyakana Garraynha,
liŋgu ŋayipi Garrayyunydja marrparaŋ'kuŋalana nhanŋuwaynydja yolŋu'‐yulŋunha,
liŋguna ŋayi mel‐wuyurruna ŋurikinydja walalaŋgu nhanukalaŋuwu ŋayi yolŋu'‐yulŋuwu, ŋunhi walala yukurrana ŋayaŋu‐yätjthina burakina.
14 Yurru walalanydja ŋunhi yolŋu'‐yulŋu Djurutjalambuynydja waŋana bitjarra warray, “Garrayyunydja ŋilimurrunha liŋgu meṉguŋala, gonha'yurruna ŋayi ŋilimurrunha.”
15 Bala ŋayinydja Garraynydja waŋa yukurra bitjan warray, “Nhaltjan ŋuli ŋayi ŋäṉḏi'mirriŋuyunydja ŋuriŋi yothu'nhanydja? . . . meṉguma muka? Mak ŋayi ŋuli ŋäṉdi'mirriŋuyu meṉguma nhanŋuway wiripunydja yothu'nha, yurru ŋarranydja yurru yaka warray nhumalanhanydja meṉguma.
16 Yo, Djurutjalam wäŋa nhenydja dhuwala mel‐wiḏi' warray yana ŋarrakala, dhulŋuŋuna ŋarrakuwaynha. Ŋarra wukirrinydja dhuwala gay' ŋarrakalay ŋarra goŋlili nhuna yäkunydja.
17 Galkina nhuŋu djamarrkuḻiny'tja yurru wäŋa‐roŋiyirrina dhikana, ga biyapul walala yurru djäma dhuwala dhuḻ'yundhi yulŋunydja, ga ŋunhinydja walala ŋunhi walala nhuna baḏuwaḏuyurruna, walala yurru ḻaw'yunna bena‐wala barrkumalana wäŋalili.
18 Nhäŋa biyaka barrku‐ḏakthurra, djamarrkuḻiny'tja nhuŋu yukurra dhika wäŋa‐roŋiyirrina lili birrka'mirriŋuru wäŋaŋurunydja. Ŋarranydja dhuwala Walŋa‐ḏikṯik Waŋarr God, ga yuwalk ŋarra yukurra ḻakaramanydja ŋunhi nhenydja yurru bitjan ŋurr'yunna ŋuriŋi nhokalay yolŋu'‐yulŋuwalanydja, walalanydja yurru ŋunhi bitjan mel‐wiḏi'na nhuŋu.
19 Ŋäthilinydja wal'ŋu ŋunhinydja nhuŋu wäŋa yolŋumiriwŋga yana, ga buṉbu malanha warrpam' ḏaw'‐ḏawyunara muṉguy, yurru dhiyaŋunydja‐wala nhuŋu yurru dhuwala wäŋa dhaŋaŋdhirrina yolŋu'‐yulŋuwalana, ga walalanydja ŋunhinydja walala ŋunhi walala baḏuwaḏuyurruna wäŋa dhuwala, walala yurru gundupumana bena‐wala.
20-21 “Yo, ŋäthilinydja ŋunhinydja nhe ŋunhi yothu'miriwŋga yana, bala ŋuliŋurunydja nhe yurru waŋa bitjanna, ‘Way, nhäna dhuwala ŋarranydja? . . . yothu guḻku'mirrina? Yolthu dhuwala gurrukaŋalanydja walalanha? . . . ga yolthu walalanha dhuwala ŋuthanmaraŋalanydja?’ Ga ŋunhinydja walala yumurrku' ŋunhi walala yukurrana dhawal‐wuyaŋina be barrku wäŋaŋura, walalanydja yurru waŋa bitjanna, ‘Way! Dhuwalanydja wäŋa yutjuwaḻa' warray ŋilimurruŋgu nhinanharawu. Ŋilimurrunydja ḏukṯuk biyapul bathalawu wal'ŋu dhaḻakarrmirriwu wäŋawu, liŋgu ŋilimurru dhuwala miṯtji guḻku'na.’ ”
22 Yo, ŋayi Garraynydja waŋana bitjarra, “Ŋarranydja yurru waṉa'yunna ŋuruku mulku'‐mulkuruwunydja miṯtjiwu, bala walala yurru djamarrkuḻi'nhanydja ŋunhinydja gämana roŋinyamaramana nhuŋu.
23 Ŋurru'‐ŋurruŋuyu ga be nhäyu buŋgawamirriyu yurru nhumalanha gunganhamirriyamanydja, ga mirithirri dharrpalmirri dhäykawurru nhumalaŋgu yurru djäkana yukurra, bitjanna bitjan walala ŋäṉḏi'mirriŋuna nhumalaŋgu. Walala yurru ṉepaḻ‐nyilŋ'thun ga buku‐ŋal'yunna nhumalaŋgunydja, märr‐ŋal'yunna manapan nhumalaŋgu, bala nhuma yurru marŋgiyirrina ŋunhi ŋarranydja Waŋarr God ŋarra. Yo, ŋuriŋi yolŋuyu ŋunhi ŋayi yukurra märr‐yuwalkthirri ŋarranha, bitjan gatjpu'yun dhukarr‐nhäma ŋayi yukurra guŋga'yunarawu, ŋayinydja yurru yana ŋunhi märramana, yakana ŋayi yurru märr‐yawaryundja.”
24 Yo, ŋunhi ŋuli miriŋuyu djaw'yun yolŋunhanydja ŋula nhänha, bala ŋayi ŋuli ŋayathamana nhanŋuwaynha ŋayi, yakana yurru ŋula yolthu roŋinyamaramanydja märrama ŋuliŋuruyi wuṉḏaŋarrwalanydja ḏarramuwala.
25 Ga ŋayinydja Garraynydja waŋana bitjarra warray, “Ŋuriŋiyinydjayi rom‐ḏälyunydja yolŋuyu yukurra ŋayathama baṯ bitjanna ŋarrakunydja yolŋu'‐yulŋunha, yurru ŋarrapinydja gombuma warray yurru yana‐wala walalanha goŋŋuru nhanukalanydja; walala yurru dhawa‐yawaṯthundja yänana‐wala yana, ga djaw'yundja ŋarra yurru gombumanydja ŋunhiyinydja ŋunhi ŋayi yukurrana manaŋina ŋarrakala.
26 Ŋunhinydja ŋunhi walala yukurra monyguma mirithirri wal'ŋu be ṉiṉ'ṉiṉmarama nhumalanha, walalanydja yurru bunharamirri murrkay'kunharamirrina walalawuynha yurru, ga gulaŋdja yurru waṉḏirri walalaŋgu bitjanna bitjan gapu ŋurruthirri ŋuli mayaŋ'; walala yurru bunharamirrina yukurra, yana liŋgu ga raku'‐rakunydhirri yurru walalaŋguŋuway walala yana goŋbuy bunharaminyara. Ga bukmakthuna yolŋu'‐yulŋuyu yurru nhäma nhumalanhanydja, ŋunhi nhumanydja yukurra yurru nhina walŋamirrina, bala walala yurru marŋgiyirrina ŋunhi ŋarranydja ŋarrapi yana Waŋarr Godtja, ganydjarr‐ḏumurru ŋarra be wal'ŋu ŋunhi ŋarra walŋakuŋala beŋuruyi miriŋuwala goŋŋuru nhumalanha.” Bitjarra ŋayi Garray waŋananydja.