JOB
Ḻakarama yukurra dhäwu Djawupkalaŋuwuy
1
Satandhu gatjarr'yurruna Djawupnha
1:1–22 (Satan tested Job)
1 Ŋäthili baman' yolŋu yäku Djawup yukurrana nhinana wäŋaŋura Yotj, yurru ŋayi ŋunhi yulŋunydja ḻatju' dhika, rom‐dhunupa yana; ŋayi ŋuli yukurranha nhinanhanydja bitjanana liŋguna nhanukalaynha Godkalana romŋura, ga yarrkthuna ŋayi ŋuli ŋulaŋurunydja yätjŋurunydja romŋuru malaŋuŋuru.
2 Djamarrkuḻiny'tja nhanbala Djawuppa guḻku'na; walkur‐mäypamirrina ŋayi ŋunhi yolŋunydja, 7 ḏarramuwurrunydja ga ḻurrkun' dhäykawurrunydja,
3-5 ga wäyindja nhanbala dhaŋaŋnha mirithirrina, guḻku'na dhika buliki ga bembi malanha, ga gamul ga duŋ'ki. Yo, ḻukunydjana ŋayi ŋunhi ḏarramunydja, djuḻkmaramana yukurra wiripu‐guḻku'nha yolŋunha. Ŋayi ŋuli djäka nhanukiyingalaŋuwu djamarrkuḻi'wunydja manymakkunhana wal'ŋu, ga bitjana liŋgu ŋuli bukumirriyanhanydja walalaŋgu, märr Godthu yurru bäy‐ḻakarama walalaŋgu ŋula nhäpuy yätjpuy.
6 Ga ŋunhalanydja djiwarr'ŋura, waŋganymirriyunydja ŋurukuy djiwarr'wuy yolŋu walala marrtji withiyan Garraynha, waŋanharawu nhanŋu, ga ŋayi ŋurruŋu ŋunhi ŋäṉuk Satandja yäku malthundhi walalambala.
7 Bala ŋayi Garraynydja waŋa nhanukala Satangala bitjan, “Wanhaŋuru nhenydja dhuwala bunana?” Ga ŋayi Ŋänuktja waŋa buku‐ruŋinyamarama bitjan, “Ŋulaŋuru dhuwala ŋarra bay', munatha'ŋuru. Marrtji ŋarra ŋuli yukurra wirwiryun bala‐lili wäŋakurru ḻiw'marama.”
8 Ŋayi Garraynydja waŋana nhanukala bitjarra, “Nhäŋala muka nhe ŋarrakunydja yolŋunha? . . . Djawupnhanydja? Manymak ŋunhiyinydja ḏarramu, rom‐ŋamakurru'. Ŋayi ŋuli bitjan liŋgu märr‐ŋal'yundja ŋarrakuway yana, ga gupana‐wekama ŋuli yätjkunydja romgu. Yakana wiripunydja ŋula yolŋu rom‐ŋamakurru' bitjan ŋunhi ŋayi Djawup,” bitjan ŋayi Godtja Gunhuny'tja waŋa yukurra.
9 Ga ŋayi Ŋäṉuktja waŋa nhanukala “Yo‐o‐o?” bitjan. “Nhäku ŋayi Djawuptja buku‐ŋal'yun yukurra nhuŋu? Ŋuriki waŋganygu warray ŋiniya. Balathurru ŋayi nhuŋu yukurra buku‐ŋal'yundja, märr nhe yurru ŋanya ḻukunydjakuma ŋiniya.
10 Bitjanna liŋgu nhenydja ŋuli djäka nhanŋu ŋamathama, gungama ŋanya ŋurrwu'yunmarama, ga guŋga'yun nhe ŋuli ŋanya djämalilinydja malaŋulili, ga nhanbala wäyinnha ŋuli nhe gaŋmarama guḻku'kuma.
11 Ŋuli nhe balaŋu warrpam' baymatthurru, dhawar'maraŋu bukmak nhä malanha nhanbala marrtji ŋorra, ŋayinydja mak ŋuli ŋaramurryina nhuŋu ŋiniya, ga waŋi rom‐nyamir'yurruna nhuna.”
12 Bala yana Garraynydja waŋana nhanukala Satangala bitjarra, “Manymak. Gatjuy, nhe yurru djaw'‐djawyurrana ga buŋana warrpam' yana nhä malanha ŋunhi ŋayi yukurra ŋayathama, ŋunhi yana girri' malanha ga ŋula nhä nhokalanydja yurru goŋŋura, yurru yaka yana mulkiya ŋanya Djawupnhanydja, rumbalnydja ŋanya nhe yurru bäyŋu yana ŋayathama, ga buŋa ŋula nhaltjarra,” bitjarra ŋayi waŋana ḻakaraŋala Garrayyu.
Bala bay'‐way gonha'yurruna ŋayi Satandhunydja Garraynhanydja, wiḏi'yurrunana.
13-15 Manymak. Ga ŋunhala munatha'ŋura ŋayi Djawup yukurra nhinana‐a‐a, yurru wawu ŋayi nhina yukurra, yaka ŋayi marŋgi ŋurikiyi ŋunhi nhaltjarra maḻŋ'thurruna ŋunhala djiwarr'ŋura. Nhinana ŋayi yukurrana‐a‐a, ga yaka weyindja, bala yana dhäwu'mirrina ḏo'yun nhanbala, bala ḻakarama dhäwu'na nhanŋu bitjan, “Way Djawup. Djäma ŋanapurru yukurrana ŋunha wäŋaŋura, munatha' buḻŋu'kuŋala marrtjina buliki'yu, bala ŋayinydja marrtjina miriŋu warray walala bunana ŋanapurruŋgu, bala yana djaw'‐djawyurruna warrpam'nha wäyindja malanha nhipala, dhawar'maraŋalana, ga nhuŋu djämamirrinhanydja walalanha bumara dhawar'maraŋala. Ŋarrapina waŋganynha dhuwala walŋathinanydja, dhäwu'na gäŋala nhuŋu,” bitjarra.
16-17 Ga ŋulinyaramirriyuyi liŋgu ga wiripuna ḏo'yurruna dhäwu'mirri, ga bitjarra yana liŋgu ŋayinydja ḻakaraŋala, “Way buŋgawa, miriŋu dhuwala ŋanapurruŋgu bunana ŋunhala, warrpam'nha djaw'yurruna nhuŋu gamulnydja malanha, ga bumara murrkay'nha djämamirrinhanydja walalanha nhipala. Ŋarrapina waŋganynha walŋathinanydja, bala ŋarra waṉḏina lili, dhäwu'na gäŋala nhuŋu.”
18-19 Waŋanaŋga ŋayinydja yukurrana ŋunhiyi yana, bur‐marrtjina wiripuna dhäwu'mirri, “Way buŋgawa,” bitjan. “Nhipala yumurrkuny'tja liŋguna murrmurryurrunana. Nhinana ŋanapurru yukurrana ŋunhala nhokala wäŋaŋura gäthura, ŋatha muka ḻukana yukurrana, bala ŋayinydja marrtjina wärrk warray ḏo'yurruna ŋanapurruŋgu, wutthurruna ŋunha balany'tja, warrpam'nha ḏaw'yurruna, ga dhä‐monyguŋala yumurrku'nhanydja nhipala bukmaknhana yana, ḏarramuwurrunha ga dhäykawurrunha, ga warrpam'nha walala murrmurryurrunanydja yana. Ŋarrapina waŋganynha walŋanydja djuḻkthurruna, bala waṉḏinana räli, dhäwuny'tja gäŋala nhuŋu.”
20 Ŋayinydja Djawuptja yana yukurrana nhinana ŋayaŋu‐yätjthina wirrkina, warwuyurruna manapara, bala yana ŋayi ŋuliŋurunydja gaŋgathirri, bala ŋurrkanhamirri munatha'lilina, märr‐ŋal'yunna yukurra Garraywuna.
21 Bitjan ŋayi yukurra waŋa bukumirriyamanydja gam'.
“Maḻŋ'thurrunanydja ŋarra dhiyala dhäpark muka ŋula nhämiriw,
ga rakunydhirrinydja ŋarra yurru dhäparkthi yana,
goŋ‐wayŋu ŋula nhämiriw.
Garray, nhepi ŋarranha ḻukunydjakuŋalanydja,
nhe wekaŋala ŋarraku warrpam'nha,
ga biyapul nhepi yana djaw'‐djawyurrunanydja,
mel‐wumbuŋalanydja ŋarranha warrpam', bena‐wala dhawar'maraŋalana.
Garray gay', ŋarranydja nhuŋu wokthunna yukurra dhuwala.”
22 Yo, Djawuptja bitjarrayi märr‐yuwalkthina Garraywu mukthurruna yana, bala yana märr‐nherraṉminana‐wala, yana wekanharaminana ŋanyapinyay ŋayi goŋlili Garraywala, ga yakana ŋayi rom‐nyamir'yurruna ŋula Garraynhanydja.