115
Waŋganyguna yana yuwalkkuma Godku ŋilimurru wokthundja yukurra yurru
115:1–18 (Praise the one true God)
1 Garray, nhepina dhuwala waŋgany yana dhapirrktja ŋanyanydja dhikanydja,
yakana ŋanapurrunhanydja ŋuli ŋula yolthu ḻakaraŋu dhapirrk‐ḻakaraŋu;
Nhepina waŋganynha yana märr‐ŋamathinyaramirrinydja ga goyulŋuny'tja,
liŋgu nhe ŋuli dhärra yukurra yana djambimiriwnha.
2 Nhäku warray walala ŋuli yolŋu'‐yulŋuyu ŋuriŋi märr‐yuwalkthinyamiriwyunydja walalay dhä‐wirrka'yun ŋanapurrunha bitjandja,
“Wanhaka dhika be nhumalaŋgu Godtja?” bitjan.
3 Ŋanapurruŋgunydja God ŋunha djiwarr'ŋura warray,
ga djämanydja ŋayi yukurra ŋuriŋi nhanukalay ŋayi yana ḏukṯukthunydja malaŋuyu.
4 Ga nhumalaŋgunydja waŋarr walŋamiriw warray,
dharpana ŋula nhäna guṉḏana yana, goŋbuynha yana djämawuynydja.
5 Yo, nhumalaŋgunydja ŋunhi waŋarr mala dhurrwaramirri warray yulŋunydja,
yurru bäyŋuna walala yurru waŋanydja;
maŋutjimirri walala, yurru bäyŋuna walala yurru nhämanydja.
6 Buthurumirri warray ŋayi yulŋunydja ga ŋurrumirri,
yurru bäyŋuna ŋayi waŋgi'yundja yurru wo ŋämanydja.
7 Ŋarambiya'mirri ga djalkirimirri ŋayi,
yurru yakana ŋayi yurru ŋarambiya'yunydja mulka ŋula nhä,
ga marrtji ŋayi yurru djalkiriyu, bäyŋuna.
Ga bäyŋu warray ŋayi yurru waŋa ŋula waŋgany dhäruk.
8 Yo, ŋunhanydja walala ŋunhi walala ŋuli djäma ŋunhiyi goŋbuynha waŋarrnha ŋula nhänha,
ga ŋunhinydja yolŋu'‐yulŋu ŋunhi walala ŋuli ŋayaŋu‐nherraṉmirri ŋunhimalayi ŋula nhäkala,
walalanydja yurru yana bitjanna ḻiya‐dhumukthirrina guyaŋinyamiriwnha, bawa'mirrina yurru,
bitjan yana liŋgu bitjan ŋunhiyi waŋarr ŋunhi walala ŋuli djäma goŋdhu.
9 Nhuma yolŋu walala Yitjuralpuyŋu,
märr‐nherraṉmiya nhanukalaynha Garraywalana yana;
Ŋayi warray nhumalanhanydja guŋga'yun ŋuli yukurra,
ga gunganhamirriyama nhumalanha ŋula nhäŋuru.
10 Ga nhuma ḏalkarra'mirri mala Godku,
biyaka märr‐nherraṉmiyana märr‐yuwalkthiyana Garraywu;
Ŋayi nhumalanhanydja guŋga'yun yukurra ŋuli,
ga gunganhamirriyama ŋuli ŋayipi yana.
11 Nhuma yolŋu'‐yulŋu ŋunhi nhuma ŋuli yukurra rom‐wiyaṉirri Godkunydja,
biyaka märr‐nherraṉmiya nhanukalaynha yana Garraywalana,
liŋgu ŋayipi waŋgany nhumalaŋgunydja guŋga'yunaramirri,
ga gunganharamirri ŋayi.
12 Bitjan liŋgu Garrayyunydja Godthunydja yukurra guyaŋirri ŋilimurrunhanydja,
goŋmirriyama ŋayi yukurra yurru ŋilimurrunha yulŋunydja.
Wirrki yana wal'ŋu ŋayi yurru goŋmirriyamanydja ŋilimurrunha nhanŋuwaynydja ŋunhinydja dhulŋuŋunydja yolŋunha walalanha,
ga bitjandhi liŋgu ŋayi yurru guŋga'yun nhanŋuway ŋunhi ḏalkarra'mirrinhanydja walalanha.
13 Yo, ŋunhi ŋayi yurru ŋula yol yolŋu märr‐ŋal'yun nhanukalay, ga dhäruk ŋanya märrama,
ŋayinydja ŋunhiyinydjayi yolŋu goŋmirriyanharana Garraywuŋunydja,
bäythi ŋunhi ŋayi be bathala wal'ŋu ga yumurrku'.
14 Ŋarranydja yukurra dhuwala bukumirriyama yulŋunydja,
märr yurru ŋayi Garrayyunydja goŋmirriyama muka nhumalanha ga biyapul nhumalaŋgu yumurrku'nha.
15 Ga yuwalk yana Garrayyu yukurra goŋmirriyamanydja nhumalanha,
bitjan ŋayi yukurra gäma nhumalanha ḻatju'kuma dhika wal'ŋu,
ŋuriŋinydja Godthu Waŋarryu ŋunhi ŋayi djäma ŋunha djiwarr' ga dhuwala munatha'.
16 Ŋunha djiwarrny'tja wäŋa nhanŋuway yana waŋganygu dhulŋuŋu Godku,
ga dhuwalanydja gay munathany'tja wäŋa ŋayi wekaŋala ŋanapurruŋgala yolŋu'‐yulŋuwala goŋlili.
17 Dhuwurr‐yätjmirri yolŋu walala ŋunhi liŋguna murrmurryurrunana,
yaka walala yukurra goŋmirriyirrinydja wokthundja yukurra Garraywu.
18 Ga ŋilimurru dhuwala ŋunhi ŋilimurru nhina yukurra walŋamirri,
ŋilimurru gul' buku‐wurrpanna ŋanya Godnhana,
dhiyaŋu‐wala ga bitjanna liŋguna yurru‐wala.
Garray, ŋanapurru dhuwala wokthunna yukurra nhuŋu yulŋunydja.