1 SAMUEL
Ḻakarama yukurra dhäwu Djamiyulwalaŋuwuy ga Djolwalaŋuwuy
1
Yana bukumirriyaŋala yothuwu Godkala
1:1–18 (Hannah prayed for a child)
1 Ŋunhala wäŋaŋura buku'‐wukumirriŋura, yäkuŋura Räma wäŋaŋura, waŋgany yolŋu ḏarramu yukurrana nhinana yäku Yilkana, yurru ŋayi ŋunhi bäpurruny'tja Burayim,
2 ga Yilkanawu miyalktja märrma' yukurrana nhinana nhanukala, dhuwala maṉḏa yäku maṉḏa gam', Yana, ga Binina. Ŋayi Binina yäku goŋ‐yothumirrinydja dhäyka, ga ŋayi Yananydja ga yothumiriw yukurrana nhinana.
3 Yo, bitjana liŋgu dhuŋgarra‐watjthinya walala ŋuli marrtjinya yukurranha ŋulaŋuru Rämaŋuru ga bala Djälawlili wäŋalili buku‐ŋal'yunarawu Godkala, liŋgu ŋunhala ŋuli yukurranha bitjana liŋguna yolŋu'‐yulŋunydja marrtjinya ḻuŋ'maranhaminya ŋunhamala wäŋalili, ga bathana mundhurrnydja wekanha Godku ŋunhala Djälawŋura wäŋaŋura yäkuŋura. Ga ŋulinyaramirriyu ḏalkarra'mirri yukurrana nhinana ŋunhilinydja Djälawŋuranydja wäŋaŋura yäkuŋura Yelay, ga walkur maṉḏa nhanŋu gäthu'mirriŋu maṉḏa märrma' Yupni ga Biniya, ga maṉḏanydja balanyara liŋgu ḏalkarra'mirri maṉḏa Garraywu.
4-5 Yo, wirrki ŋayi yukurrana Yilkana märr‐ŋamathina nhanŋu Yanawu, yurru ŋayi yothumiriw ŋunhi dhäykanydja, yaka ŋayi yothunhanydja gurrukaŋala.
6 Ga ŋayi ŋuriŋi wiripuŋuyunydja dhäykayu Bininayunydja bitjana liŋgu ŋuli yukurranha ŋanya ritjan'thunana, liŋgu ŋayi ŋunhi yothumiriw.
7-8 Yo, bitjana liŋgu dhuŋgarra ŋupana ŋayi ŋuli Yilkana ga miyalk maṉḏanha nhanŋu ga yumurrku' marrtjinya ŋuli bala Djälawlili. Bitjanana liŋguna walala ŋuli marrtjinya ŋunhimala Buṉbulili Godkalanydja gulŋiyinya, ga ŋayi ŋuli Yananydja buku‐warwumirriyinyana, liŋgu ŋayi ŋuriŋi wiripuŋuyunydja dhäykayu Bininayunydja waŋanha ŋuli ŋanya ritjan'thuna, liŋgu Garrayyu yaka nhanŋu ŋula yothu wekaŋala. Yo, ŋäthinya ŋayi ŋuli bitjanana liŋgu Yananydja, ga yakana ŋula ŋatha ḻukanha, liŋgu ŋayi yukurranha ŋuli wirrki ḏukṯukmirriyinya yothuwu.
9-10 Waŋganymirrinydja waluyu walala yukurrana ŋatha ḻukana ŋunhala Djälaw, ga ŋayi Yanayunydja ga yakana ḻukana ŋula ŋatha; yana ŋayi gaŋgathinana, bala yana marrtjinana Godkala Buṉbulili, bala ŋayi ŋunhalana nyäy'‐nyayurrunanydja, wiṯthurrunana dhika märrliliyaŋala Godkalana.
11 Ŋayi yukurrana dhawu'‐nherrarana Godnhana bitjarra gam', “Garray God Ganydjarr‐ḏumurru, ŋarranydja dhuwala nhuŋu djämamirri. Nhe marŋgi ŋarraku, dhuwala ŋarra yukurra galŋa‐warwumirriyirri. Yaka ŋarranha meṉguŋanydja. Garray, ŋarra nhokala ḏukṯuk, nhe yurru wekama ŋarraku yothunha, waku'mirriŋunha, ga ŋunhi yurru ŋayi yothu dhawal‐wuyaŋirrinydja, ŋarranydja yurru wekama ŋanya roŋiyinmaramayi nhuŋuway. Ga marwattja ŋanya yurru yaka gulkthun, liŋgu ŋayinydja yurru ŋunhi nhuŋuway yana bitjanna liŋguna.” Bitjarrayina ŋayi yukurrana dhäyka ŋunhi bukumirriyaŋalanydja Godkala.
12-13 Ga ŋunhili dharapulŋura galki dhurrwaraŋura, ŋayi yukurrana ŋunhiyi ḏalkarra'mirri nhinana Yelay yäku, ga nhäŋalanydja ŋayi yukurrana Yananha ŋunhiyi miyalknha; ŋayinydja ŋunhi dhäykanydja yukurrana bukumirriyaŋala, ŋunhina liŋguna dhäruk yukurrana waŋana, yurru ŋayi yukurrana waŋananydja ŋunhi bukumirriyaŋalanydja gayul, rirrakaymiriw, dhurrwara yukurrana waŋgany waŋana. Ga ŋunhiyi ḏalkarra'mirri, ŋayinydja birrka'yurruna yanapi ŋayi leŋu yukurranha,
14 bala yana ŋayi withiyarana ŋanya ŋunhiyi, marrtjinana bala, bala waŋana bitjarrana, “Yaka dhuwala nhuŋu ŋamakurru' bitjanarawu leŋuwu. Mukthurrana nhe ḻukanhaŋuru ŋänitji'ŋurunydja, ga nhiniya biyaka ŋamathaŋana.”
15 Yurru ŋayinydja ŋunhi dhäykanydja buku‐ruŋiyinmaraŋala bitjarra, “Yaka ŋarra dhuwala yukurra leŋu. Ŋarra yukurrana dhuwala yana bukumirriyaŋala bukukurru waŋana Garraywala, wirrki waŋana, ga ḻakaraŋala ŋarra yukurrana ŋarraku warwu malanha.
16 Yaka ŋarranha nhäŋiniŋ' ḻakaraŋa. Ŋarra yukurrana dhuwala bukumirriyaŋalanydja bitjarrayinydjayi, liŋgu ŋarra galŋa‐yätjthina wirrki.”
17 Ga ŋayi Yelaynydja waŋana, “Gatjuy, marrtjiyana‐wala, ga nhiniya yukirriya ŋoy‐yal'yunaraŋurana. Garrayyunydja yurru wekamana yana nhuŋu nhäku nhe ŋanya ŋäŋ'thurruna.”
18 Ga Yananydja waŋana nhanukala Yelaywala bitjarra, “Bukumirriyaŋanydja ŋarraku biyaka liŋgu.” Bala ŋayi ŋunhi dhäyka gaŋgathinana, bala marrtjina dhawaṯthurruna, bala ŋayi ŋathana ḻukana, ga yakana biyapulnydja galŋa‐yätjthina.
Djamiyul dhawal‐wuyaŋinana
1:19–28 (Samuel was born)
19 Ga wiripuŋuyuna munhayu ŋayi Yilkana gaŋgathina ga nhanŋu miyalk maṉḏa ga yumurrku', gaŋga'‐gaŋgathina beŋga yana munhakumirri, bala yana walala buku‐ŋal'yurruna Garraywuna. Ga dhäŋuru ŋuliŋurunydja walala gonha'yurrunana, bala marrtjina balayi roŋiyina walalaŋgiyingala wäŋalili.
20 Yuwalkthi Garrayyunydja birrka'yurruna Yananha, bala ŋayi galŋa‐ŋonuŋdhinana; ŋayi marrtjina gurrukaŋalana yothunhana Yilkanawu, ga ŋunhi ŋayi dhawal‐wuyaŋinanydja Yanawuŋu yothuny'tja ḏarramu, ga yäkunydja ŋayi nherrara ŋanya Djamiyul.
21-22 Ga ŋunhi marrtjina walunydja gilitjinana biyapulŋuwu roŋiyinyarawu bala Djälawwuyŋu mundhurrwu‐wekanharawu biyapulwu Garraywu, ga Yananydja waŋana dhuway'mirriŋuwala nhanukalaŋuwala bitjarrana, “Nhepina marrtjiyanydja ŋe. Ŋarranydja yurru nhinana, djäka dhiyaku yothuwuna, ga gonha ŋayipi boŋguŋu ga wakindhina märr, wakindhina wal'ŋu ŋayi boŋguŋu, bala ŋarranydja boŋguŋu yurruna gäŋunydja ŋanya bala, ga wekaŋu Garraywunydja. Ŋayi yukurra yurru nhinana ŋunhalana bili nhanŋuwaynha yana Garraywuna djäma yukurra yurru weyinŋumirrina, bitjanna liŋguna yurru.”
23 Ga ŋayinydja dhuway'mirriŋunydja yuraŋala bitjarrana gam' waŋana. “Yo, nhiniyana nhe dhiyalana, ga djäka yukirriya. Garrayyunydja yurru nhuna guŋga'yun, märr nhe yurru djämana‐wala yana ŋunhi nhe nhä dhawu'‐nherrara nhanukala.” Bala Yananydja dhut‐gay nhinanana, bala dhangi'yurruna yothunhana nhinana.
24 Yo, Djamiyulnydja ŋunhi yothuny'tja ŋutharana marrtjina wakindhinana, ga ŋunhi ŋayi wakinnha märr, ga ŋayi Yanayunydja ŋäṉḏi'mirriŋuyunydja gäŋalana ŋanya bala Djälawlilina wäŋalili, ga ŋunhana maṉḏa marrtjina gulŋiyinanydja Buṉbulili Garraywalana.
25 Wutthurrunanydja maṉḏa wäyin buliki, ga ŋunhala maṉḏa bathara mundhurr Garraywu wekaŋala. Ga biyapul ŋunhi yothu'nhanydja ŋayi gäŋala bala ŋurikala ḏalkarra'mirriwalana Yelaywalana.
26 Yananydja waŋana nhanukala Yelaywala bitjarra, “Guyaŋirriŋga nhe ŋarranha yukurra yulŋunydja? Baman' ŋunhi ŋäthili ŋarra yukurra dhiyala djingaryun ŋunhi ya', yurru ŋarra yukurra ŋunhi bukukurru waŋa Godkala;
27 ŋarra ŋanya yukurra ŋäŋ'thun ŋunhi yothu'wu, ga dhuwalana gay' yothuny'tja ŋayi wekaŋala ŋarraku.
28 Dhuwala ŋarra ŋanya gäŋalana lili nhanŋuna Garraywuna; ŋayi yukurra yurru nhina Garraywuna yana nhanŋuwaynha. Dhiyalana ŋayi nhinana yukurra yurru bitjanna liŋguna, ga yana liŋgu ga rakunydhirri ŋayi yurru.” Bala maṉḏa buku‐ŋal'yurrunana yukurrana Garraywuna.