9
Jesús omondo jocua doce jemimboe reta
(Mt 10.5-15; Mr 6.7-13)
1 Penti ara Jesús opa umbatɨ jocua doce jemimboe reta, jare umee chupe reta mbaepuere umbɨsɨrɨ vaerã aña reta oya jese vae reta güi jare umbɨgüera vaerã imbaerasɨ vae reta.
2 Jayave omondo reta umɨmbeu vaerã Tumpa iporoyocuia jare umbɨgüera vaerã imbaerasɨ vae reta.
3 Jare jei chupe reta:
—Agüɨye mbae peraa. Agüɨye peraa pepopoca. Agüɨye peraa peurupucu, perembiurã jare corepoti. Jare agüɨye peraa mocui camisa —jei—.
4 Peo pevãe yave penti tenta pe, joco pe peĩ jocua tenta guasu güi peo ye regua —jei—.
5 Jare ime yave penti tenta guasu pegua reta uipota'ã pepɨta vaerã joco pe vae, peo joco güi yave, pemɨtɨmo ɨvɨcuii pepɨ güi, uicuaa vaerã jae reta co teco güɨnoi —jei.
6 Jayave jae reta yugüɨraa tenta guasu-raɨ reta rupi. Umɨmbeu reta ĩru vae reta pe ñee icavi vae jare opaete uguata vae rupi umbɨgüera imbaerasɨ vae reta.
Juan imano
(Mt 14.1-12; Mr 6.14-29)
7 Jare mburuvicha guasu Herodes uyandu opaete Jesús uyapo vae regua. Jayave ipɨacañɨ. Echa'ã amocue vae jei:
—Juan icove ye ma ou umanocue vae reta ipɨte güi.
8 Jare ĩru vae reta jei:
—Jae co Elías ou ye vae.
Jare ĩru vae reta jei:
—Jae co penti Tumpa iñee aracae umɨmbeu vae icove ye ma ou umanocue vae reta ipɨte güi vae.
9 Ẽrei Herodes jei:
—Añãcasɨaca co Juan. Ẽrei ¿quía ra co cua? Echa'ã ayandu ma jeta jesegua —jei.
Jáeramo Herodes uipota uecha Jesús.
Jesús umɨngaru cinco mil cuimbae reta
(Mt 14.13-21; Mr 6.30-44; Jn 6.1-14)
10 Jare Jesús jemimondo reta yugüeru ye Jesús oĩ vae pe, jare umɨmbeu Jesús pe opaete uyapo vae regua. Jayave Jesús güɨraa reta quĩi ngatu vae pe coiño tenta guasu Betsaida güi.
11 Ẽrei jeta vae uicuaa yave, yugüɨraa jaɨcue. Jare Jesús umbɨresive cavi jare imiari chupe reta Tumpa iporoyocuia re jare umbɨgüera imbaerasɨ vae reta.
12 Caaru ma yave, jocua doce vae yugüeru Jesús oĩ vae pe jare jei chupe:
—Emondo cua jeta vae tenta tenta rupi, joco pe ucaru vaerã jare oque vaerã. Echa'ã mbaetɨ tenta cua rupi —jei reta.
13 Ẽrei Jesús jei chupe reta:
—Pe reta pemee tucaru.
—Jaeño ime nonoi pandepo mbɨyape jare mocui pira —jei reta—. ¿Ndoota pa ndogua opaete cua reta jembiurã?
14 Echa'ã cuimbae retaño uyepapa cinco mil rupi.
Jayave Jesús jei jemimboe reta pe:
—Tuyembatɨmbatɨ cincuenta rupi tuguapɨ.
15 Jayave jucuarãi uyapo reta. Jei reta opaete joco pe ñugüɨnoi vae reta pe uguapɨ vaerã.
16 Jayave Jesús uipɨsɨ jocua pandepo mbɨyape jare mocui pira, jare umae ara cotɨ, jare umee yasurupai Tumpa pe. Jayave upɨsãa mbɨyape jare pira, jare umee jemimboe reta pe, jae reta umee vaerã opaete joco pe uguapɨ ñugüɨnoi vae reta pe.
17 Opareve ucaru, jare iyangapɨɨ reta. Jayave Jesús jemimboe reta umbatɨ tembíu uñepɨsãacue jembɨre vae, jare umɨtɨnee doce canasta.
Pedro jei Jesús co jae Cristo, Tumpa ombou vae
(Mt 16.13-20; Mr 8.27-30)
18 Penti ara Jesús oo jeta vae ipɨte güi uyerure vaerã Tumpa pe. Jare jemimboe reta joco pe ñugüɨnoi jae ndive. Jayave Jesús upɨrandu chupe reta:
—¿Quía pa co che ĩru vae reta pe? —jei.
19 Jae reta jei chupe:
—Amocue vae jei nde co jae Juan upurumbɨbautizase vae, jare ĩru vae reta jei nde co jae Elías, jare ĩru vae reta jei nde co jae penti Tumpa iñee aracae umɨmbeu vae icove ye ma ou umanocue vae reta ipɨte güi vae —jei reta.
20 Jayave Jesús upɨrandu chupe reta:
—Jare ¿quía pa co che peve? —jei.
Jayave Pedro jei chupe:
—Nde co jae Cristo, Tumpa ombou vae —jei.
Jesús umɨmbeu umanota co
(Mt 16.20-28; Mr 8.30–9.1)
21 Jayave Jesús oyocui ete reta agüɨye vaerã umɨmbeu quía pe.
22 Jayave Jesús jei chupe reta:
—Che cuimbaerã ayeyapo vae aiporara eteta. Jare judío reta itenondegua reta jare sacerdote reta itenondegua reta jare mboroyocui re oporomboe vae reta ndarau uipota aico vaerã juvicha guasurã, jare cheyucacata. Ẽrei mbapɨ ara rupi aicove yeta ayu umanocue vae reta ipɨte güi —jei.
23 Jayave Jesús jei opaete vae pe:
—Ime yave quía uipota oo cherupíe vae, tiñacañɨ iyugüi, tovoɨ icurusu opa ara, jare too cherupíe —jei—.
24 Uipota uñuvatu jecove vae ndarau ipuere. Ẽrei jocua umeeta jecove chereco pegua vae uñuvatuta co —jei—.
25 ¿Mbae ra umɨnganata quía, umɨngana yave opaete ɨvɨ pegua, ẽrei ipuere'ã yave uñuvatu jecove? —jei—.
26 Ime yave quía imara cheré jare chiñee re vae, che cuimbaerã ayeyapo vae chemarata vi jese, ayu ye yave ayembutuichaca vaerã chembaepuere reve, cheRu imbaepuere reve, jare ángel uñeñono tee Tumpa peguarã vae reta imbaepuere reve —jei—.
27 Ẽrei añete che jae peve, ndei amocue cua pe ñugüɨnoi vae umano mbove, uechata reta Tumpa iporoyocuia —jei Jesús.
Jesús uyembɨambɨe
(Mt 17.1-8; Mr 9.2-8)
28 Jare ocho ara rupi cua jei rendave pe, Jesús güɨraa Pedro, Juan jare Jacobo ĩru vae reta ipɨte güi, jare uyupi penti ɨvɨtu guasu re uyerure vaerã Tumpa pe.
29 Jare Jesús uyerure Tumpa pe rambueve, jova uyembɨambɨe jare jemimonde tĩ asɨ jare uvera.
30 Jare mocui cuimbae uyemɨngueta ñugüɨnoi Jesús ndive. Jae reta co Moisés jare Elías.
31 Mocui reve uyecuaa tembipe ipõra ete vae re jare uyemɨngueta reta Jesús imano re, quirãi umanota co Jerusalén pe.
32 Ẽrei Pedro jare jae ndive ñugüɨnoi vae jopeɨ jare oque. Ẽrei usareco ye, jare uecha Jesús ipõra ete, jare uecha vi jocua mocui cuimbae Jesús ndive ñugüɨnoi vae reta.
33 Jare Moisés jare Elías yugüɨraa yeta ma yave, Pedro jei Jesús pe:
—Oporomboe vae, icavi co ñaĩ vaerã cua pe. Turuyapo mbapɨ guarasɨ̃a ñanaroquɨ pegua, penti nembaerã, penti Moisés peguarã jare penti Elías peguarã —jei.
Echa'ã Pedro uicuaa'ã mbae jei vae.
34 Jare Pedro cua jei rambueve, ou amapɨ̃tu umɨguarasɨ̃a reta. Jare jae reta uquɨye amapɨ̃tu umɨguarasɨ̃a yave.
35 Jayave uyendu ñee amapɨ̃tu güi jei:
—Cua co jae cheRaɨ aau ete vae. Piyapɨsaca jese —jei.
36 Jare ñee opa ma yave, jae reta uecha'ã quía joco pe, jaeño Jesús. Jare jocua ara reta pe jae reta umɨmbeu'ã quía pe ave mbaembae uecha vae.
Jesús umbɨgüera cunumi aña oya jese vae
(Mt 17.14-21; Mr 9.14-29)
37 Jare pɨareve pe ɨvɨtu guasu güi ugüeyɨ reta yave, jeta vae yugüeru uñeovãiti jae reta ndive.
38 Jayave penti cuimbae yatɨ vae reta ipɨte pe oĩ vae jei Jesús pe:
—Oporomboe vae, ayerure ndeve nemae vaerã cheraɨ re. Jae co cheraɨ jae vaeño.
39 Aramoiño penti aña oya jese jare umbɨsapɨcai. Jayave umbɨrɨrɨ ete jare cunumi iyuru tɨrɨyai. Jayave uyembɨpere. Jecuaeño uyapo jucuarãi chupe —jei—.
40 Ayerure tẽi ma nderemimboe reta pe umbɨsɨrɨ vaerã aña chugüi, ẽrei ipuere'ã reta —jei.
41 Jayave Jesús jei joco pe ñugüɨnoi vae reta pe:
—Yavai ete pe reta cua ɨvɨ pe pico vae pepurugüɨrovia vaerã. ¿Quirãi regua ra apɨtata pe reta ndive? ¿Quirãi regua ra arupɨata peve? —jei.
Jayave jei cunumi tu pe:
—Eru nderaɨ cua pe.
42 Jare cunumi ou rambueve, aña uipɨaca jare umbɨrɨrɨ ete. Jayave Jesús uñeengata aña pe. Jayave umbɨgüera cunumi jare umee ye tu pe.
43 Jare opaete joco pe ñugüɨnoi vae reta ipɨacañɨ Tumpa imbaepuere tuicha vae re. Ẽrei ipɨacañɨ rambueve opaete Jesús uyapo vae re, Jesús jei jemimboe reta pe:
Jesús umɨmbeu ye umanota co
(Mt 17.22-23; Mr 9.30-32)
44 —Piyapɨsaca cavi cua jae peve vae re. Echa'ã che cuimbaerã ayeyapo vae penti vae chemeeta cherovaicho reta pe —jei.
45 Ẽrei jae reta uicuaa cavi'ã mbae Jesús jei chupe reta vae. Yavai chupe reta uicuaa vaerã, jare uipɨu reta upɨrandu vaerã chupe jese.
Tenondegua vae
(Mt 18.1-5; Mr 9.33-37)
46 Jayave jae reta umbɨpɨ uyemɨngueta quía ra tenondegua ĩru reta güi vae.
47 Jare Jesús uicuaa chugüi reta ipɨayemɨngueta. Jayave ueni penti sambiaɨ jare oñono iyɨpɨ pe.
48 Jayave jei jemimboe reta pe:
—Ime yave quía uyapo icavi vae cua nunga sambiaɨ pe cheree pe vae, cheve co uyapo icavi vae. Jare jocua cheve uyapo icavi vae, uyapo vi icavi vae chembou vae pe. Echa'ã pepɨte pe oĩ vae uñemɨmichi vae icota tenondeguarã —jei.
Oyovaicho'ã yande ndive vae yanemborɨ co
(Mr 9.38-40)
49 Jayave Juan jei Jesús pe:
—Oporomboe vae, nduecha penti cuimbae nderee pe umbɨsɨrɨ aña reta oya jese vae reta güi, jare ndoe chupe agüɨye ma uyapo vaerã. Echa'ã jae ñaneĩru'ã co —jei.
50 —Agüɨye pere chupe jucuarãi —jei Jesús chupe—. Echa'ã oyovaicho'ã yande ndive vae yanemborɨ co —jei.
Jesús uñeengata Jacobo jare Juan pe
51 Jare outa ma uvãe Jesús oo ye vaerã ara pe. Jáeramo iquɨrẽɨ ete oo Jerusalén pe.
52 Jayave omondo amocue jemimboe reta jenonde. Jae reta yugüɨraa penti tenta guasu-raɨ ɨvɨ Samaria pegua pe uyapɨcatu vaerã Jesús peguarã.
53 Ẽrei joco pegua reta uipota'ã Jesús upɨta vaerã joco pe. Echa'ã uicuaa reta jae oo Jerusalén cotɨ.
54 Jare Jesús jemimboe reta Jacobo jare Juan cua uicuaa yave, jei reta Jesús pe:
—OreYa, ¿ndipota pa ore ndoyocui tata ou vaerã ara güi opa vaerã uapɨ cua tenta guasu-raɨ pegua reta Elías uyapo rami?
55 Ẽrei Jesús uyerova icotɨ jare uñeengata chupe reta. Jei chupe reta:
—Agüɨye pere jucuarãi.
56 Echa'ã che cuimbaerã ayeyapo vae ayu apurumbɨasa vaerã. Ayu'ã apurumɨcañɨtei vaerã —jei.
Jayave yugüɨraa ĩru tenta guasu-raɨ cotɨ.
Uipota oo Jesús jupíe vae
(Mt 8.19-22)
57 Jare tape rupi uguata reta rambueve, penti cuimbae jei Jesús pe:
—Taa nderupíe opaete que rupi ndeo vae rupi.
58 Jayave Jesús jei chupe:
—Aguara reta güɨnoi icua reta, jare güɨra reta güɨnoi jaitɨ reta. Ẽrei che cuimbaerã ayeyapo vae mbaetɨ cherenta —jei.
59 Jare Jesús jei ĩru cuimbae pe:
—Eyu cherupíe.
Ẽrei cuimbae jei:
—Emaeño rani cheré aa vaerã aico cheru re umano regua.
60 Jayave Jesús jei chupe:
—Tecove opa mbae vae güɨnoi mbae vae reta toñotɨ umano vae reta. Ẽrei nde ecua emɨmbeu Tumpa iporoyocuia —jei.
61 Jayave ĩru cuimbae jei Jesús pe:
—Taa nderupíe, cheYa. Ẽrei emaeño rani cheré aa vaerã cherenta pe amɨmbeu vaerã chupe reta jáema co aa —jei.
62 Ẽrei Jesús jei chupe:
—Tamɨjaanga umbɨara vae. Umbɨara vae umae yave jaɨcue cotɨ, ndarau sɨmi oo. Jae ramiño vi che amɨmbaravɨquɨ yave quía, uyapo cavi'ã yave iparavɨquɨ, ndarau icavi ico vaerã Tumpa iporoyocuia pe —jei.