2
ጌሻ አያና ዎꬃ
1 ጰንፀቆስፀ ጋላሳይ ጋክዳ ዎደ አማንያ አሳ ኡባይ እስፈ እስ በሳን ሺቅድ ደኦሶና።
2 ቆፖና ዎልቃማ ጎተዳ ጉምያ ጉንꬃይ አኬኮና ሳሎፐ ይድ ኤንቲ ደእያ ኬꬃ ኩምስ።
3 ቃስ ታማ ላጮ ዳንያ እንፃርሳት ኤንታዉ በንትሸ፥ ሻከት ሻከት ኤንታ ኡባ ቦላ ዎꬍዶሶና።
4 ኤንቲ ኡባይ ጌሻ አያናን ኩምድ ዱማ ዱማ ዶናን ኦደታና መላ ጌሻ አያናይ ኤንታ ዳንዳእስን ሃሳያ ዶምዶሶና።
5 ሄ ዎደ ቢታ ኡባፈ ይዳ ፆሳስ ባቢያ አይሁደት የሩሳላመን ደኦሶና።
6 ሄ ጉንꬃ ስእዳ ዎደ ዳሮ አሳይ ሺቅዶሶና። አማንያ አሳይ ኤንታ ቃላን ኦደትሽን ስእዳ ግሾ፥
7 ማላለትድ፥ “ሀ ኦደትያ አሳ ኡባይ ጋልላ አሰ ግዶኮናዬ?
8 ያትን፥ ኑኒ፥ ኑ የለትዳ ቢታ ዶናን ኤንቲ ኦደትሽን ዋንድ ስአናዉ ዳንዳእዶ?
9 ኑኒ ጳርፀን፥ ሜዶናን፥ ኤላማን፥ ማሰጰፆመን ደኤይሳት፥ ይሁዳን፥ ቃጳዶቃን፥ ጳንፆሳን፥ ኢሰን፥
10 ፕርገን፥ ጵንፍለን፥ ግብፀን፥ ቃረና ማታን ደእያ ሊበን ደኤይሳታ። ኑፐ ባጋትካ ሮመፐ ይዳ አሳታ።
11 አይሁደትነ አይሁደተꬃ አማኖ ገልዳ አሳት፥ ቃርፄሳነ አራበ አሳት፥ ፆሳይ ኦꬅዳ ግታ ኦሱዋ ኑ ቃላን ኦደትሽን ስኦስ” ያግዶሶና።
12 ኡባይ ማላለትድ፥ ጋናባ ꬋይድ፥ “ላ ሀይስ አይ ጉሴ?” ያግዶሶና።
13 ሽን ሀራት፥ “ሀይሳቲ ዎይነ ኡይድ ማꬆትዶሶና” ያግድ ቀልቅስዶሶና።
ጰፅሮሳ ሃሳያ
14 ሽን ጰፅሮስ፥ ታማነ እስ ሀዋረታራ ደንድ ኤቅድ፥ ባ ቃላ ꬎቁ ኦꬅድ፥ ኤንታዉ ሀይሳዳ ያግድ ኦድስ፦ “አይሁደቶ፥ የሩሳላመን ደእያ ኡባቶ፥ ታኒ ኦደይሳ ስእተ።
15 ዎንታፈ ሄꬑ ሳተ ግድያ ግሾ ህንተ ቆፐይሳዳ ሀ አሳት ማꬆትቦኮና፤ ሄስ ህንተዉ ኤረቶ።
16 ሽን ሀይስ ሀንዳይ ናበይ እዩኤል ኦድዳይስ ፖለታና መላሳ።
17 “ ‘ፆሳይ፥ ዎድያ ዉርሰꬃን ሀይሳዳ ሀናና ያጌስ፦
ታኒ አሳ ኡባ ቦላ ታ አያና ጉሳና።
ህንተ አደ ናይትነ ማጫ ናይት፥
ትንብተ ኦዳና።
ህንተ ያላጋት ቆንጨꬅ በአና፤
ህንተ ጭማት አሙሆ አሙሀና።
18 ሄ ጋላሳታን ታና አማንያ አደ አይለታ ቦላነ ማጫ አይለታ ቦላ
ታኒ ታ አያና ጉሳና፤
ኤንቲ ትንብተ ኦዳና።
19 ቃስ ታኒ ቦላ ሳሎን ኦራꬃባ፥
ጋርሳ ሳአንካ ማላ በሳና።
ሱꬃይ፥ ታማይነ ዎልቃማ ጫጋናይ በንታና።
20 ግታነ ቦንቾ ግድዳ ጎዳ ጋላሳይ
ጋካናፐ ስን አው ꬉማና፤
አጌን ሱꬅ ዳናና።
21 ሄ ዎደ ሄሳዳ ሀናና፤
ጎዳ ሱንꬃ ፄግያ ኦንካ አታና’ ያግስ።
22 “እስራኤለ አሳቶ፥ ሀ ቃላ ስእተ። ናዝረተ የሱሳ ኦናተꬃይ፥ ፆሳይ ህንተ ግዶን ኦꬅዳ ዎልቃማ ኦሱዋንነ ማላታታን ህንተዉ ቆንጮይሳ ህንተ፥ ህንተ ሁጰን ኤሬታ።
23 ፆሳ ካሰ ኤራንነ እያ ሸነን፥ የሱሲ ህንተዉ አꬍድ እመትስ። ህንተ፥ ናጋራንቾት እያ ማስቃለ ቦላ ካቅድ ዎꬋና መላ አꬅድ እምደታ።
24 ሽን ፆሳይ ሀይቆ ዎልቃ ድግድ እያ ደንꬅስ። ሄሳ ግሾ፥ ሀይቆይ እያ ኦይካናዉ ዳንዳእቤና።
25 ዳዊቲ እያባ ኦድሸ፥
“ ‘ታኒ ያርኮና መላ፥
ጎዳይ ታ ኡሻቻን ደኤስ።
ጎዳ ኡባ ዎደ ታ ማታን በአይስ።
26 ሄሳ ግሾ፥ ታ ዎዛናይ ኡፋይትስ፤
ታ እንፃርሳን ኡፋይስ ኩምስ፤
ሀይቅያ ታ አሳተꬃይ ኡፋይሳን ዳና።
27 አይስ ጊኮ፥ ታ ሸምፑዋ ስኦለን አጋካ።
ቃስ ነ ጌሻ ናአ አሀ ዎቅሳካ።
28 ኔኒ ታና ደኦ ኦገ ኤርሳዳሳ።
ኔኒ ታራ ደኤይሳን ታ ኡፋይሳይ ኩመꬅ ግዴስ’ ያግስ።
29 “አሳዉ፥ ኑ አዋ ዳዊታባ ታ ህንተዉ ጌሻዳ ኦዳና። ዳዊቲ ሀይቅድ ሞገትስ፤ እያ ዱፎይ ሀች ጋካናዉ ኑ ማታን ደኤስ።
30 ዳዊቲ ናበ ግድዳ ግሾ፥ ፆሳይ እያ ሼሻፐ እሱዋ እያ ካዎተꬃ አራታ ቦላ ኡትሳናዉ እያዉ ጫቅዳ ጫቁዋ ኤሬስ።
31 ሄሳ ግሾ፥ ክርስቶሳ ደንዱዋ ስን ፄልድ፥ ‘እያ ሸምፖይ ስኦለን አትቤና፤ እያ አሳተꬃይካ ዎቅቤና’ ግድ ኦድስ።
32 “ፆሳይ፥ ሀ የሱሳ ሀይቆፐ ደንꬅዳይሳስ ኑኒ ኡባይ ማርካ።
33 ሄሳ ግሾ፥ ፆሳይ ባራ ሃራና መላ ባፐ ኡሻቻ ባጋራ እያ ꬎቁ ꬎቁ ኦꬅድ፥ እያዉ እማና ጌተትዳ ጌሻ አያና ኤክድ፥ ሀይሳ ህንተ ሀእ በኤይሳነ ስኤይሳ ኑ ቦላ ጉስስ።
34-35 ጋሶይካ፥ ዳዊቲ ባ ሁጰን ሳሎ ብቤና ሽን ያግስ።
“ጎዳይ፥ ታ ጎዳ፥ ‘ታኒ ነ ሞርከታ
ነ ቶሆይ የꬍያሶ ኦꬃና ጋካናዉ
ሀይሳን፥ ታፐ ኡሻቻ ባጋራ ኡታ’ ” ግስ።
ያግስ።
36 “ሄሳ ግሾ፥ ሀ ህንተ ማስቃለ ቦላ ካቅዳ የሱሳ፥ ፆሳይ ጎዳነ ክርስቶሳ ኦꬅዳይሳ እስራኤለ አሳ ኡባይ ቱማ ኤሮ” ያግስ።
37 አሳይ ጰፅሮስ ግዳይሳ ስእዳ ዎደ ባንታ ዎዛናን ቦሸትድ ጰፅሮሳነ ሀንኮ ሀዋረታኮ፥ “እሻቶ፥ ያትን ኑኒ አይ ኦꬅኖ?” ያግዶሶና።
38 ጰፅሮስ ኤንታኮ፥ “ህንተ ናጋራይ አቶ ጌተታና መላ ናጋራፐ ስሚድ፥ ህንተ እሶይ እሶይ የሱስ ክርስቶሳ ሱንꬃን ፃማቀትተ። ፆሳይ እምያ ጌሻ አያና ህንተ ኤካና።
39 ጋሶይካ ፆሳይ እማና ግዳ ኡፋይሳ ቃላይ ህንተዉ፥ ህንተ ናይታስነ ጎዳይ ኑ ፆሳይ ባኮ ፄግያ ሃሆን ደእያ ኡባሳ” ያግስ።
40 ጰፅሮስ ኤንታዉ ሀራ ቃላካ ጉጅ ማርካትድ፥ “ሀ ዎድያ ጌላ አሳ ቦላ ያናዉ ደእያ ፕርዳፈ ህንተ ሁጵያ አሽተ” ያግድ ዞርስ።
41 ጰፅሮስ ኦድዳይሳ ኤክዳይሳት ፃማቀትዶሶና። ሄ ጋላስ ሄꬑ ሙኩሉ ግድያ አሳይ አማንዶሶና።
42 ኤንቲ ሀዋረታ ትምርትያን፥ እስፈተꬃን፥ ኡይꬃ ሙሳንነ ዎሳን ምኖሶና።
43 ሀዋረታ ኩሸን ዳሮ ኦራꬃባይነ ማላት ኦሰትያ ግሾ አሳ ኡባይ ያይዶሶና።
44 አማንዳ ኡባይ እስፈ ደኦሶና፤ ባንታዉ ደእያባ ኡባ እስፈ ሻከቶሶና።
45 ኤንቲ ባንታዉ ደእያባ ባይዝድ ሚሽያ እሱዋስ እሱዋስ ኮሽዳ መላ ሻኮሶና።
46 ኡባ ጋላስ እስ ዎዛናን ግድድ ፆሳ ኬꬃን ሺቆሶና። ባንታ ኬꬃን እሶይ እሱዋ ፄግድ ኡፋይሳንነ አሽከ ዎዛናን ካꬅ ሞሶና።
47 ፆሳ ጋላትሸ አሳ ኡባን ሳበትዶሶና። ጎዳይ አተይሳታ ጋላስ ጋላስ ኤንታ ቦላ ጉጄስ።