10
ጳዉሎስ ሞትያ አሳስ ዛርዳ ዛሩዋ
1 ታኒ ህንተራ ደእያ ዎደ፥ “ሹጎ”፥ ቃስ ህንተፈ ሃክያ ዎደ “ኑ ቦላ ምኔስ” ያገትዳ፥ ጳዉሎስ፥ ኬሀነ አሽከ ግድዳ ክርስቶሳ ሱንꬃን ህንተና ዎሳይስ።
2 ታኒ ህንተኮ ብያ ዎደ ኑ አሾ ቆፋራ ስመረትያ አስ ኦꬅድ ቆፕያ አሳ ቦላ ምኖ ቃላን ኦደታናዉ ቆፋ ቃቻስ። ህንተ ቦላ ሄሳዳ ኦደታና መላ ህንተ ታና ኦꬆናዳ ህንተና ዎሳይስ።
3 ኑኒ ሀ ሳአን ደእኮካ ሀ ሳኣ አሳዳ ኦለቶኮ።
4 ኑ ኦላ ሚሸይ ሀ ሳአባ ግደና። ሽን ሚፃ ላላናዉ ዎልቃራ ደእያ ፆሳ ቶራ። ቱማራ ኤቀትያ ፓላማነ፥
5 ፆሳ ኤራተꬃ ቦላ ኦቶሮን ደንድያ ፓላማነ ሀዳ ቆፋ ኡባ ላሎስ። አሳ ቆፋ ኡባ ድእድ ክርስቶሳስ ኪተታና መላ ኦꬆስ።
6 ህንተ ኪተተꬃይ ፖሎ ግድያ ዎደ ኑኒ ኪተተꬃ እፆ ኡባ ሴራናዉ ጊገታና።
7 ህንተ አይፈይ በእዳ መላ ፕርደታ። ኦንካ ባና ክርስቶሳባ ግድ ቆፕያባ ግድኮ፥ ኑካ ክርስቶሳባ ግደይሳ ኤሮ።
8 ጎዳይ ታዉ እምዳ ማታን ጬቀትኮካ ሄሳን ዬላትከ። ሄ ማታይ ታዉ እመትዳይ ህንተና ድቻናሳፈ አትሽን፥ ቆሀናሳ ግደና።
9 ታኒ ታ ዳብዳብያን ህንተና ያሽሳናዉ ኮያዳ ፃፍዳባ ዳኖፖ።
10 እስ እስ አሳይ፥ “ጳዉሎሳ ዳብዳበይ ዴፆነ ዎልቃማ፥ ሽን እያ ሶምኦን በእያ ዎደ እ ዳቡራንቾ፤ እያ ኦዳይካ ፓና” ያጎሶና።
11 ሄ አሳት ኑ ሃሆን ደእሸ ፃፍያ ዳብዳብያንነ ማታን ህንተራ ደእሸ ኦꬅያ ኦሱዋ ግዶን ዱማተꬅ ባይናይሳ አኬኮ።
12 ኑኒ ባንታና ናሽያ አሳታራ ኑና ግናያናዉ ዎይኮ ጋደያናዉ ኮዮኮ። ሽን ኤንቲ ባንታና ባንታራ ግናይድ ዎይኮ ጋደይድ በእሸ ኤያ።
13 ሽን ኑኒ ፆሳይ ኑስ እምዳ ꬋሳን ጬቀቶስፐ አትሽን፥ ዛዋ ፕንድ ጬቀቶኮ፤ ሄ ዛዋይ ህንተኮካ ጋኬስ።
14 ኑኒ በሰይሳፈ አꬅድ ጬቀቶኮ፥ ሽን ክርስቶሳ ዎንገላ ህንተኮ ጋꬅዳይሳን ጬቀቶስ።
15 ኑኒ ፆሳይ ኤስዳ ዛዋፐ ፕንድ፥ ሀራት ኦꬅዳ ኦሶን ጬቀቶኮ። ግዶሽን፥ ህንተ አማኖይ ድጫና መላ ፆሳይ እምዳ ዛዋን ህንተ ግዶን ኑ ኦꬅያ ኦሶይ ዳልጋና ግድ ቆፖስ።
16 ኑኒ ሀራ አስ ባ ዛዋን ኦꬅዳ ኦሶን ገልድ ጬቀቶኮ፥ ሽን ህንተፈ ፕንድ ሀራታስ ዎንገላ ማርካታናዉ ዳንዳኦስ።
17 ሽን፥ ጌሻ ማፃፋን፥ “ጬቅያ ኡባይ ጎዳ ሎኦተꬃን ጬቆ” ያግድ ፃፈትስ።
18 ጎዳይ ናሽያ ኡራፐ አትሽን፥ ባና ባዉ ናሽያ ኡራይ ናሸተና።