2
1 ታ ህንተዉነ ሎዶቀ ካታማን ደእያ አሳስ፥ ሄሳዳካ ታና አይፈን በእቦና አሳ ኡባስ አይ መላ ባፀትያኮ ህንተ ኤራና መላ ኮያይስ።
2 ታ ባፀትያ ጋሶይካ ኤንቲ ባንታ ዎዛናን ምንድ፥ ሲቆን ቃሸትድ፥ ፖሎ ግድዳ ኩመꬃ አኬካ ዱረተꬃ ደምድ ፆሳ ፁራ ክርስቶሳ ኤራና መላሳ።
3 እያን ፆሳይ ምንጅዳ ኤራይነ ጭንጫተꬃ ኡባይ ደኤስ።
4 ታ ሄሳ ኦንካ ህንተና ጭሞ ቃላን ባለꬆና መላ ኮያዳ ጋይስ።
5 ታ ህንተፈ ሃካዳ ደእኮካ አያናን ህንተራ ደአይስ። ህንተ ዱሳ ማራነ ክርስቶሳ ህንተ ምንድ አማነይሳ በአዳ ኡፋይታይስ።
ክርስቶሳን ኩመꬃ ደኦ
6 ህንተ ጎዳ ክርስቶስ የሱሳ ኤክዳይሳዳ እያን ደእተ።
7 እያን ፃጶ የድተ፤ እያን ኬፀትተ። ህንተ ታማርዳይሳዳ አማኖን ምንተ፤ ፆሳስ ኩምድ ፓላህዳ ጋላታ እምተ።
8 ክርስቶሳፐ ግዶናሽን፥ አሳ ዎጋንነ ሀ አላምያ ጮ ዎጋን ካትዳ ትምርተንነ አሳፐ ይዳ ኤራተꬃን ኦንካ ህንተና ጭም ባለꬅድ ድኦና መላ ናገትተ።
9 ፆሳ ፆሳተꬃይ ክርስቶሳ አሳተꬃን ኩመꬅ ደኤስ።
10 ህንተካ ማታስነ ዎልቃ ኡባስ ሁጰ ግድያ ክርስቶሳን ኩምደታ።
11 ህንተ ክርስቶሳ አማንድ ቃፃረትደታ። ሄስካ አሳ ኩሸን ግዶናሽን፥ ህንተና ኢታ ሀኖተꬃፈ ድግያ ክርስቶሳን ኦሰትዳ ቃፃረተꬅ።
12 ህንተ ፃማቀትዳ ዎደ ክርስቶሳራ እስፈ ሞገትድ፥ ክርስቶሳ ሀይቆፐ ደንꬅዳ ፆሳ ዎልቃ አማንድ፥ ክርስቶሳራ እስፈ ደንድደታ።
13 ህንተ፥ ህንተ ናጋራ ግሾነ ህንተ ጬጋ አሳተꬃ ቃፃረቶና ግሾ ሀይቅድ ደእሽን፥ ፆሳይ ህንተ ናጋራ አቶ ግስ። ክርስቶሳራ ህንተዉ ደኦ እሚስ።
14 እ ኑና ሞትያነ ኑራ ኤቀትያ፥ ኑ ቦላ ፃፈትዳ አጩዋ ዳክድ ማስቃልያ ቦላ ꬍሽድ ኦገፐ ድግስ።
15 ክርስቶስ ዎልቃታነ ማታታ ማስቃልያን ፆንድ፥ ኤንታ ኦላ ዳንጩዋ ብልስድ፥ ድኤትዳ አሳዳ ኤንታ ቆንጨን ዩሽ በስስ።
16 ሄሳ ግሾ፥ ምያባን ዎይኮ ኡያባን፥ ባኣለ ጋላስ ዎይኮ አጌን ፄርያ ቃማ ቦንቾን ኦንካ ህንተ ቦላ ፕርዶፎ።
17 ሀይሳቲ ስንꬃፈ ያናዉ ደእያባታስ ኤሾ፥ ሽን ቱማይ ክርስቶሳ።
18 ቆፐ ቆሞ አሽከተꬃንነ ኪታንቾ ጎይኖን ጬቀትያ ኦንካ ህንተና ህንተ ዎይቱዋፐ አሾፎ። ሄሳ መላ አስ ባ በእዳ ቆንጨꬃን ናሸትሸ ባ አሾ ቆፋን ጮ ኦቶርቴስ።
19 ሄሳ መላ አሳስ ሁጰ ግድዳ ክርስቶሳራ ጋሄተꬅ ባዋ። እ አሳተꬃ ኡባ ሻያንነ ከሶን ከሶን ጋꬅ ኦይꬅድ ሙዝድ ድቼስ። ፆሳይ ሄሳ መላ ኦገን አሳተꬃ ኡባስ ድች እሜስ።
ኦራꬃ ደኦ
20 ህንተ ክርስቶሳራ ሀይቅድ ሀ አላምያ ሃርያ አያናታ ዎልቃፈ ላአ ከይደታ። ያትን፥ አይስ ሻከቶና አሳዳ ግድድ ሀ ዎጋታስ ሀረተቲ?
21 ሄ ዎጋት፥ “ኦይኮፋ፤ ላጮፋ፤ ቦቾፋ” ጌተተይሳታ።
22 ሀ ኡባይ አሳ ዎጋነ ትምርተ ግድያ ግሾ ኦሶ ቦላ ፔእዳፐ ጉየ ꬋያና።
23 ሀ ኪታት ቦንቾነ ጭንጫተꬅ ዳንድ በንታናዉ ዳንዳኦሶና። ሀ ዎጋት ፆሰ ዳሮ ዶስስያባ፥ አሽከነ ህንተ አሳተꬃ ሃርስያባ ዳኖሶና፥ ሽን ኑ ኢታ አሞተꬃ ቦላ ኤንታዉ ዎልቅ ባዋ።