1 ህንተ፥ ጎዳ ህንተ ፆሳ ናይታ፤ ሀይቅዳ አሳስ ህንተ አሳተꬃ ጋሮፕተ፤ ህንተ ሁጵያ ቡሉሶፕተ። 2 ህንተ፥ ጎዳ ህንተ ፆሳስ ጌሻ ደረ፤ ጎዳይ ህንተና ባ አሰ ግዳና መላ ቢታን ደእያ አሳ ኡባፈ ባዉ ዶርስ።

3 ኔኒ ቱናባ አይባካ ሞፓ። 4 ነ ማና መሄትነ ዶአት ሀይሳታ፤ ቦር፥ ዶርሰ፥ ዴሸ፥ 5 ዶገ፥ ባቾ፥ ዎሽኤ፥ ዎራ ዴሽ፥ ዋልያ፥ ጋራነ ዙማ ዶርሰ። 6 ሹቁለይ ጳልቀትዳይሳነ ዋሞትያ መሄታነ ዶአታ ኡባ ሚተ። 7 ሽን ሹቁለይ ጳልቀቶናይሳታነ ዋሞቶናይሳታ ሞፓ፤ ሄስካ ግማለ፥ ኤሸነ ጉፓለ። ሀይሳቲ ዋሞቶሶና፥ ሽን ኤንታ ሹቁለይ ጳልቀትቦና ግሾ፥ ኤንቲ ህንተዉ ቱና። 8 ጉዱንꬆስ ሹቁለይ ጳልቀꬅ፥ ሽን ዋሞቶና ግሾ እ ህንተዉ ቱና። እያ አሹዋ ሞፓ፤ እያ ባዉታ ቦቾፍተ።

9 ሃꬃ ግዶን ደእያ መተꬃታ ግዶፈ ህንተ ማናይሳት ሀይሳታ፤ ሞሎ መላ ቀፈይነ ፖቆይ ደእያ ኡባ ሚተ። 10 ሽን ሞሎ መላ ቀፈይነ ፖቆይ ባይናይሳታ ሞፕተ ሄስ ህንተዉ ቱና።

11 ቱና ግዶና ካፎ ኡባ ሚተ። 12 ሽን ካፎታፐ ህንተ ሞና አጋና ካፎት ሀይሳታ፤ አርጋንꬅ፥ ባዞ አንኮ፥ ካሬꬃ አንኮ፥ 13 ጵርጮ፥ ፅሎ ኮቸ ኡባ፥ 14 ቆራሰ ኮቸ ኡባ፥ 15 ያንቾ፥ ሃꬃ ካፎ፥ ቃማ ካፎ ኮቸ ኡባ፥ 16 ላፋ ጉቶ፥ ዲድን፥ ሃꬃ ኩቶ፥ 17 ባዞ ጉቶ፥ ሞሎ ካፎ፥ ሶሌ፥ ሀዛዞ፥ 18 ሳብሳ ጌተትያ ካፎ ኮቸ ኡባ፥ አያና ካፎነ ሽርሽቆ። 19 ቀፈራ ደእያ ላፋ መተꬃት ኡባይ ህንተዉ ቱና፤ ኤንታ ሞፕተ። 20 ሽን ቀፈራ ደእያባታፐ ቱና ግዶናይሳታ ሚተ።

21 ኔኒ፥ ጎዳ ነ ፆሳስ ጌሻ አስ ግድያ ግሾ፥ ባዉታ ኡባ ሞፓ። ሄሳ ህንተ ካታማን ደእያ በተ አሳይ ማና መላ ኤንታዉ እማናዉ ዳንዳኤታ፤ ዎይኮ ሀራ ቢታ አሳስ ባይዛናዉ ዳንዳኤታ።

ዴሻ ናአ እያ አየ ማꬃራ ካꬆፋ።

22 ነ ጋደን ላይꬃን ላይꬃን ካፅያ ካꬃ አይፈ ኡባፈ አስራታ ከሳ። 23 ነ ኡባ ዎደ ጎዳስ ነ ፆሳስ፥ ያሽ ታማራና መላ ባ ሱንꬃይ ፄገታና መላ እ ዶርዳ በሳን፥ ነ ካꬃ፥ ዎይነ ኡሻነ ዛይትያ አስራታ፥ ነ ዶርሳፈነ መህያፐ ባይራ የለትዳይሳ ያን፥ ጎዳ፥ ነ ፆሳ ስንꬃን ማ። 24 ጎዳይ ነ ፆሳይ ባ ሱንꬃይ ፄገታና መላ ዶርዳ በሳይ፥ ነ ደእያ በሳፈ ዳሮ ሃሆ ግድኮ፥ ጎዳይ ነና አንጃና መላ ነ አስራታ ያ ኤፋናዉ ዳንዳኦናባ ግድኮ፥ 25 ሄ አስራታ ባይዛዳ ሚሽያ ጎዳይ፥ ነ ፆሳይ ዶርዳ በሳ ኤፋ። 26 ሄ ሚሽያን ነ ኮይዳ ሚዝ ዎይኮ ዶርሰ ዎይኮ ዎይነ ኡሽ ዎይኮ ሀራ ምኖ ኡሽ ዎይኮ ሀራ ነ ኮይያባ ሻማዳ፥ ነነ ነ ሶ አሳይ ጎዳ፥ ነ ፆሳ ስንꬃን ሄሳ ማዳ ኡፋይታ።

27 ኤንቲ ኔራ ሻከትድ ኤክዳ ሀራ ላት ኤንታዉ ባይና ግሾ፥ ሄሳ ነ ኦꬅያ ዎደ ነ ካታማን ደእያ ሌወታ ዶጎፓ። 28 ሄꬓንꬆ ላይꬃን ላይꬃን ነ ካꬃ አስራታ ኤሀዳ ነ ካታማን ሺሻ። 29 ሄሳ ነ ካታማን ደእያ፥ ኔራ ሻክትድ ኤክዳ ሀራ ላት ባይና ሌወት፥ በተ አሳይ፥ ይኦ ናይትነ አምኤት ይድ ሞ። ያትኮ፥ ነ ኦꬅያ ኦሶ ኡባን ጎዳይ፥ ነ ፆሳይ ነና አንጃና።