29
ሞአበን ዛር ኢምዳ ጫቁዋ
1 ጎዳይ ኮሬባ ዙማን፥ እስራኤለ አሳራ ጫቅዳ ጫቁዋ ቦላ ጉጅድ ሞአበን ኤንታራ ጫቃናዉ ሙሰ ኪትዳ ጫቆ ቃላት ሀይሳታ።
2 ሙሰይ እስራኤለ አሳ ኡባ ፄግ ሺሽድ፥ ሀይሳዳ ያግስ።
ጎዳይ ግብፀ ካዋ ቦላ፥ እያ ኦላንቾታ ቦላነ እያ ቢታ ኡባ ቦላ ኦꬅዳባነ ጋꬅዳባ ህንተ፥ ህንተ አይፈን በእደታ።
3 ኤንታ ቦላ ጋꬅዳ ኢታ መቶታ፥ ማላልስያባታነ ግታ ማላታታ ህንተ፥ ህንተ አይፈን በእደታ።
4 ሽን ሀች ጋካናዉ ጎዳይ፥ ህንተዉ አኬክያ ዎዛና፥ ፄልያ አይፈነ ስእያ ሀይꬅ እምቤና።
5 ጎዳይ ኦይታሙ ላይꬅ ኩመꬅ ህንተና መላ ቢታን ካለꬅያ ዎደ ህንተ ማኦይ ዉርቤና፥ ህንተ ጫማይ ጭምቤና።
6 ጎዳይ፥ ህንተ ፆሳ ግደይሳ ህንተ ኤራና መላ ኡይꬅ ምቤከታ፤ ዎይነ ዎይኮ ሀራ ማꬆይያ ኡሽ ኡይቤከታ።
7 ኑኒ ሀ በሳ ጋክዳ ዎደ ሀሰቦና ካዎይ ስሆንነ ባሳነ ካዎይ ኦገይ ኑራ ኦለታናዉ ከይዶሶና፥ ሽን ኑኒ ኤንታ ፆንዳ።
8 ኤንታ ቢታ ኤክድ፥ ሮቤላነ ጋደ ኮቻስ፥ ቃስ ምናሰ ኮቻፈ ባጋስ ላታ ኦꬅድ እምዳ።
9 ህንተ ኦይክያባይነ የꬍያባይ ህንተዉ አንጀታና መላ ሀ ጫቆ ቃላታ አማነትድ ናግተ።
10 ሀች ህንተ ኡባይ፥ ኮቻታ ሀላቃት፥ ጭማት፥ ሹማትነ እስራኤለ አሳ ኡባይ ሀይሳን ጎዳ ስንꬃን ኤቅደታ።
11 ህንተ ናይታራ፥ ህንተ ማቸታራ፥ ህንተ ግዶን ደእድ፥ ምꬅ ምፅያነ ሃ ትክያ ሀራ ቢታ አሳራ እስፈ ሀይሳን ኤቅደታ።
12 ጎዳ፥ ህንተ ፆሳራ ቃላ ገላናዉ ሀይሳን ኤቅደታ። ጎዳይ ሀ ቃላ ሀች ህንተራ ጫቆን ምንꬃና።
13 ጎዳይ ህንተና ባ አሰ ኦꬅድ ምንꬃና፤ ህንተዉነ ህንተ ማይዛታስ፥ አብራሃመስ፥ ይሳቃስነ ያይቆባስ ጫቅዳይሳዳ እ ህንተዉ ፆሰ ግዳና።
14 ጎዳይ ሀ ጫቆ ቃላ ኤሰይ ህንተ ፃላላራ ግደና።
15 ሀች ሀይሳን፥ ጎዳ፥ ኑ ፆሳ ስንꬃን ኤቅዳ ኑ ኡባራነ ስንꬃፈ ያና የለታ ኡባራ ኤሴስ።
16 ኑኒ ግብፀን ዋንድ ደእዳኮነ ሀእ ጋካናዉ ኦገን ደእያ ካዎተꬃታ ግዶራ ዋንድ ካንꬅድ ይዳኮ ኤሬታ።
17 ኤንታ ግዶን ደእያ እፀትዳ ምꬃ፥ ሹቻ፥ ብራነ ዎርቃ ኤቃ ምስለታ በእደታ።
18 ሀ ህንተፈ ኦንካ አደ ግድን ማጫ ግድን፥ እስ ሶ አስ ግድን፥ እስ ኮች ግድን ጎዳ፥ ኑ ፆሳፈ፥ ሃክድ ሀራ ካዎተꬃታ ፆሳታ ጎይኖና መላ ናገትተ። ሄሳ መላ ጫምያነ ዎꬍያ አይፈ አይፍያ አስ ህንተ ግዶን ደኦፖ።
19 ሀ ጫቆ ቃላ ስእድ፥ ባ ዎዛናን፥ “ታ ሸነን ታኒ ቢኮካ፥ መቶይ ባዋ” ያግድ ባና ጭምኮ፥ ሄሳ መላ አስ ሎኦታ ቦላነ ኢታታ ቦላ ꬋዮ ኤሄስ።
20 ጎዳ ሀንቆይነ ቃናተይ ሄሳ መላ አሰ ቦላ ኤፅድ ከያና። ሀ ማፃፋን ፃፈትዳ ባደꬅ ኡባይ እያ ቦላ ያና፤ ሳሎፐ ጋርሳን እያ ሱንꬃ ጎዳይ ቁቻና።
21 ጎዳይ ሀ ህገ ማፃፋን ፃፈትዳ ባደꬃ ጫቆ ቃላዳ ሄ ኡራ እስራኤለ ግዶፈ ሻክድ ꬋይሳና።
22 ያና የለተꬃይ፥ ህንተ ሼሻይነ ሃሆ ቢታፈ ያ ሀራ ቢታ አሳይ፥ ጎዳይ ህንተ ቦላ ኤህዳ ጋዱዋነ ሀርግያ በአና።
23 ቢታ ኡባይ ዲነንነ ማፅነን ኩማና፤ ቶከትያባይ ዴና፤ ዶልያባይ በንተና፤ ማትነ ምꬅ ዶለና። ጎዳይ ባ ሀንቆን ꬋይስዳ ሶዶማዳነ ጋሞራዳ፥ አዳማዳነ ፃቦይማ ካታማታዳ ሀናና።
24 ካዎተꬃት፥ “ጎዳይ ሀ ቢታ ቦላ ሀይሳ መላባ አይስ ኦꬅዴ? ሀ ዎልቃማ ሀንቁዋስ ጋሶይ አይቤ?” ያጋና።
25 አሳይ ዛሪድ፥ “ኤንቲ ጎዳይ፥ ኤንታ አዋታ ፆሳይ፥ ኤንታ ግብፀፈ ከስዳ ዎደ ኤንታራ ገልዳ ጫቆ ቃላ መንꬅዳ ግሾሳ።
26 ኤንቲ ኤሮና ፆሳታስነ እ ጎይኖፍተ ግዳ ፆሳታ ጎይንዶሶና።
27 ሄሳ ግሾ፥ ጎዳይ ሀንቀትድ፥ ሀ ማፃፋን ፃፈትዳ ባደꬃታ ኡባ ኤንታ ቦላ ኤህስ።
28 ጎዳይ ዎልቃማ ሀንቆ ሀንቀትድ፥ ኤንታ ቢታፈ ኤንታና ሾድድ ሀራ ቢታ የደꬅስ” ያጋና።
29 ፁራይ ኑ ጎዳ ኑ ፆሳሳ፥ ሽን ኑኒ ሀ ህገ ቃላ ኦꬃና መላ ቆንጭዳይሳት መርናዉ ኑሳነ ኑ ናይታሳ።