1 ጎዳ ቃላይ ሀይሳዳ ያግድ ታኮ ይስ፦ 2 “አሳ ናአዉ፥ እስራኤለ አሳስ ቃንእሽን ኦዳ፤ ሌምሶን ቆንጭሳ። 3 ኡባ ሃርያ ጎዳይ ሀይሳዳ ያጌስ ጋዳ ኦዳ። ‘ግታ ቀፈይነ ዱማ ዱማ ማላራ ደእያ ባለት ደእያ እስ አርጋንꬅ ደኤስ። ሄ አርጋንꬃይ ልባኖሰ ይድ ዝጋ ፄራን ኦይክስ። 4 ሄ ዝጋ ፄራ መንꬅ ኤክድ፥ ዛልኤይ ዳርያ ቢታ ኤፍድ ዛልአንቾታ ካታማን ቶክስ። 5 እ እስራኤለ ቢታፈ አጫ ኤፍድ፥ አራዳ ቢታን፥ ሃꬃ ማታን ቶክስ። 6 አጫይ ዳሮ አዱቆና ደእሸ ዳይድ አርጋንꬃኮ ስሚድ ድጭስ፤ ሽን እያ ፃጶይ ቢታ ግዶ ገልስ። ሄ ዎይነይ ዳሮ ታሸነ ሀይ ከስስ። 7 ሄሳዳካ፥ ግታ ቀፈይነ ዳሮ ባለት ደእያ ሀራ አርጋንꬅ ደኤስ። ሃ ደማናዉ ሄ ዎይነይ ባ ቶከትዳ በሳፈ ሄ አርጋንꬃይ ደእያ በሳኮ ባ ፃጱዋነ ባ ታሽያ የድስ። 8 ሽን፥ ሄ ዎይነይ ታሸ ከሳና መላ፥ አይፈ አይፋና መላነ ሎኦ ዎይነ ግዳና መላ አራዳ ቢታን፥ ዳሮ ሃꬅ ደእያ በሳን ቶከትስ’ ” ያጌስ።

9 ኡባ ሃርያ ጎዳይ ሀይሳዳ ያጌስ ጋዳ ኦዳ። “ሄ ዎይነይ ድጫኔ? ኮይሮ እያ ቶክዳ አርጋንꬃይ እያ ሾደኔ? እያ አይፈታ ቆቆፍድ፥ እያ እርፃ ሀይꬃታ መልሰኔ? እያ ሄ በሳፈ ፃጶራ ሾዳናዉ ግታ ዎልቃ ዎይኮ ዳሮ አስ ኮሸና። 10 እያ ሾድድ፥ ሀራ በሳን ቶክያኮ እ ድጫኔ? ዶሎሀ ባጋ ጫርኮይ ሾጭን ባ ቶከትዳ በሳን መለኔ?”

11 ጎዳ ቃላይ ሀይሳዳ ያግሸ ታኮ ይስ፦ 12 “ሄ ሌምሱዋ ብርሸꬃይ አይበኮ አነ ሀ ጌላ አሳታ ኦይቻ። ሄስ አይበ ጊኮ፥ ባብሎነ ካዎይ የሩሳላመ ይድ፥ ኤንታ ካዋነ ኤንታ ሀላቃታ ድእድ፥ ባብሎነ ኤፍስ። 13 ካዋ ሶ አሳፐ እሱዋ ኤክድ፥ ባራ ጫቅስድ፥ አሳ ግዶፈ ኤረትዳይሳታ ድእድ ኤፍስ። 14 ሄሳ ኦꬅዳይ ኤንታ ካዎተꬃይ ዎልቃ ꬋይድ፥ ዛሪድ ደንዶናዳ ባንታ ጫቁዋ ፃላላ ናግድ ዳና መላሳ። 15 ሽን ይሁዳ ካዎይ ማካልድ፥ ፓራታነ ዳሮ ኦላንቾታ የዳና መላ ግብፀ ኪትስ። ያትን ሄስ ሀናንዴ? ሄሳ ኦꬅዳ እ ከስ ኤካንዴ? እ ጫቁዋ መንꬅድ ሴረቶና አታንዴ?”

16 “ታኒ ኡባ ሃርያ ጎዳይ ታ ደኡዋን ጫቃስ። ባና ካዎꬅዳ ካዋ ጫቁዋ መንꬅዳ ግሾነ ጫቁዋ ካꬍዳ ግሾ፥ ሄ ካዋ ቢታን፥ ባብሎነን እ ሀይቃና። 17 ባብሎነ ኦላንቾት ዳሮ አሳ ዎꬋናዉ ግምብያ ዩሾን ቢታ ዶርድ ድርስ ጊግስያ ዎደ፥ ግብፀ ካዎይ ባ ኦላንቾታራነ ባ ዳሮ አሳራ ይድ አይኮካ ማደና። 18 እ ጫቆ ካꬍድ መንꬅዳ ግሾነ ባ ኩሽያ እምድ፥ ባ ግዳ ባ ኡባ ፖሎና አግዳ ግሾ ከስ ኤካናዉ ዳንዳኤና።”

19 “ታኒ ኡባ ሃርያ ጎዳይ ታ ደኡዋን ጫቃስ። እ ጫቁዋ ካꬍድ ታ ጫቁዋ መንꬅዳ ግሾ ታ ሱንꬃን ጫቅዳስ ታ እያ ቦላ ዛራዳ ኤሀና። 20 ታኒ ታ ግትያ እያ ቦላ ምጭን፥ እ ታ ፅህያን ኦይከታና። እ ታዉ አማነቶና እፅዳ ግሾ ታ እያ ባብሎነ ኤፋዳ፥ ያን እያ ቦላ ፕርዳና። 21 ዶረትዳ እያ ኦላንቾት ማሻን ሀይቃና፤ አትዳይሳት ዱማ ዱማ በሳራ ላለታና።” ሄሳ ኦደይ ታና፥ ጎዳ ግደይሳ ህንተ ኤራና።

22 ኡባ ሃርያ ጎዳይ ሀይሳዳ ያጌስ፤ “ታኒ ታ ሁጰን አዱሳ ዝጋ ፄራ ቃንፃ ኤካዳ፥ ꬎቃነ አዱሳ ዙማ ሁጰን ቶካና። 23 ታኒ እያ እስራኤለ ዙማ ሁጰን ቶካና፤ ያን ዳያና፤ አይፈ አይፋናነ ሎኦ ዝጋ ግዳና። ካፎ ኮቸ ኡባይ እያን ኬፃና፤ ኤንቲ እያ ታሽያ ኩያን ሸምፓና። 24 አዱሳ ምꬃ ዝቅ ኦይነ ቃንꬃ ምꬃ ꬎቁ ኦይ፥ ቃስ ጭልኦ ምꬃ መልሰይነ መላ ምꬃ አጭሰይ ታና ጎዳ ግደይሳ ቢታን ደእያ ምꬃ ኡባይ ኤራና። ታኒ ጎዳይ ሀይሳ ኦዳስ፤ ታ ኦድዳይሳ ታ ኦꬃና” ያጌስ።