27
ፅሮሳስ ከስዳ ዘለልስ
1 ጎዳ ቃላይ ሀይሳዳ ያግሸ ታኮ ይስ።
2 “አሳ ናአዉ፥ ፅሮሳስ ዘለልስ ከሳ።
3 ዩሾይ አባን ተቀትዳ ቢታን ደእያነ አባ ጋፃን ደእያ ዳሮ አሳራ ዛልእያ፥ ካታማስ፥ ኡባ ሃርያ ጎዳይ ሀይሳዳ ያጌስ።
“ ‘ነኖ ፅሮሳ፥ ታኒ ፑላነ
ቦረይ ባይና ማላ ሎኦ’ ” ያጋዳሳ።
4 ነ ዛዋይ አባ ጉልኣና፤
ነና ኬፀይሳት ሎይꬅድ ኦꬅድ ኬፅዶሶና።
5 ነ ሳንቃ ሳንራ ፂዳን ኦꬅዶሶና፤
ነ ማርካብያ ቱሳ ልባኖሰ ዝጋን ጊግስዶሶና።
6 ሃꬃ ፕꬍያ ምꬃት
ባሳነ ዎላፐ ኦሰትዶሶና።
ነ ማርካብያ ሂፃይ ቆጵሮሳ ፂዳን፥
እያ ዩሾይ ዳንጋርሳ ዛለን አሌቀትስ።
7 ነ ሻራይ ባንድራዳ ሃሆን በንታና መላ፥
ግብፀታ ሊኖፐ አሌቀትድ ኦሰትስ።
ነ ካማ ገሸይ ቆጵሮሳፐ ይዳ፥
ካሎሰ ኦቻ ቴራ ዳንያ ማኦፐ ኦሰትዳይሳታ።
8 ነ ማርካብያ ኮልፅሰይሳት ስዶናነ አርዋዳ ካታማታፐ ይዳይሳታ፤
ነ ማርካብያ ላገይሳት ሎህዳ ነ አሳታ።
9 ማርካብያ ጊግሰይሳት ገባላፐ ይዳ ኤራንቾታነ ካለꬅያ ሂላንቾታ፤
አባን ብያ ማርካበ ኡባን ደእያ ኦሳንቾት ዎꬋ ከያ ግድ ነ ግዶን ዛልኦሶና።
10 “ፋርሰፈ፥ ሊደፐነ ሊበፐ ይዳ ኦላንቾት፥
ነ ኦላንቾታ ማድድ ኦለትዶሶና።
ባንታ ጎንዳልያነ ባንታ ኦላ ባርኔፃ ነ ግዶን ካቅዶሶና፤
ኤንቲ ነና ቦንችዳ አሳታ።
11 አርዋዳነ ሄለካ ኦላንቾት፥
ነ ድርሳ ግምብያ ናጎሶና።
ጋማዳ አሳይ ነ አዱሳ ግምብ ሻኮ ቦላ ናጎሶና፤
ባንታ ጎንዳልያ ነ ግምብያ ቦላ ካቅዶሶና፤
ነ ፑላታና መላ ኦꬅዳይ ኤንታና።
12 ነ ዳሮ ዱረተꬃ ጋሶን ታርሰስ ኔራ ዛልእስ፤
እ ብራ፥ ብራታ፥ ቆርቆሮነ እርሳሰ ኔራ ላምድ ዛልኦሶና።
13 ያዋን፥ ቱባልነ ሞሳህ ኔራ ዛልእዶሶና፤
አይለታነ ናሰ ብራታ እምድ፥ ነ ሚሽያራ ላምዶሶና።
14 ቤት-ቶርጋማ አሳይ
ቶጋ ፓራታ፥ ኦላ ፓራታነ ባቁሎታ እምድ፥ ነ ሚሽያራ ላምስ።
15 ድዳና አሳይ ኔራ ዛልእዶሶና፤ ዩሾይ አባን ተቀትዳ ቢታታን ደእያ አሳይ ዳንጋርሳ ዛለነ ዞጰ ምꬅ ነዉ ኤሆሶና።
16 “ነ ዳሮ ዱረተꬃ ጋሶን፥ ሶረ አሳት ኔራ ዛልእዶሶና፤ ኤንቲ ጭሊሎ አልኦ ሹች፥ ዞኦ አልኦ ሹች፥ የሌሎ አሌቆ፥ ኦቻ ቴራ ዳንያ ማኡዋ፥ አልኦ ሊኖነ አሌቀትዳ ማኦ ኤህድ ነ ሚሽያራ ላምዶሶና።
17 ይሁዳነ እስራኤለ አሳይ ኔራ ዛልእዶሶና፤ ኤንቲ ምንተ ጋደ ግስተ፥ ማልዶ፥ ኤስ፥ ዛይተነ ꬋልያ ባልሳመ ዛይተ ነ ሚሽያራ ላምዶሶና።
18 ነ ዳሮ ዱረተꬅነ ሻሎይ ደእያ ግሾ፥ ዳማስቆይ፥ ከልቦና፥ ዎይንያነ ዛሃራ ዶርሳ እክሰ እምድ ነ ሚሽያራ ላምዶሶና።
19 ኡዛለን ደእያ ዳነነ ያዋና አሳይ ነ ዱማ ዱማ ሚሸታ ሻምዶሶና። ኤንቲ ነ ሚሽያራ ላማናዉ አሌቀትዳ ብራታነ ዱማ ዱማ ሳዎ ኤህዶሶና።
20 “ድዳና አሳይ ኮራ ግላሰ ኤህድ ዛልእዶሶና።
21 አራበትነ ቀዳረ ሀላቃት ኡባይ ነ ዛልኤ ሚሽያስ ዶርሳ ኡርገታ፥ ማራዘታነ ዴሻታ ኤህዶሶና።
22 ሳባነ ራማ ዛልአንቾት አልኦ ሹቹ፥ ዎርቃነ ዶረትዳ ሳዎታ እምድ፥ ነ ሚሽያራ ላምዶሶና።
23 ካራነ፥ ካነ፥ ኤደነ፥ ሳባ አሶረነ ከልማዳ ካታማት ኡባይ ኔራ ዛልእዶሶና።
24 ኤንቲ ሎኦ ማኦታ፥ ካሎሰ ዳንያ ማኡዋ፥ አሌቀትዳ ማኡዋ፥ ጋዛ ስጋጃታ፥ ሎይꬅ ዶቅዳ ስባጎታነ ዎዶሮታ እምድ፥ ነ ግያን ዛልኦሶና።
25 “ታርሰሳ ማርካበት ነ ሚሸታ ጫንዶሶና። ኔኒ ዳሮባይ ጫነትን፥ አባ ቦላ ብያ ማርካበ መላ ግዳዳሳ።
26 ነ ማርካብያ ላገይሳት ነና ኤክድ፥ አባ ግዶ ግና ኤፍዶሶና፤ ሽን ዶሎሀ ጫርኮይ ነና አባ ግዶን መንረꬅስ።
27 ኔኒ መቀረትዳ ዎደ ነ ዱረተꬃይነ ነ ዛልኤ ሚሸ ኡባይ፥ ነ ማርካብያ ላገይሳት፥ ነ ማርካብያ ጊግሰይሳት፥ ነ ዛልአንቾትነ ነ ግዶን ደእያ ኦላንቾት ኡባይ አባ ግዶን ሙከትዶሶና።
28 ኤንታ ዋሶይ አባ ጋፃ ደእያ ቢታ ዳጋንꬅስ።
29 “ማርካብያ ቦላ ኡትድ ሃꬃ ፕይሳት ኡባይ ማርካበታፐ ከይድ፥ አባ ጋፃን ኤቅዶሶና።
30 ኤንቲ ኡባይ ባንታ ሁጰን ባና ቆልድ፥ ብዶን ጎንዶረትሸ፥ ነ ꬋዩዋ ግሾ ኢታ ዬሆ ዬክዶሶና።
31 ነዉ ካዮትድ፥ ባንታ ሁጵያ ሜድድ፥ ካዮ ማኦ ማእዶሶና፤ ኤንቲ ዳሮ አዛንድ ነዉ ዬክዶሶና።
32 ኤንቲ ሀይሳዳ ያግድ ነዉ ዘሌልዶሶና፦
“ሀእ አባ ግዶን ስእ ግዳ፥
ፅሮሳ መል ኦኔ?”
33 “ነ ዛልኤ ሚሸይ አባ ፕንድ ያ ዎደ፥
ዳሮ አሳ ካልሳዳሳ፤
ነ ሻሉዋን ቢታን ደእያ ካዎት ዱረትዶሶና።
34 ሽን ሀእ ጪሞ አባን መቀረታዳሳ፤
ነ ዛልኤ ሚሸይነ ነዉ ኦꬅያ አሳ ኡባይ፥
ኔራ አባ ግዶን ሙከትድ ꬋይዶሶና።
35 ዩሾይ አባን ተቀትዳ ቢታን ደእያ አሳ ኡባይ
ነ ቦላ ጋክዳባ በእድ ዳጋምዶሶና።
ኤንታ ካዎት ዳሮ ያይዶሶና፤
ኤንታ ሶምኦይ ያሻን ሹልስ።
36 ነ ዉርሰꬃይ ዳጋንꬅያባ ግድስ፤
ኔኒ ዛራዳ ዳካ።
ሄሳ ግሾ፥ ቢታ ኡባን ደእያ
ዛልአንቾት፥ ሽንቻለ ግዶሶና” ያግስ።