33
ህዝቄል ዎችያ አስ
1 ጎዳ ቃላይ ሀይሳዳ ያግሸ ታኮ ይስ።
2 “አሳ ናአዉ፥ ነ ቢታ አሳስ ሀይሳዳ ያጋዳ ኦዳ፦ ‘ታ እስ ቢታ ቦላ ኦላ ኤህያ ዎደ ሄ ቢታ አሳይ ባንታ ቦላ ያባ ዎችያ አስ ዶሮ ባንታ ግዶፈ ዶሮ።
3 ሄ ዎችያ ኡራይ ሞርከይ ይሽን በእድ፥ አሳይ ናገታና መላ ሞይዘ ፑንኮ፥
4 ኦንካ ሞይዘ ፑኑዋ ስእድ፥ ናገቶና እፅን፥ ኦል ይድ እያ ዎꬍኮ፥ ሱꬃ አጮይ እያ ኦይኮ።
5 እ ሞይዘ ፑኑዋ ስእድ፥ ናገቶና እፅዳ ግሾ እያ ሱꬃ አጮይ እያ ቦላና። እ ስእድ ናገትዳባ ግድያኮ ሀይቆፐ አታናሽን።
6 ሽን ዎቸይስ ሞርከይ የይሳ በእሸ፥ ሞይዘ ፑንድ አሳ ኤርሶና አግኮ፥ ኦላይ ይድ፥ ሄ አሳፐ እስ አስ ዎꬍኮ፥ ሄ ኡራይ ባ ናጋራን ሀይቄስ፤ ሽን ታኒ እያ ሱꬃ ዎቸይሳ ኩሸፐ ኤካና’ ” ያጋ።
7 “አሳ ናአዉ፥ ታ ነና እስራኤለ አሳስ ዎችያ አስ ኦꬃስ፤ ታ ነዉ ኦደይሳ ስአዳ አሳ አኬክሳ።
8 ታኒ እስ ኢታ አስ፥ ‘ኔኒ ቱማ ሀይቃና’ ግያ ዎደ፥ እ ባ ናጋራፐ ስማና መላ ነ እያዉ ኦዶና እፅኮ፥ ሄ ኡራይ ባ ናጋራን ሀይቄስ፤ ሽን ታኒ እያ ሱꬃ ግሾ ነና አቻና።
9 ሽን ናጋራንቾይ ባ ናጋራፐ ስማና መላ ነ ኦድን፥ እ እፅኮ፥ እ ባ ናጋራን ሀይቄስ፤ ሽን ነ ነ ሸምፑዋ አሻሳ።”
10 “አሳ ናአዉ፥ እስራኤለ አሳስ ሀይሳዳ ያጋዳ ኦዳ፦ ‘ህንተ፥ ኑ ናጋራይ ኑ ቆሆይ ኑ ቦላ ደኤስ፤ ሄሳ ጋሶን ኑ ግልቅዳ። ያትን፥ ኑ ዋንድ ፓፃ ዳናዉ ዳንዳኦና?’ ” ያጌታ።
11 ታኒ ኡባ ሃርያ ጎዳይ ታ ደኡዋን ጫቃይስ፦ “ናጋራንቾይ ባ ናጋራ አግድ፥ ደኦን ዳና መላ ኮያይስፐ አትሽን፥ ናጋራንቹዋ ሀይቁዋን ኡፋይትከ። ህንተኖ፥ እስራኤለ አሳዉ፥ ስምተ፤ ህንተ ኢታ ኦሱዋ አግተ! አይስ ሀይቃናዉ ኮዬቲ?” ያግስ።
12 አሳ ናአዉ፥ ነ ቢታ አሳስ ኦዳ። “ፅሎ አስ ናጋራ ኦꬅኮ፥ እያ ካሰ ፅሎተꬃይ እያ አሸና፤ ቃስ ናጋራንቾይ ባ ናጋራፐ ስምኮ፥ ካሰ ናጋራ ግሾ እ ፕርደተና። ፅሎ አስ ናጋራ ኦꬅኮ፥ ካሰ ፅሎተꬃ ግሾ ደኦን ዳናዉ ዳንዳኤና።
13 ታኒ ፅሎ አሳኮ፥ ‘ኔኒ ቱማ ደኦን ዳና’ ያግዳ ዎደ፥ እ ባ ፅሎተꬃን አማነትድ ናጋራ ኦꬅኮ፥ ባ ኦꬅዳ ናጋራን እ ሀይቃናፐ አትሽን፥ ካሰ ፅሎተꬃይ እያው ቆፈተና።
14 ቃስ ታኒ ናጋራንቾ አሳኮ፥ ‘ኔኒ ቱማ ሀይቃና’ ያግዳ ዎደ እ ባ ናጋራፐ ስሚድ፥ ቱማነ ሱረ ኦሶ ኦꬅኮ፥
15 ሚሸ ታልአናዉ ኦይክዳባ ዛርኮ፥ ካይሶትዳባ ጉየ እምኮ፥ ናጋራ ኦሶ አግድ፥ ደኦ እምያ ህግያ ናግኮ፥ እ ቱማ ደኦን ዳናፐ አትሽን፥ ሀይቀና።
16 እ ካሰ ኦꬅዳ ናጋራይ እሶይ ቆፈተና፤ ሀእ ቱማነ ሱረ ኦሶ ኦꬅዳ ግሾ፥ እ ቱማ ደኦን ዳና።
17 “ግዶሽን፥ ነ ቢታ አሳይ፥ ‘ጎዳ ኦገይ ልከ ግደና’ ያጎሶና፤ ሽን ልከ ግዶናይ ኤንታ ኦግያ።
18 ፅሎ አስ ባ ፅሎተꬃ አግድ፥ ናጋራ ኦꬅኮ፥ እ ባ ናጋራን ሀይቃና።
19 ቃስ ናጋራንቾ አስ ባ ናጋራፐ ስሚድ፥ ቱማነ ሱረ ኦሶ ኦꬅኮ፥ ሄ ኦሱዋን እ ደኦን ዳና።
20 ሽን ህንተ፥ ‘ጎዳ ኦገ ልከ ግደና’ ያጌታ። እስራኤለ አሳዉ፥ ታ ህንተ እሱዋ እሱዋ ቦላ ህንተ ኦሱዋዳ ፕርዳና” ያግስ።
የሩሳላመ ኩንደꬅ
21 ኑኒ ድኤትዳ ታማነ ናምአንꬆ ላይꬃን፥ ታማንꬆ አጌናን፥ እቻሻንꬆ ጋላሳን፥ የሩሳላመፐ ከስ ኤክድ ይዳ እስ አስ ካታማይ ኩንድዳይሳ ታዉ ኦድስ።
22 ሄ ኡራይ ያናፐ እስ ጋላስ ስን፥ ኦማርሳ ዎደ ጎዳ ኩሸይ ታ ቦላ ደኤስ፤ ታ ዶናይ ዶየትስ፤ ዎንተꬃ ጋላስ ሄ ኡራይ ታኮ ጋክያ ዎደ ታኒ ኦዳ ዶማስ።
23 ጎዳ ቃላይ ሀይሳዳ ያግሸ ታኮ ይስ።
24 “አሳ ናአዉ፥ እስራኤለ ቢታን ላለትዳ ካታማታን ደእያ አሳይ ሀይሳዳ ያጎሶና፦ ‘አብራሃመይ ባርካ ደእያ እስ አስ፤ እ ሀ ቢታ ላትስ፤ ሽን ኑኒ ዳሮ፤ ቢታይ ቱማ ኑስ ላታ ግድድ እመትስ’ ” ያጎሶና።
25 ሄሳ ግሾ፥ ኡባ ሃርያ ጎዳይ ሀይሳዳ ያጌስ ጋዳ ኤንታዉ ኦዳ። “ህንተ ሀእካ ሱꬃራ ደእያ አሾ ሜታ፤ ኤቃ ጎይነታ፤ ሸምፖ ዎꬌታ። ሀይሳ ኡባ ኦꬅሸ ህንተ ቱማ ቢታ ላታኔ?
26 ህንተ ህንተ ማሻን አማነተታ፤ ቱና ኦሶ ኦꬄታ፤ ህንተ ኡባይ ህንተ ሾሩዋ ማቸታ ቱንሴታ። ሀይሳ ኡባ ኦꬅሸ ህንተ ቱማ ቢታ ላታኔ?” ያጌስ።
27 ኡባ ሃርያ ጎዳይ ባ ደኡዋን ጫቅድ ሀይሳዳ ያጌስ፦ “ላለትዳ ካታማታን ደእያ አሳይ ማሻን ሀይቃና፤ ካታማፐ ጋፃን ደእያ አሳ ታኒ ባዞ ዶኣስ ካꬅ ኦꬃና፤ ደረ ቦላነ ጎንጎሎ ግዶን ደእያ አሳይ ኢታ ሀርገን ሀይቃና።
28 ታ ሄ ቢታ ካሎነ ባይስ ከሳና፤ ኤንቲ ኦቶርትያ ዎልቃይ ዉራና፤ እስራኤለ ደረት አይ አስካ ያራ ካንꬆና ባይስ ግዳና።
29 ኤንቲ ኦꬅዳ ቱና ጋሶን ታኒ ቢታ ካሎነ ባይስ ከስያ ዎደ፥ ታኒ ጎዳ ግደይሳ ኤንቲ ኤራና” ያጌስ።
30 “አሳ ናአዉ፥ አሳይ ካታማ ድርሳ ማታንነ ባንታ ኬꬃታ ፐንገን ኤቅድ፥ እሶይ እሱዋራ ሀይሳዳ ያግድ፥ ነባ ኦደቴስ። ‘ሃይተ፤ ጎዳ ማታፐ ይዳ ቃላይ ዎይግያኮ አነ ስኦስ’ ያጎሶና።
31 ኤንቲ ካሰ አሳይ የይሳዳ ኔኮ ዮሶና፤ ታ አሳዳ ነ ስንꬃን ኡቶሶና፤ ነ ኦደይሳ ስኦሶና፤ ሽን ኦꬆኮና። ኤንቲ ሲቆባ ሃሳዮሶና፤ ሽን ኤንታ ዎዛናይ ጎአ ፃላላ ያረቴስ።
32 ነ ኤንታዉ እስ ሲቆ ማዝሙረ ሎኦ ግርሳን የፅያነ ዲꬅ ሎይꬅድ ዲፅያ አሳ መላ። ኤንቲ ነ ኦደይሳ ስኦሶና፤ ሽን ኦꬆኮና።
33 ሽን ነ ኦደይስ ቱማ ፖለታና፤ ፖለትያ ዎደ፥ ናበይ ኤንታ ግዶን ደኤይሳ ኤንቲ ኤራና” ያግስ።