43
ቦንቾይ ፆሳ ኬꬅ ስምስ
1 ሄ ኡራይ ታና ዶሎሀ ባጋ ፐንግያኮ ኤህስ።
2 ታኒ እስራኤለ ፆሳ ቦንቾይ ዶሎሀ ባጋፈ የይሳ በአስ። እያ ዩሳ ግርሳይ ክፃ ሃꬃ ጉንꬃ መላ፤ ቢታይ እያ ቦንቹዋን ፖእስ።
3 ታ በእዳ ቆንጨꬃይ ካሰ ጎዳይ የሩሳላመ ካታማ ꬋይሳናዉ ይዳ ዎደ በእዳ ቆንጨꬃ ዳኔስ። ኮቦራ ሻፋ ማታን ታኒ በእዳ ቆንጨꬃ ዳኔስ። ሄ ዎደ ታ ሶምኡዋ ሳአ ጋꬃዳ ጉፋናስ።
4 ጎዳ ቦንቾይ ዶሎሀ ፐንግያራ ፆሳ ኬꬃ ግዶ ገልስ።
5 ሄ ዎደ ጎዳ አያናይ ታና ደንꬅድ፥ ግዶ ዳባባ ገልስን፥ ሄኮ፥ ጎዳ ቦንቾይ ፆሳ ኬꬃ ኩምስ።
6 ያን ሄ ኡራይ ታ ማታን ኤቅዳሽን፥ ፆሳ ኬꬃ ግዶፈ ጎዳይ ታዉ ኦድሽን ስአስ።
7 እ ታኮ፥ “አሳ ናአዉ፥ ሀይስ ታ አራታይ ኡትያነ ታ ቶሆይ የꬍያ በሰ። ታ እስራኤለ አሳ ግዶን መርናዉ ዳና። ህዛፐ ጉየ እስራኤለ አሳ ግድን፥ ኤንታ ካዎታ ግድን፥ ኤቃ ጎይንድ ዎይኮ ባንታ ካዎታ ሀዉልተ ጎይንሸ ታ ጌሻ ሱንꬃ ቱንሶኮና።
8 እስ ጎዳ ፃላል ታናነ ኤንታ ሻክን፥ ባንታ ፐንግያ ታ ፐንግያ ማታን፥ ባንታ ፐንገ ዝዝግያ ታ ፐንገ ምꬃ ማታን ኤስዶሶና። ባንታ እፀትዳ ኦሱዋን ታ ጌሻ ሱንꬃ ቱንስዶሶና። ሄሳ ግሾ፥ ታኒ ታ ሀንቁዋን ኤንታ ꬋይሳስ።
9 ህዛ ኤቃ ጎይኖ አጎ፤ ባንታ ካዎታ ሀዉልተ ታ ማታፐ ድጎ። ያትኮ፥ ታ ኤንታ ግዶን መርናዉ ዳና።”
10 ዛሪድ ጎዳይ ታኮ፥ “አሳ ናአዉ፥ ታ ነና በስዳ ፆሳ ኬꬃ ኦሱዋ እስራኤለ አሳስ ኦዳ፤ ኤንቲ ባንታ ኦꬅዳ ናጋራን ዬላታና መላ እያ መꬉዋባ ኤንታዉ ኦዳ።
11 ኤንቲ ባንታ ኦꬅዳባን ዬላትያባ ግድኮ፥ ፆሳ ኬꬃ ማላ፥ እ ኬፀትዳ ሀኖታ፥ ከይያ ደꬃታ፥ ገልያ ፐንገታነ እያ ኩመꬃ ምስልያ ኤንታዉ ቆንጭሳ። ሄሳዳካ፥ እያ ዎጋ፥ እያ ህግያ ኡባ ኤንታ ኤርሳ። ሄ ኬꬃ ሀኖታ ካላና መላ እያ ህግያነ ዎጋ ናጋና መላ ኤንቲ ፄልሽን ፃፋ።
12 ፆሳ ኬꬃ ህገይ ሀይሳ፥ ዙማ ሁጰን፥ ፆሳ ኬꬃ ዩሹዋን ደእያ በሳ ኡባይ ኡባፈ ጌሽ ግዳና።”
ያርሾ በሳ
13 ያርሾ በሳይ ካሰ ፆሳ ኬꬃ ዋꬍዳይሳዳ፥ እስ ዋꬋነ ኦይዱ ብራ ጉጅድ ዋትስ። ያርሾ በሳ ባሱዋ ዩሾን እስ ዋꬋ ዝቃነ እስ ዋꬋ ዳልግያ ኦል ደኤስ፤ ሄ ኦላይ ካረ ባጋራ እስ ታካꬎ ꬎቄስ፤ ሄስ ያርሾ በሳ ꬎቃተꬃ።
14 ባሱዋፐ ብድ፥ ኮይሮ ደꬃ ጋካናዉ ꬎቃተꬃይ ናምኡ ዋꬋ፤ ጎምፓይ እስ ዋꬋ። ጉꬃ ደꬃፈ ብድ ግታ ደꬃ ጋካናዉ ꬎቃተꬃይ ኦይዱ ዋꬋ፤ ቃስ ጎምፓይ እስ ዋꬋ።
15 ያርሾይ ፁሳ ጮጨይ ደእያ ዉርሰꬃ ደꬃይ ኦይዱ ዋꬋ ꬎቃ። እ ኦይዱ ማዛነ ግድድ፥ ኦይዱ ማዛንያ ቦላ እስ እስ ካጨይ ደኤስ፤
16 ታማይ ኤፅያ ጮጨይ ኦይዱ ማዛነ ግድድ፥ አዱሳተꬃይነ ዳልጋተꬃይ ታማነ ናምኡ ዋꬋ።
17 ናምአንꬆ ደꬃይ ሄሳ መላ ኦይዱ ማዛነ ግድድ፥ አዱሳተꬃይነ ዳልጋተꬃይ ታማነ ኦይዱ ዋꬋ። ሄ ደꬃ ካረ ባጋ ጋፃይ እስ ታካꬎ ꬎቄስ፤ ዩሾን እስ ዋꬋ ኦል ደኤስ። ያርሾ በሳ ፑደ ኤፍያ ደꬃት ዶሎሀ ባጋን ደኦሶና።
18 ኡባ ሃርያ ጎዳይ ታኮ፥ “አሳ ናአዉ፥ ፁሳ ያርሾ ያርሻናዉነ ሱꬁ ዉርፃናዉ፥ ያርሾ በሳ ግምብድ ዉርስያ ጋላስ ኦሰታና ዎጋይ ሀይሳ።
19 ታ ስንꬃን ኤቅድ ኦꬅያ ሳዶቃ ያራፐ የለትዳ ሌወ ኮቸ ግድዳ ካህነታስ ናጋራ ያርሾ ኦꬃዳ እስ ዎፋኖ እማ” ያጌስ ኡባ ሃርያ ጎዳይ።
20 ኔኒ ሄ ሱꬃፈ ኤካዳ፥ ኦይዱ ካጨታ፥ ናምአንꬆ ደꬃ ኦይዱ ማዛነታነ ሄ ደꬃ ጋፃ ትያ። ሄሳዳ ኦꬃዳ፥ ያርሾ በሳ ጌሻ።
21 ናጋራ ያርሾስ እመትዳ ኮርማ ኤካዳ፥ ፆሳ ኬꬃስ ተቀትዳ ጌሻ በሳፈ ካረ ባጋራ እያዉ ጊግዳ በሳን ፁጋ።
22 ዎንተꬃ ጋላስ ቦረይ ባይና እስ ኮለ ኤካዳ፥ ናጋራ ያርሾ ኦꬃዳ ያርሻ። ካሰ ኮርማ ሱꬃን ጌሽዳይሳዳ ሄ ኮልያ ሱꬃን ያርሾ በሳ ጌሻ።
23 ጌሻ ስማዳ ቦረይ ባይና እስ ዎፋኖነ እስ ማራዘ ኤካዳ፥
24 ናምኣካ ጎዳ ስን ሺሻ። ካህነት ኤንታ ቦላ ማፅነ ላልድ፥ ጎዳስ ፁሳ ያርሾ ኦꬅድ ያርሾ።
25 “ላፑን ጋላስ ኩመꬅ፥ እስ እስ ጋላስ፥ እስ ኮለ፥ እስ ዎፋኖነ እስ ማራዘ ናጋራ ያርሾ ኦꬃዳ ያርሻ።
26 ካህነት ላፑን ጋላስ ኩመꬅ ያርሾ በሳ ጌሽድ ጎዳስ ዱማዮ።
27 ሀ ጋላሳት ዉርያ ዎደ፥ ሆስፑንꬆ ጋላሳፐ ዶምድ፥ ካህነት ፁሳ ያርሾነ እስፈተꬃ ያርሾ ሺሾ። ሄ ዎደ ታ ህንተናን ኡፋይታና” ያጌስ ኡባ ሃርያ ጎዳይ።