10
አሳይ ባንታ ናጋራ ፓፅዶሶና
1 እዝር ፆሳ ኬꬃ ስንꬃን ኩንድድ ዬክሸ ዎስያ ዎደነ ናጋራ ፓፅያ ዎደ ማጭ፥ አደይነ ናእ ደእያ እስራኤለ አሳይ እያኮ ሺቅድ፥ ይባታ ዬሆ እያራ ዬክዶሶና።
2 ኤላማ ያራ ግድዳ ይኤላ ናአይ ሳካን ሀይሳዳ ያግስ፤ “ኑኒ ኑ ዩሾን ደእያ አላጋ ማጫሳታ ኤክድ፥ ኑ ፆሳስ አማነትቦኮ። ግዶሽን፥ ሀእካ እስራኤለስ ኡፋይስ ደኤስ።
3 ታ ጎዳዉ፥ ኔንነ ኑ ፆሳ ኪታ ናገይሳት ዞርዳይሳዳ ኑኒ ሀ ማጫሳነ ኤንታፈ የለትዳ ናይታ ኡባ የዳናዉ ቃላ ገሎስ። ሄስ ኡባይ ጎዳ ህገይ ገይሳዳ ፖለቶ።
4 እዝራ፥ ሀ ኦሶይ ነ ኩሸን ደኤስ፥ ደንዳ፤ ኑኒ ነና ማዳና፤ ምና!” ያግስ።
5 እዝር ደንድ ኤቅድ፥ ካህነታ፥ ሌወታነ እስራኤለ አሳ ኡባ ሀ ጌተትዳይሳታ ኦꬃና መላ ጫቅስስ፤ ኤንትካ ጫቅዶሶና።
6 እዝር ፆሳ ኬꬃ ስንꬃፈ ደንድድ፥ ኤልያሴባ ናአይ ዮሃን ደእያ ክፍለ ገልስ። ያን ድኦፐ ስምዳ አሳይ ናጋራስ ዬክሸ አቅዳ ግሾ፥ ሄ በሳን ካꬅ ምቤና፤ ሃካ ኡይቤና።
7 ድኦፐ ስምዳ አሳይ የሩሳላመ ሺቃና መላ፥ ይሁዳንነ የሩሳላመን አዋጅዶሶና።
8 ሀ ሄꬑ ጋላሳታ ግዶን ሄ በሳን ሺቆና ኦንካ ደእኮ፥ እያዉ ደእያባይ ኡባይ ኤከታና መላነ እካ ድኦፐ ስምዳ አሳ ሺቁዋፐ ኩረታና መላ ሀላቃትነ ጭማት ኦዳ ኩይዶሶና።
9 ሄ ጌተትዳ ሄꬑ ጋላሳታ ግዶን፥ ኡዱፉንꬆ አጌናን ላታማንꬆ ጋላሳን ይሁዳነ ብንያመ አሳ ኡባይ የሩሳላመ ሺቅዶሶና። ሀ ዴፆ ኦዳነ ዎልቃማ እራ ጋሶን፥ ኮኮርሸ፥ ፆሳ ኬꬃ ስንꬃን ደእያ ዳባባን ኡትዶሶና።
10 ካህነ እዝር ደንዲድ ሀይሳዳ ያግስ፤ “ህንተ አማነቶና እፅደታ፤ አላጋ ማጫሳታ ማቾ ኤክድ፥ እስራኤለ ናቁዋ ቦላ ናቆ ጉጅደታ።
11 ህንተ ናጋራ ጎዳስ፥ ህንተ አዋታ ፆሳስ ፓፅተ፤ እያ ኡፋይስያባ ኦꬅተ። ሄ ቢታን ደእያ አይሁደ ግዶና አሳፐነ ህንተ ኤክዳ አይሁደ ግዶና ህንተ ማቸታፐ ሻከትተ” ያግስ።
12 ሺቅዳ አሳይ ባንታ ቃላ ꬎቁ ኦꬅድ፥ ሀይሳዳ ያግዶሶና። “ነ ግያባ ኡባ ኑኒ ኦꬃና!
13 ሽን ሀይሳን ሺቅዳ አሳይ ዳሮ፤ ሄሳ ቦላ ዎልቃማ እር ቡኬስ። ኑኒ እራፐ አትያ በሲ ሀይሳን ባዋ። ሀ ናጋራን ቆህዳ አሳይ ዳሮ ግድዳ ግሾ፥ እስ ጋላሳን ዎይኮ ናምኡ ጋላሳን ሀ ኦዳ ፖላናዉ ዳንዳኦኮ።
14 ሀ ሺቅዳ አሳ ሱንꬃን ኑ ሀላቃት የሩሳላመን ጋምእድ፥ ኮሽያባ ኦꬆ። ሄሳ ጋሶን ደንዳዳ ፆሳ ዎልቃማ ሀንቆይ ኑፐ ስማና ጋካናዉ፥ ኑ ካታማታን ደእያ አይሁደ ግዶና ማጫሳታ ኤክዳ ኡባይ ኬርዳ ቃማን ካታማታ ጭማትነ ዳይናታራ እስፈ የሩሳላመ ዮ።
15 አሳሄላ ናአይ ዮናታንነ ተቁዋ ናአይ ያህዝ ኤንታ ቆፋ ጳልቅዶሶና፤ ማሱላምነ ሌወ ግድዳ ሳባት ኤንታና ማድዶሶና” ያግዶሶና።
16 ድኦፐ ስምዳ አሳይ ግዳይሳዳ ኦꬅዶሶና። ካህነይ እዝር ኡባ ኮቻታፐ ሀላቃታ ዶርድ፥ ኡባ ኤንታ ሱንꬃን ሱንꬃን ፃፍስ። ታማንꬆ አጌናን ኮይሮ ጋላሳን ሀላቃት ኦዳ ፕልግድ በኦ ዶምዶሶና።
17 ኮይሮ አጌናን ኮይሮ ጋላሳይ ጋካናዉ፥ አይሁደ ግዶና ማጫሳታ ኤክዳ አሳታ ኡባ ፕልግድ ዉርስዶሶና።
አላጋ ማቾ ኤክዳ አሳታ
18 ካህነ ኮቻታ ግዶፈ አላጋ ማጫሳታ ኤክዳይሳት ሀይሳታ፤ እዮሳደቃ ናአ እያሱ ኮቻታፐነ እያ እሻታ ግዶፈ ማእሰያ፥ አላዛራ፥ ያርባነ ጎዶልያ።
19 ኤንቲ ባንታ ማቸታ የዳናዉ ቃላ ገልዶሶና፤ ባንታ ናጋራ ግሾ፥ ዉድያፐ እስ እስ ማራዘ ናቆ ያርሾ ኦꬅድ ያርሽዶሶና።
20 እመራ ያራፐ አላጋ ማቸታ ኤክዳይሳት ሀናናነ ዛባዳ።
21 ሀርማ ያራፐ ማእሰያ፥ ኤልያሳ፥ ሻማያ፥ ይኤላነ ኦዝያ።
22 ፓስኮራ ያራፐ ኤልዮአናያ፥ ማእሰያ፥ እስማኤላ፥ ናትናኤላ፥ ዮዛባታነ ኤልስ።
23 ሌወታፐ፥ ዮዛባታ፥ ሳመአ፥ ቃልፃ ጌተትያ ቀላያ፥ ፋታያ፥ ይሁዳነ አላዛራ።
24 ዛማረታፐ፥ ኤልያሴባ።
ፐንገ ናገይሳታፐ፥ ሳሉማ፥ ፀለማነ ኡረ።
25 እስራኤለታፐ፥ ፋሮሳ ያራፐ ራምያ፥ ይዛያ፥ ማልክያ፥ ማያምና፥ አላዛራ፥ ማልክያነ ባናያ።
26 ኤላማ ያራፐ ማታና፥ ዛካርያሳ፥ ይኤላ፥ አብዳ፥ ይረሞታነ ኤላ።
27 ዛታ ያራፐ ኤልዮአና፥ ኤልያሴባ፥ ማታና፥ ይረሞታ፥ ዛባዳነ አዚዛ።
28 ባባያ ያራፐ ዮሃና፥ ሀናና፥ ዛባያነ አትላያ።
29 ባና ያራፐ ማሱላማ፥ ማሉካ፥ አዳያ፥ ያሱባ፥ ሻላነ ይረሞታ።
30 ፓሀት-ሞአባ ያራፐ አድና፥ ካላላ፥ ባናያ፥ ማእሰያ፥ ማታና፥ ባስልኤላ፥ ብኑያነ ምናሰ።
31 ካርማ ያራፐ አላዛራ፥ ይሸያ፥ ማልክያ፥ ሻማያ፥ ስሞና፥
32 ብንያመ፥ ማሉካነ ሳማራያ።
33 ሀሱማ ያራፐ ማታና፥ ማታታ፥ ዛባዳ፥ ኤልፋላፃ፥ የረማያ፥ ምናሰነ ሳመአ።
34 ባና ያራፐ ማዳያ፥ አምራማ፥ ኡላ፥
35 ባናያ፥ በዳያ፥ ካልቀ፥
36 ዋንያ፥ ማረሞታ፥ ኤልያሴባ፥
37 ማታና ማትናያነ ያእሳ።
38 ብኑያ ያራፐ ሳማአ፥
39 ሰለማ፥ ናታና፥ አዳያ፥
40 ማክናዳባያ፥ ሳሳያ፥ ሳራያ፥
41 አዛርኤላ፥ ሰለማ፥ ሳማራ፥
42 ሳሉማ፥ አማረነ ዮሰፋ።
43 ናቦ ያራፐ ይኤላ፥ ማትታ፥ ዛባዳ፥ ዛብና፥ ያዳያ፥ እዩኤላነ ባናያ።
44 ሀ ኡባይ አይሁደ ግዶና ማቸታ ኤክዳይሳታ፤ እሶት እሶት ናአካ የልዶሶና።